រូបមួយសន្លឹកនេះត្រូវបានថតពីចម្ងាយ «១.៥លានគីឡូម៉ែត្រ» ពីភពផែនដី, តើតំបន់ជាំខ្មៅនៅប៉ូលខាងត្បូងនោះជាអ្វី?

(បរទេស)៖ ផ្កាយរណបស្ថិតនៅរយៈចម្ងាយឆ្ងាយ (DISCOVR) នៃរដ្ឋបាលបរិយាកាស និងមហាសមុទ្រ (NOAA) របស់សហរដ្ឋអាមេរិក បានផ្តិតយករូបភាពដ៏ពិសេស ១សន្លឹកប្រចាំឆ្នាំ២០២១ នៅក្នុងរយៈចម្ងាយ ១.៥លានគីឡូម៉ែត្រភពផែនដី និងបានឲ្យគ្រប់គ្នាឃើញតំបន់ខ្មៅដ៏ធំមួយ ស្ថិតនៅប៉ូលខាងត្បូង។

សម្រាប់រូបភាពនេះ បងប្អូនមួយចំនួនប្រាកដជាអាចស្មានដឹងថា ជាអ្វីរួចទៅហើយ ដោយគ្រាន់តែបានឃើញភ្លាម។ នោះគឺជាបាតុភូតសូរ្យគ្រាសពេញលេញ តែមួយគត់ប្រចាំឆ្នាំ២០២១ ដែលបានកើតមានឡើងពីលើទ្វីបអង់តាកទិក ស្ថិតនៅប៉ូលខាងត្បូងនៃភពផែនដី កាលពីថ្ងៃទី០៤ ខែធ្នូ។

គួរបញ្ជាក់ថា កាមេរ៉ានៅលើផ្កាយរណប DISCOVR របស់ NOAA ដែលផលិតដោយអង្គការ NASA បានផ្តិតយកទិដ្ឋភាពដ៏អស្ចារ្យខាងលើនេះ។ វាគឺជាស្រមោលសូរ្យគ្រាស ឬបើនិយាយឲ្យចំគឺជាស្រមោលនៃព្រះចន្ទ ដែលបានគោចរមកបាំងពន្លឺព្រះអាទិត្យ នៅត្រង់ចំណុចនោះ៕

ប្រែសម្រួល៖ Cambo Space
ប្រភព៖ Space.com (ថ្ងៃព្រហស្បតិ៍ ទី០៩ ខែធ្នូ ឆ្នាំ២០២១)