«សូរ្យគ្រាសចុងក្រោយ» ប្រចាំឆ្នាំ២០២២ នឹងកើតឡើងនៅថ្ងៃទី២៥ ខែតុលា នេះ (កម្ពុជាអាចមើលការ Live)

(បរទេស)៖ ព្រឹត្តិការណ៍សូរ្យគ្រាសដោយផ្នែក ឬមិនពេញលេញ (Partial Solar Eclipse) ចុងក្រោយប្រចាំឆ្នាំ ២០២២ នឹងកើតឡើងនៅថ្ងៃអង្គារ ទី២៥ ខែតុលា ហើយតំបន់ចំនួន ៣ នឹងអាចមើលឃើញបាតុភូតនេះដោយផ្ទាល់ ខណៈតំបន់ផ្សេងៗទៀត គឺអាចមើលបានតាមរយៈការ Live។

សូរ្យគ្រាសមិនពេញលេញនោះ នឹងចាប់ផ្តើមនៅវេលាម៉ោង ៣៖៥៨នាទីរសៀលថ្ងៃអង្គារ ទី២៥ ខែតុលា (ម៉ោងនៅភ្នំពេញ) និងបញ្ចប់ទៅវិញនៅវេលាម៉ោង ៨៖០១នាទីយប់ថ្ងៃដដែល (ម៉ោងនៅភ្នំពេញ)។ ប្រការនេះមានន័យថា នៅពាក់កណ្តាលនៃចន្លោះម៉ោង ៣៖៥៨នាទី – ៨៖០១នាទីនោះ (ម៉ោង ៥៖៥៩នាទីល្ងាច) ជាពេលដែល Partial Solar Eclipse ខាងលើនេះ ឈានដល់កម្រិតកំពូល ៨២% (ចំលើតំបន់ក្បែរប៉ូលខាងជើង)។

បណ្តាញតេឡេស្កូបអ៊ីតាលី «Virtual Telescope Project 2.0» នឹង Live ផ្ទាល់ ព្រឹត្តិការណ៍ខាងលើនេះ ហើយលោកអ្នកអាចរង់ចាំទស្សនាដោយរីករាយ នៅតាមលំនៅឋានបាន ខណៈវែបសាយ Time and Date វិញ ក៏នឹងធ្វើការផ្សាយបន្តផ្ទាល់ទៅកាន់ Channel យូធូបរបស់ខ្លួនផងដែរ ចាប់ពីរសៀលថ្ងៃអង្គារ ទី២៥ ខែតុលានោះតទៅ។

គួរបញ្ជាក់ថា ព្រឹត្តិការណ៍ Partial Solar Eclipse ខាងលើនេះ នឹងកើតឡើងទៅលើតំបន់ចំនួន ៣ ដូចជា ផ្នែកខ្លះនៃទ្វីបអឺរ៉ុប, អាស៊ីខាងលិច និង ភាគឦសានទ្វីបអាហ្វ្រិក (អាចស្វែងយល់ទីតាំង តាមរយៈផែនដីខាងក្រោម)។ ដោយឡែកសម្រាប់ប្រទេសកម្ពុជាយើង ដែលស្ថិតនៅតំបន់អាស៊ីអាគ្នេយ៍នោះ នឹងមិនអាចមើលឃើញដោយផ្ទាល់ឡើយ តែអាចទស្សនាការ Live បាន។

នៅក្នុងថ្ងៃទី២៥ ខែតុលានោះ ផ្នែកខ្លះនៃប្រទេសរុស្ស៊ីនឹងអាចមើលឃើញ ៨០%, ផ្នែកខ្លះនៃប្រទេសចិន ៧០%, ផ្នែកខ្លះនៃប្រទេសន័រវែស ៦៣% និងផ្នែកខ្លះប្រទេសហ្វាំងឡង់ ៦២%។ នឹងគ្មានកន្លែងណាមួយលើផែនដី អាចមើលឃើញសូរ្យគ្រាស ១០០% ទេ ព្រោះនៅថ្ងៃនោះ ព្រះអាទិត្យ ព្រះចន្ទ និងភពផែនដី មិនស្ថិតលើខ្សែបន្ទាត់ត្រង់ដ៏ល្អបំផុតឡើយ៕

ប្រែសម្រួល៖ Cambo Space (ឥន្ទ វុត្ថា)
ប្រភព៖ SPACE (ថ្ងៃពុធ ទី១៩ ខែតុលា ឆ្នាំ២០២២)