កងទ័ពអវកាសអាមេរិកនឹងកសាងប្រព័ន្ធរ៉ាដាថ្មីៗ ដែលអាចឆ្លុះមើលវត្ថុអវកាស ឆ្ងាយៗពីផែនដី

(វ៉ាស៉ីនតោន)៖ កងទ័ពអវកាសអាមេរិក កំពុងព្យាយាមបង្កើតប្រព័ន្ធរ៉ាដាថ្មីៗ ដែលមានសមត្ថភាពតាមដាន វត្ថុអវកាសនៅឆ្ងាយៗពីផែនដី។ នៅខែមិថុនាខាងមុខនេះ កងទ័ពអវកាសអាមេរិក នឹងចាប់ផ្តើមកម្មវិធីប្រកួតប្រជែង នៃការអភិវឌ្ឍប្រព័ន្ធរ៉ាដាថ្មីៗ ដែលអាចតាមដាន ផ្កាយរណប និងកម្ទេចកម្ទីផ្សេងៗ ដែលស្ថិតនៅខ្ពស់ក្នុងគន្លងអវកាស លើសពីកម្ពស់៣៥,០០០គីឡូម៉ែត្រ។

ជុំវិញគម្រោងការដ៏ធំខាងលើនេះ ក្រុមហ៊ុនឯកជនមួយ ឬច្រើននឹងត្រូវជ្រើសរើស ដើម្បីអភិវឌ្ឍគំរូសាកល្បង សម្រាប់គម្រោងប្រព័ន្ធរ៉ាដាហៅថា គំនិតកសាងប្រព័ន្ធរ៉ាដា អង្កេតទីអវកាសឆ្ងាយៗ (Deep Space Advanced Radar Concept ឬ DARC) ដែលត្រូវបានបង្កើតឡើងដោយកងទ័ពអាកាសអាមេរិក កាលពីឆ្នាំ២០១៧។

គួរបញ្ជាក់ថា ទីតាំងប្រព័ន្ធរ៉ាដាអាចដល់ចំនួន ០៣កន្លែង អាចនឹងបង្កើតឡើងក្នុងពេលប៉ុន្មានឆ្នាំខាងមុខ ហើយកងទ័ពអវកាសអាមេរិកត្រូវគេរំពឹងថា នឹងវិនិយោគថវិកាចន្លោះ ១៤០-២០០លានដុល្លារក្នុងមួយឆ្នាំលើការអភិវឌ្ឍ និងធ្វើតេស្តប្រព័ន្ធរ៉ាដានៃគម្រោង DARC នេះក្នុងជំហានដំបូង។

បើតាមកងទ័ពអវកាសអាមេរិក គោលដៅចម្បងនៃគម្រោង DARC គឺដើម្បីឲ្យសហរដ្ឋអាមេរិក ធ្វើប្រតិបត្តិការប្រព័ន្ធរ៉ាដាដែលកាន់តែទំនើប ជាងប្រព័ន្ធរ៉ាដាកំពុងដំណើរការនាពេលបច្ចុប្បន្ន ដែលភាគច្រើនត្រូវបានអភិវឌ្ឍឡើង តាំងតែពីរាប់ទសវត្សរ៍មុនមកម៉្លេះ។ ទោះបីជាមិនប្រាប់ថា គោលដៅនៃ DARC គឺជាអ្វីចំៗក៏ដោយ ប៉ុន្តែការអនុវត្តផែនការនេះ កើតមានឡើងអំឡុងពេលដែលឥទ្ធិពលចិន កំពុងកើនឡើងខ្លាំងនៅក្នុងទីអវកាស ខណៈរុស្ស៊ីវិញក៏មិនថមថយដែរ៕

ប្រែសម្រួល៖ Cambo Space
ប្រភព៖ Space News (ថ្ងៃអង្គារ ទី២៥ ខែឧសភា ឆ្នាំ២០២១)