(អាមេរិក)៖ រូបថតបង្ហាញពីទិដ្ឋភាពជ្រៅបំផុតទៅក្នុងចក្រវាល (ផ្កាយនានានៅចំពីមុខ និងកាឡាក់ស៊ីរាប់រយនៅខាងក្រោយ (Background)) ថតដោយតេឡេស្កូបអវកាស James Webb ដែលគ្រប់គ្រងដោយអង្គការ NASA ត្រូវបានទម្លាយចេញមកហើយ ប៉ុន្តែវាត្រឹមជារូបថតតេស្តសិនប៉ុណ្ណោះ មិនមែនផ្លូវការនោះឡើយ ខណៈបណ្តុំរូបថតពណ៌ធម្មជាតិដំបូង (Full-Colour Images) នឹងត្រូវបញ្ចេញនៅម៉ោង ១០៖៣០នាទីព្រឹកថ្ងៃអង្គារ ទី១២ ខែកក្កដា ឆ្នាំ២០២២ ពេលវេលានៅសហរដ្ឋអាមេរិក (ត្រូវនឹងយប់ថ្ងៃដដែល ឬអាចឈានដល់ព្រឹកថ្ងៃទី ១៣ ខែ កក្កដា ពេលវេលានៅកម្ពុជា)។
រូបថតថ្មីខាងលើនេះ ត្រូវបានពន្លែងចេញមកដោយអង្គការ NASA កាលពីថ្ងៃទី៦ ខែកក្កដា ឆ្នាំ២០២២ ដោយវាត្រូវបានថតដោយប្រើប្រាស់សិនស័រ FGS (Fine Guidance Sensor) អភិវឌ្ឍឡើងដោយអង្គការអវកាសកាណាដា (Canadian Space Agency ឬ CSA)។ រូបតេស្តមួយសន្លឹកនេះ ត្រូវបានថតដោយប្រើប្រាស់រយៈពេល ៨ ថ្ងៃជាប់ៗគ្នា កាលពីខែឧសភា កន្លងទៅនេះ។ វាជាការរួមបញ្ចូលគ្នារវាងរូបថតសរុប ៧២ សន្លឹក ដែលត្រូវបានផ្តិតក្នុងអំលុងពេល បើកដំណើរការសិនស័ររយៈពេល ៣២ ម៉ោង។
គួរបញ្ជាក់ថា សិនស័រ FGS របស់ James Webb បានផ្តិតរូបភាព «មិនមែនពណ៌ធម្មជាតិនោះឡើយ» អំលុងការធ្វើតេស្តសមត្ថភាពរបស់វា កាលពីខែឧសភានោះ។ FGS បានផ្តិតរូបថតមួយសន្លឹកនេះ ដោយការតម្រូវឲ្យតេឡេស្កូប James Webb តម្រង់ជាប់ជានិច្ចទៅរកគោលដៅ ហើយជាលទ្ធផល គឺក្រុមអ្នកវិទ្យាសាស្ត្រទទួលបានរូបថតរួមមួយសន្លឹក ដែលបង្ហាញអំពីចក្រវាលមានពណ៌រាងស និងក្រហម ដោយចំណុចពណ៌រាងសភ្លឺចែងចាំងតំណាងឲ្យវត្ថុអវកាស ដែលបញ្ចេញពន្លឺក្រហមអាំងហ្វ្រា (Infrared light) ក្នុងកម្រិតខ្លាំង ឯពណ៌ក្រហមព្រឿងៗវិញ តំណាងឲ្យវត្ថុអវកាសរាងស្រអាប់។
តែយ៉ាងណា, ក្រុមអ្នកវិទ្យាសាស្ត្រដែលគ្រប់គ្រង James Webb បានអះអាងថា នេះមិនមែនរូបថតដ៏ល្អឥតខ្ចោះនោះឡើយ ដោយយើងអាចមើលឃើញនូវ ឥទ្ធិពលផ្ទុយ (dithering effect) ដែលនាំឲ្យមាន «ពណ៌ខ្មៅ» នៅត្រង់ចំណុចកណ្តាលនៃពន្លឺផ្កាយ។ បញ្ហានេះបានកើតមានឡើង ព្រោះតែតេឡេស្កូប James Webb បានស្ថិតក្នុងដំណាក់កាលតម្រែតម្រង់នៅឡើយ៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ SPACE/NASA (ថ្ងៃព្រហស្បតិ៍ ទី០៧ ខែកក្កដា ឆ្នាំ២០២២)