(ញូដេលី)៖ ប្រទេសឥណ្ឌានៅដើមខែតុលា ឆ្នាំ២០២២ នេះ បានប្រកាសបិទបញ្ចប់បេសកកម្ម យានអវកាសគោចរជុំវិញភពអង្គារ (Mars) ឈ្មោះ ម៉ាងហ្គាលីយាន (Mangalyaan) ដែលមានរយៈពេល ៨ឆ្នាំនោះជាស្ថាពរហើយ។ ការប្រកាសបិទបញ្ចប់នេះ បានកើតមានឡើងក្រោយគ្រឿងយន្តអវកាស ដែលមានតម្លៃបេសកកម្មសរុប ៧៤លានដុល្លារអាមេរិកមួយនេះបានបាត់ដំណឹង និងមិនអាចឲ្យក្រុមអ្នកវិទ្យាសាស្ត្រ ធ្វើការស្រោចស្រង់ឡើងវិញបានឡើយ។
ទោះជាបែបនេះក្តី Mangalyaan ឬ Mars Orbiter របស់ឥណ្ឌាមួយគ្រឿងនេះ ត្រូវបានអង្គការអវកាសឥណ្ឌា (ISRO) អភិវឌ្ឍឡើង ដើម្បីបំបេញបេសកកម្មនៅភពអង្គារតែ ៦ខែប៉ុណ្ណោះ ប៉ុន្តែក្រោយពីការទទួលជោគជ័យលើបេសកកម្មស្នូលនោះ យាននេះនៅតែអាចដំណើរការបានរហូតដល់ទៅ ៨ឆ្នាំ។
គួរបញ្ជាក់ថា Mangalyaan ត្រូវបានបាញ់បញ្ជូនចេញពីភពផែនដី កាលពីថ្ងៃទី០៥ ខែវិច្ឆិកា ឆ្នាំ២០១៣ និងទៅដល់គន្លងគោចរជុំវិញភពអង្គារ នៅរយៈពេល ១០ខែបន្ទាប់។ ឥណ្ឌាគឺជាប្រទេសតែមួយគត់ ក្នុងចំណោមមហាអំណាចអវកាសនានា ដែលអាចបាញ់បញ្ជូនយានតែមួយលើកប៉ុណ្ណោះទៅភពអង្គារ ហើយទទួលបានជោគជ័យ ១០០% ខណៈអតីតសហភាពសូវៀត, សហរដ្ឋអាមេរិក, ប្រទេសជប៉ុន, ចក្រភពអង់គ្លេស និងប្រទេសចិនផងដែរ សុទ្ធតែធ្លាប់ទទួលបរាជ័យនៅលើកដំបូងៗ។
ស្នាដៃនៃបេសកកម្ម Mangalyaan៖ ក្នុងនាមជាប្រទេសអាស៊ីទី ១ ដែលបញ្ជូនយានទៅដល់គន្លងគោចរជុំវិញភពអង្គារ ដោយជោគជ័យកាលពីឆ្នាំ ២០១៤ និងជាប្រទេសទី ៤ លើពិភពលោកដែលអាចធ្វើបែបនេះបាន, យានឥណ្ឌាមួយនេះបានផ្តិតរូបភាពជាច្រើន នៃផ្ទៃភពអង្គារ និងបញ្ជូនត្រឡប់មកផែនដីវិញ។ លទ្ធផលគួរឲ្យចាប់អារម្មណ៍បំផុត ដែល Mangalyaan បានរកឃើញនោះ គឺព្យុះធូលីនៃភពអង្គារ (Mars dust storms) អាចកញ្ជ្រោលឡើងដល់រយៈកម្ពស់ រាប់រយគីឡូម៉ែត្រឯណោះ ពីលើផ្ទៃភពអង្គារ៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ DNA India
រូបភាព៖ ISRO