(បរទេស)៖ យើងគ្រប់គ្នាបានដឹងហើយថា ការធ្វើតេស្តនាវាអវកាស Starship របស់ក្រុមហ៊ុន SpaceX កាលពីអំលុងខែមេសា ឆ្នាំ២០២៣ បានទទួលបរាជ័យ ក្នុងការត្បុលឡើងទៅឲ្យដល់គន្លងគោចរជុំវិញផែនដី និងធ្វើគោចរតាមផែនការមេ ប៉ុន្តែនោះមិនមែនជាបញ្ហាសម្រាប់ក្រុមហ៊ុន SpaceX តែមួយនោះឡើយ។
អង្គការ NASA ដែលបានទទួលយក SpaceX របស់លោក Elon Musk ធ្វើជាដៃគូក្នុងការបំពេញបេសកកម្ម Artemis ទៅកាន់ឋានព្រះចន្ទនោះ ក៏កំពុងតែជួបប្រទះឱកាស ដែលអាចធ្វើការពន្យារពេលរហូតដល់ទៅ ១ឆ្នាំទៀត ជាលើកទី ២ ផងដែរ ដោយសារតែភាពមិនច្បាស់លាស់ នៃការធ្វើតេស្តសមត្ថភាពជាក់ស្តែងរបស់ Starship នោះ។
ក្រុមអ្នកជំនាញបានមើលឃើញថា បេសកកម្ម Artemis 3 ដែលត្រូវបានពន្យារពេលម្តងរួចមកហើយពីឆ្នាំ ២០២៤ ទៅឆ្នាំ ២០២៥ វិញនោះ អាចនឹងត្រូវពន្យារពេលថែម ១ឆ្នាំទៀត ពោលគឺរហូតដល់ឆ្នាំ ២០២៦។ ពីដើមឡើយ បញ្ហាចម្បងៗរបស់ Starship គឺមានតែទៅលើការទទួលស្គាល់ជាផ្លូវការប៉ុណ្ណោះ ប៉ុន្តែបន្ទាប់ពីការធ្វើតេស្ត Ship 24 និង Booster 7 កាលពីចុងខែមេសា បានបញ្ចប់ទៅដោយការផ្ទុះឆេះនៅលើអាកាសនោះ បញ្ហាធំមួយនេះត្រូវបានកត់បញ្ចូលទៅក្នុង បញ្ជីដែលត្រូវគិតពិចារណាឡើងវិញ។
សម្រាប់ផែនការពីដើមដំបូងនៃការនាំមនុស្ស ទៅជាន់ដីឋានព្រះចន្ទឡើងវិញ និងបោះមូលដ្ឋានស្រាវជ្រាវអចិន្ត្រៃយ៍ លើតំបន់ក្បែរប៉ូលខាងត្បូងព្រះចន្ទ (Artemis 3) នោះ ត្រូវបានគ្រោងធ្វើឡើងនៅចុងឆ្នាំ២០២៤ ប៉ុន្តែកាលពីឆ្នាំ២០២១ ក្រុមការងារអង្គការ NASA បានសម្រេចពន្យារពេលទៅដល់ចុងឆ្នាំ ២០២៥ វិញ។ ប៉ុន្តែនៅពេល SpaceX បាននិងកំពុងជួបប្រទះបញ្ហាធំក្នុងការធ្វើតេស្ត Starship នៅឡើយ នោះអង្គការ NASA មានឱកាសខ្ពស់បំផុត ក្នុងការពន្យារពេលបេសកកម្ម Artemis 3 ដូចការព្យាករណ៍ខាងលើ។
គួរបញ្ជាក់ថា គិតត្រឹមពាក់កណ្តាលខែមិថុនា ឆ្នាំ២០២៣ នេះ គេនៅមិនទាន់ឃើញអង្គការ NASA បង្ហាញចេតនាជាក់ស្តែង អំពីការពន្យារពេល Artemis 3 ឬក៏អាចមានផែនការអ្វីផ្សេងនៅឡើយទេ។ ក្រុមហ៊ុន SpaceX ត្រូវបាន NASA ជ្រើសរើសជាដៃគូសម្រាប់បេសកកម្ម Artemis 3 ដើម្បីផ្គត់ផ្គង់សេវាចុះចតលើផ្ទៃព្រះចន្ទហៅថា Starship HLS lander ឬ Starship Human Landing System។ ដោយឡែកសម្រាប់បេសកកម្ម Artemis 2 ដែលគ្រោងធ្វើឡើងនៅចុងឆ្នាំ ២០២៤ នោះ គឺជាបេសកកម្មយាន Orion អភិវឌ្ឍដោយក្រុមហ៊ុន Boeing ដែលនឹងត្រូវដឹកនាំអវកាសយានិក ០៤រូប ទៅគោចរជុំវិញព្រះចន្ទ និងត្រលប់មកផែនដីវិញ (ដោយគ្មានការចុះចតនោះទេ)៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ Gagadget (ថ្ងៃព្រហស្បតិ៍ ទី១៥ ខែមិថុនា ឆ្នាំ២០២៣)