(តូក្យូ)៖ នៅរសៀលថ្ងៃព្រហស្បតិ៍ ទី២៥ ខែមករា ឆ្នាំ២០២៤នេះ ក្រុមការងារនៃទីភ្នាក់ងារអវកាសជប៉ុន (JAXA) បានធ្វើសន្និសីទសារព័ត៌មាន ដើម្បីបង្ហាញអំពីដំណើរវិវត្តន៍របស់បេសកកម្ម SLIM (Smart Lander for Investigating Moon) ឬ Moon Sniper (អ្នកប្រមាញ់នៅព្រះចន្ទ) របស់ខ្លួន ដែលបានចុះចតលើផ្ទៃព្រះចន្ទបានសម្រេច (តែជួបបញ្ហាខ្លះៗ) កាលពីយប់ថ្ងៃទី១៩ ខែមករានោះ។
អ្វីយើងទាំងអស់គ្នាប៊ិះនឹងភ្លេចនោះ គឺនៅក្នុងខ្លួន SLIM មានរ៉ូបូតខ្នាតតូចប៉ុនគ្រាប់ពីងប៉ុងចំនួន ២គ្រឿង នោះគឺ LEV-1 និង LEV-2 (Lunar Exploration Vehicles) ដោយក្នុងនោះរ៉ូបូត LEV-1 មានផ្ទុកកាមេរ៉ា, ឧបករណ៍បញ្ជូនរលកសញ្ញាវិទ្យុមកផែនដី និងឧបករណ៍ស្រូបសំឡេង សម្រាប់ថតអំលុងការចុះចតរបស់យាន SLIM លើព្រះចន្ទ ខណៈរ៉ូបូត LEV-2 ឬ SORA-Q វិញមានបំពាក់កាមេរ៉ា ២ គ្រាប់ (សហការផលិតជាមួយក្រុមហ៊ុន SONY, ក្រុមផលិតឧបករណ៍ក្មេងលេង Takara Tomy និងសាកលវិទ្យាល័យ Doshisha) ដើម្បីថតទិដ្ឋភាពនានាលើផ្ទៃព្រះចន្ទ ហើយបញ្ជូនទៅកាន់ LEV-1 ដើម្បីផ្ទេរបន្តមកកាន់ផែនដី (កូនរ៉ូបូតទាំង ២ ត្រូវធ្វើការងារជាមួយគ្នា)។
កូនរ៉ូបូតទាំង ២គ្រឿងនេះ បានរំដោះខ្លួនចេញពី SLIM ភ្លាមៗនៅមុនយាន Lander ចុះចតលើផ្ទៃព្រះចន្ទ ដើម្បីថតយកទិន្នន័យនានាទាំងនៅមុន និងក្រោយយាន SLIM ចុះចតលើផ្ទៃព្រះចន្ទ។ នៅក្នុងរូបភាពថ្មីនេះដែរ យើងបានឃើញតួយាន SLIM ដាំក្បាលខ្ទប់នឹងផ្ទៃព្រះចន្ទតែម្តង ដោយប្រការនេះគឺមិនខុសពីទិន្នន័យដែល JAXA បានប្រកាសនៅក្នុងអំលុងការចុះចតយាននេះ កាលពីថ្ងៃទី១៩ ខែមករានោះឡើយ។
យ៉ាងណាក៏ដោយ ការចុះចតខុសពីការចង់បានបន្តិចរបស់ SLIM នេះហើយ បានធ្វើឲ្យ Lander មួយនេះមិនអាចស្រូបយកថាមពលព្រះអាទិត្យបាន ព្រោះតែបន្ទះស្រូបយកថាមពលពីព្រះអាទិត្យ (Solar Panels) នៅលើតួខ្លួនវា បែរមុខចេញពីទិសដៅព្រះអាទិត្យ។ ប្រការនេះបាននាំឲ្យ SLIM អាចធ្វើប្រតិបត្តិការបានតែប៉ុន្មានម៉ោងប៉ុណ្ណោះ ដោយពឹងលើថាមពលមានស្រាប់នៅក្នុងខ្លួនវា ហើយ JAXA ត្រូវរង់ចាំដល់ជាង ១សប្តាហ៍បន្ទាប់ពីការចុះចតនោះ ដើម្បីឲ្យព្រះអាទិត្យរះឡើងលើផ្ទៃព្រះចន្ទពីទិសផ្សេងមួយទៀត ក្រែងលោ SLIM អាចស្រូបយកថាមពលមកប្រើប្រាស់បានវិញ ហើយនេះគឺជាក្តីសង្ឃឹមតែមួយគត់។
គួរបញ្ជាក់តាមក្រុមការងារ JAXA បានអះអាងថា ក្រៅពីបានក្លាយជាប្រទេសទី ៥ លើពិភពលោក បន្ទាប់ពីអតីតសហភាពសូវៀត, សហរដ្ឋអាមេរិក, ប្រទេសចិន និងប្រទេសឥណ្ឌា ក្នុងការចុះចតយានដោយជោគជ័យលើផ្ទៃព្រះចន្ទនោះ ជប៉ុនក៏បានក្លាយជាប្រទេសទី ៤ លើលោក ដែលបានប្រើប្រាស់រ៉ូបូតចល័តលើព្រះចន្ទបានសម្រេចផងដែរ បន្ទាប់ពីសហរដ្ឋអាមេរិក, ប្រទេសចិន និងប្រទេសឥណ្ឌា ហើយក៏ជាប្រទេសទី ១ លើពិភពលោក ដែលបានប្រើប្រាស់បច្ចេកវិទ្យារ៉ូបូតខ្នាតតូចប្រភេទនេះ នៅលើផ្ទៃព្រះចន្ទថែមទៀត៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ JAXA/SPACE (ថ្ងៃព្រហស្បតិ៍ ទី២៥ ខែមករា ឆ្នាំ២០២៤)