(បរទេស)៖ ស្របពេលនៃភាពតានតឹង ជម្លោះ គ្រោះធម្មជាតិ និងមហន្តរាយផ្សេងៗទៀត ដែលបាននិងកំពុងកើតឡើងពាសពេញភពផែនដីយើងនេះ តេឡេស្កូបអវកាស James Webb ឯណោះវិញនៅតែបន្តស្ថិតនៅគន្លងគោចររបស់ខ្លួនចម្ងាយ ១.៥លានkm ពីភពផែនដីដដែល ហើយព្យាយាមសិក្សាអំពីការពិតនៃចក្រវាល (Universe) ទៅតាមតួនាទីដែលមនុស្សលោកបានកំណត់ឲ្យ។ ពិតណាស់ សមិទ្ធផលថ្មី១ទៀតហើយ ទើបតែត្រូវបានសម្រេចចេញនៅក្នុងខែសីហា ឆ្នាំ២០២៥នេះ។
James Webb ទើបតែបានសម្លឹងមើលទៅកាន់ទីឆ្ងាយមួយនៃចក្រវាល ឬដែលយើងតែងហៅថា ចក្រវាលជ្រៅៗ (Deep Universe) នោះឯង ព្រោះនេះជាតួនាទីស្នូលរបស់តេឡេស្កូបអវកាសតម្លៃជិត ១០ពាន់លានដុល្លាអាមេរិកមួយនេះ។ សម្រាប់ការសម្លឹងមើលលើកនេះគឺ James Webb បានចំណាយពេលរហូតដល់ទៅជិត ១០០ម៉ោងឯណោះ ទៅលើទីតាំងមួយដែលតេឡេស្កូបអវកាស Hubble បានឆ្លុះមើលកាលពីឆ្នាំ២០០៤ ដែលកាលណោះទស្សនីយភាពចក្រវាល១សន្លឹកនោះ ត្រូវបានគេផ្តល់រហស្សនាមឲ្យថា Hubble Ultra Deep Field។
ជាង២០ឆ្នាំក្រោយមក គឺនៅពេលនេះតែម្តង James Webb បានបង្កើតស្នាដៃថ្មីលើទីតាំងដដែល ដោយការសម្រេចបានរូបភាព១សន្លឹកនេះ។ ពិតណាស់ ទម្រាំបានរូបភាព១សន្លឹកថ្មីនេះ James Webb បានប្រើប្រាស់ឱកាសអំណោយផលក្នុងអំលុងពេល ១១ថ្ងៃពេញ និងផ្តិតរូបភាពខ្ទង់ ៨០០សន្លឹក ទៅលើផ្នែកមួយនៃផ្ទៃមេឃពេលរាត្រីរបស់ផែនដី។ ក្រុមតារាវិទូបានគណនាថា មានកាឡាក់ស៊ីរហូតដល់ខ្ទង់ជិត ១០,០០០កាឡាក់ស៊ីឯណោះ នៅក្នុងរូបភាព១សន្លឹកនេះ ហើយកាឡាក់ស៊ីឆ្ងាយៗ និងមានពន្លឺខ្សោយជាច្រើនទៀតបានបង្ហាញវត្តមាន ដែលយើងមិនធ្លាប់បានស្គាល់នោះឡើយ។
យោងតាមការគណនាដោយធៀបនឹងរូបភាពចាស់របស់ Hubble កាលពីជាង ២០ឆ្នាំមុន រូបភាពថ្មីនេះបានបង្ហាញវត្តមានកាឡាក់ស៊ីថ្មីៗប្រមាណ ២,៥០០កាឡាក់ស៊ីបន្ថែមទៀត ហើយយើងត្រូវអរគុណទៅដល់ ឧបករណ៍ផ្តិតរូបភាពពន្លឺក្រហមអាំងហ្វ្រាកម្រិតមធ្យម នៅក្នុងរយៈចម្ងាយនោះគឺ MIRI Deep Imaging Survey (MIDIS) ដែលអាចវែករកពន្លឺស្រទន់ (ក្រហមៗ) នៃកាឡាក់ស៊ីដែលស្ថិតនៅឆ្ងាយសែនឆ្ងាយពីយើង បូករួមទាំងការប្រើកាមេរ៉ាថតពន្លឺក្រហមអាំងហ្វ្រាជិត (NIRCam) ផងដែរ។
នៅក្នុងរូបភាព១ផ្ទាំងថ្មីនេះ តំបន់ដែលពិសេសជាងគេគឺចំណុចកណ្តាលនៃរូបភាព ព្រោះ James Webb បានចំណាយពេលដល់ទៅ ៤១ម៉ោង នៅក្នុងអំលុងពេលសរុបជិត ១០០ម៉ោងនោះ ដើម្បីសម្រិតសម្រាំងយកភាពលម្អិត ហើយនេះជាការចំណាយពេលយូរបំផុតហើយ នៃការសង្កេតតំបន់មួយនៃចក្រវាល គិតចាប់តាំងពីតេឡេស្កូបអវកាសនេះ បើកដំណើរការកាលពីឆ្នាំ២០២២ ហើយគោលដៅចម្បងតែមួយគត់ នោះគឺការចាប់យកវត្តមានកាឡាក់ស៊ីឆ្ងាយៗដែលភ្នែកមនុស្ស ឬសូម្បីតែ Hubble មិនអាចមានសមត្ថភាពវែករកឃើញចំពោះតំបន់នោះ។
គួរបញ្ជាក់ថា នៅក្នុងរូបនេះយើងក៏ឃើញមានពន្លឺបែកស្ញាច (spike) ពណ៌ស និងក្រហម ដែលសុទ្ធសឹងជាតារាក្នុងកាឡាក់ស៊ី Milky Way យើងផងដែរ ព្រោះជាធម្មតានៅពេលយើង Zoom ទៅរកទីតាំងណាឆ្ងាយៗក្នុងចក្រវាល យើងមិនអាចគេចផុតឡើយក្នុងការថតដោយ ផ្កាយ និងពពកធូលីនៅក្នុងកាឡាក់ស៊ីរបស់យើងនេះ។ យ៉ាងណាក៏ដោយ រូបភាពដើមរបស់ James Webb មិនមែនចេញមកយ៉ាងស្អាតភ្លឹងបែបនេះឡើយ ព្រោះទម្រាំចេញជារូបភាពចុងក្រោយ ១សន្លឹកនេះ គឺត្រូវការការរួមបញ្ជូលគ្នាពីរូបភាពខ្ទង់ ៨០០សន្លឹក (ស-ខ្មៅ) ហើយនិងឆ្លងកាត់ ការកែតម្រូវចេញជាពណ៌ឲ្យត្រឹមត្រូវតាមកម្រិតប្រវែងរលក (wavelength) នៃគ្រប់ពន្លឺទាំងអស់ក្នុងរូបភាព៕
ប្រែសម្រួល៖ ឥន្ទ វត្ថា (Cambo Space), ប្រភព៖ Live Science via The journal Astronomy & Astrophysics (ថ្ងៃចន្ទ ទី១១ ខែសីហា ឆ្នាំ២០២៥)