(បរទេស)៖ បេសកកម្ម Crew-7 ដែលមានអវកាសយានិកអន្តរជាតិចំនួន ៤រូប ជិះនៅលើយានអវកាស Crew Dragon របស់ SpaceX នោះ បានចូលចតនៅម៉ូឌុល Harmony របស់សហរដ្ឋអាមេរិក នៅឯស្ថានីយអវកាសអន្តរជាតិ (ISS) ហើយនៅម៉ោង ៨៖១៦នាទី យប់ថ្ងៃអាទិត្យ ទី២៧ ខែសីហា ឆ្នាំ២០២៣ នេះតែម្តង (គិតតាមពេលវេលានៅកម្ពុជា) ត្រូវនឹងម៉ោង ៩៖១៦នាទីព្រឹកថ្ងៃដដែល ម៉ោងនៅរដ្ឋធានីវ៉ាស៊ីនតោនសហរដ្ឋអាមេរិក។ ទស្សនាវីដេអូបេសកកម្ម Crew-7 ចូលចតនៅស្ថានីយអវកាសអន្តរជាតិ៖
យាន Crew Dragon បានហោះចាកចេញពីផែនដីកាលពីយប់ថ្ងៃសៅរ៍ (ម៉ោងនៅកម្ពុជា) តាមរយៈគ្រាប់រ៉ុក្កែត Falcon 9 ខណៈអវកាសយានិកអន្តរជាតិទាំង ៤រូបថ្មីនេះ នឹងបំពេញបេសកកម្មនៅលើ ISS រយៈពេលកន្លះឆ្នាំ។ មេបញ្ជាការនៃបេសកកម្មលើកនេះ គឺជាអវកាសយានិក Jasmin Moghbeli មកពីអង្គការ NASA បានប្រាប់ទីបញ្ជាការរបស់ SpaceX នៅលើដី បន្ទាប់ពីការចូលចតនៅ ISS ដោយជោគជ័យនោះថា «អរគុណខ្លាំងណាស់, ខ្ញុំនឹងរំលឹកខ្លួនឯងជានិច្ចថា នេះមិនមែនជាសុបិននោះទេ»។
នៅពេលការចូលចតបានសម្រេចនោះ ISS បានស្ថិតនៅរយៈកម្ពស់ជាង ៤២០គីឡូម៉ែត្រពីលើប្រទេសអូស្ត្រាលី ហើយគិតពីការចាកចេញពីផែនដី រហូតដល់ការចុះចតជោគជ័យនោះ Crew Dragon និងអវកាសយានិកទាំង ៤រូប បានពុះជ្រែកស្រទាប់បរិយាកាសផែនដី និងលំហអវកាសអស់រយៈពេលជិត ៣០ម៉ោងឯណោះ។
គួរបញ្ជាក់ថា មនុស្ស ៣រូបទៀតដែលស្ថិតក្នុងបេសកកម្ម Crew-7 ជាមួយអវកាសយានិក NASA ផងដែរមានដូចជា អវកាសយានិក Mogensen មកពីអង្គការអវកាសអឺរ៉ុប ESA (ជាអ្នកបញ្ជាយាន ឬពីឡុត), អវកាសយានិក Konstantin Borisov មកពីអង្គការអវកាសរុស្ស៊ី Roscosmos (ជាអ្នកជំនាញផ្នែកបេសកកម្មអវកាស) និងអវកាសយានិក Satoshi Furukawa មកពីអង្គការអវកាសជប៉ុន JAXA។ ដោយឡែកអវកាសយានិកមុនៗ នៃបេសកកម្ម Crew-6 នឹងត្រលប់មកផែនដីវិញនៅថ្ងៃទី២ ខែកញ្ញា ខាងមុខនេះ៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ SPACE/NASA/SpaceX (ថ្ងៃអាទិត្យ ទី២៧ ខែសីហា ឆ្នាំ២០២៣)