ទីបំផុតបំណែកគ្រាប់រ៉ុក្កែតចិន «ធ្លាក់នៅក្បែរកោះម៉ាល់ឌីវ» នៅក្នុងមហាសមុទ្រឥណ្ឌា

(ម៉ាល់ឌីវ)៖ យោងតាមការចេញផ្សាយដោយ ទីភ្នាក់ងារសារព័ត៌មាន Reuters នាយប់ថ្ងៃអាទិត្យ ទី០៩ ខែឧសភា ឆ្នាំ២០២១ នេះឲ្យដឹងថា កំណាត់គ្រាប់រ៉ុក្កែតចិន Long March 5B បានធ្លាក់បុកបរិយាកាស និងស្រោចពីលើមហាសមុទ្រ ស្ថិតនៅចំណុចភាគខាងលិចប្រជុំកោះម៉ាល់ឌីវ កាលពីជិតថ្ងៃត្រង់ថ្ងៃអាទិត្យនេះ (ម៉ោងនៅភ្នំពេញ)។

ប្រទេសចិនកាលពីថ្ងៃសុក្រសប្តាហ៍នេះ បានចេញមុនបន្ថយការព្រួយបារម្ភ ដោយអះអាងថា កំណាត់គ្រាប់រ៉ុក្កែតរបស់ខ្លួន ដែលនឹងធ្លាក់ចុះមកលើផែនដីវិញនោះ គឺមានហានិភ័យទាបបំផុត ដែលមិនអាចបង្កគ្រោះថ្នាក់ដល់វិស័យអាកាសចរណ៍ និងមនុស្សលើដីឡើយ ព្រោះផែនដីត្រូវបានគ្របដណ្តប់ ដោយមហាសមុទ្រប្រមាណ ៧០% ហើយការធ្លាក់បុកបរិយាកាស នឹងធ្វើឲ្យកំណាត់រ៉ុក្កែតនោះ បែកចេញជាបំណែកៗមិនខាន។

ការិយាល័យវិស្វកម្មអវកាសចិន (CMEO) បានប្រកាសកាលពីវេលាម៉ោង ១០៖២៤នាទីព្រឹកថ្ងៃអាទិត្យ ទី០៩ ខែឧសភានេះថា «បន្ទាប់ពីការតាមដាន និងវិភាគកន្លងមកនេះ បំណែកចុងក្រោយនៃរ៉ុក្កែត Long March 5B Yai-2 បានធ្លាក់បុកបរិយាកាសហើយ»។ ចំណុចដែលចិនបានបង្ហាញនោះ គឺស្ថិតក្បែរប្រជុំកោះម៉ាល់ឌីវ (ភាគលិច) ដែលស្ថិតក្នុងផ្ទៃមហាសមុទ្រឥណ្ឌា។

ចិនក៏បានប្រកាសផងដែរថា បំណែកគ្រោះថ្នាក់ត្រូវបានបំបែក ឲ្យខ្ទេចខ្ទីជាបំណែកៗអស់ទៅហើយ នៅពេលវាបុកបរិយាកាសផែនដី។ ដោយឡែកក្រុមអ្នកអង្កេត ដោយប្រើប្រាស់ទិន្នន័យពីយោធាអាមេរិក ក៏បានប្រកាសអំពីការធ្លាក់ចុះមកវិញ របស់កំណាត់គ្រាប់រ៉ុក្កែតចិននោះ ក្នុងពេលដូចគ្នាផងដែរ៕

ប្រែសម្រួល៖ Cambo Space