(អាមេរិក)៖ ភ្នាក់ងារអវកាស NASA ធ្លាប់ត្រូវបានចោទប្រកាន់ពីករណីលាក់បាំងមហាជនដ៏ធំមួយ ពាក់ព័ន្ធនឹងការគម្រាមកំហែងពីសំណាក់អាចម៍ផ្កាយយក្ស ដែលត្រូវគេកំណត់ថា នឹងហោះកាត់ផែនដីក្នុងល្បឿនជាង ៩៦,៦០០គីឡូម៉ែត្រក្នុងមួយម៉ោង។ នេះបើតាមការចេញផ្សាយដោយ សារព័ត៌មាន Express នៅព្រឹកថ្ងៃព្រហស្បតិ៍ ទី២៨ ខែធ្នូ ឆ្នាំ២០១៧។
ដុំថ្មអវកាសខាងលើ ដែលមានមុខកាត់ប្រវែងជាង ០២គីឡូម៉ែត្រ ត្រូវបានគេស្គាល់ថា 2002 NT7 និងត្រូវបានប្រទះឃើញជាលើកដំបូងកាលពី ១៥ឆ្នាំមុន។ ភ្លាមៗទីភ្នាក់ងារអវកាសអាមេរិក NASA បាននិយាយថា អាចម៍ផ្កាយនោះមានឱកាស អាចនឹងមកបុកផែនដីនៅខែកុម្ភៈ ឆ្នាំ២០១៩ ប៉ុន្តែបានដកសេចក្តីថ្លែងការណ៍ផ្លូវការរបស់ខ្លួនវិញ នៅប៉ុន្មានថ្ងៃក្រោយ។
កាលនោះសេចក្តីថ្លែងការណ៍របស់ NASA បានបញ្ជាក់ថា វាមានឱកាសដ៏តិចតួចស្តួចស្តើងមួយ ដែល 2002 NT7 នឹងប៉ះទង្គិចជាមួយរបស់ភពយើង នាថ្ងៃទី០១ ខែកុម្ភៈ ឆ្នាំ២០១៩ ជាមួយកម្លាំងស្មើនឹងគ្រាប់បែកបរមាណូទូទៅចំនួន ៣០លានគ្រាប់។ ការគណនានេះ មានភាពច្បាស់លាស់ជាខ្លាំង រហូតដល់ថ្នាក់ក្រុមអ្នកវិទ្យាសាស្រ្តបានកំណត់ម៉ោង នៃការមកដល់របស់អាចម៍ផ្កាយមរណៈនេះ ថែមទៀតផង។
យ៉ាងណាមិញ ០៤ថ្ងៃកន្លងផុតទៅ អង្គការ NASA ក៏បានលុបសេចក្តីថ្លែងការណ៍របស់ខ្លួនចោលវិញ ដោយនិយាយថា ទីភ្នាក់ងារបានធ្វើការវាយតម្លៃ ក៏ដូចជាគណនាឡើងវិញទៅលើអាចម៍ផ្កាយ ហើយមើលឃើញថា វាពុំមែនជាគ្រោះថ្នាក់ទៀតឡើយ។ ជុំវិញរឿងនេះ មនុស្សមួយចំនួន បានអះអាងថា ការផ្លាស់ប្តូរពាក្យសម្តីយ៉ាងឆាប់រហ័សបែបនេះ គឺជាផ្នែកមួយនៃការលាក់បាំងចំពោះមហាជន ខណៈ NASA ផ្ទាល់បានចចេសថា វាគ្រាន់តែជាការគុណគូរគណនាឡើងវិញប៉ុណ្ណោះ។
គួរជម្រាបថា ប្រសិនបើដុំអាចម៍ដ៏ធំបែបនេះ នឹងពិតជាមកបុកផែនដីមែននោះ វានឹងជះឥទ្ធិពលពាសពេញពិភពលោកតែម្តង។ បើតាមសេចក្តីរាយការណ៍របស់សារព័ត៌មាន Dailystar ថ្មអវកាសដែលមានទំហំធំ និងល្បឿនដូចនឹង 2002 NT7 អាចធ្វើឲ្យទ្វីបមួយបាត់ស្រមោលពីលើផ្ទៃផែនដីបាន ហើយបង្កឲ្យមានបញ្ហាបម្រែបម្រួលអាកាសទ្រង់ទ្រាយធំទៀតផង។ នាពេលនោះឱកាសនៃការប៉ះទង្គិចរវាងអាចម៍ផ្កាយ 2002 NT7 និងផែនដី ត្រូវគេរាយការណ៍ថា គឺ០១ លើ ៧៥,០០០ ហើយនៅតែបន្តកើនឡើងខ្ពស់។
2002 NT7 ត្រូវគេព្យាករណ៍ថា នឹងមកបុកផែនដីនៅក្នុងល្បឿនជាង ២៥គីឡូម៉ែត្រក្នុងមួយវិនាទី ជាមួយកម្លាំងនៃគ្រាប់បែកនុយក្លេអ៊ែរ ដែលទម្លាក់នៅទីក្រុងហ៊ីរ៉ូស៊ីម៉ាដល់ទៅ ៣០លានគ្រាប់ ពោលគឺស្មើនឹង ៤៥០លានតោន នៃរំសេវ TNT។ ខណៈដែល NASA បានប្រែសម្តីវិញថា អាចម៍ផ្កាយនេះលែងបង្កការគម្រាមកំហែងដល់ផែនដីហើយនោះ អ្នកខ្លះជឿថា វាគឺជាការព្យាយាមបង្ការកុំឲ្យមានភាពចលាចលទ្រង់ទ្រាយធំទៅវិញទេ។
គួរបញ្ជាក់បន្ថែមថា ការមូលមតិគ្នាបែបវិទ្យាសាស្រ្តនាពេលបច្ចុប្បន្ននេះ គឺថាអាចម៍ផ្កាយ 2002 NT7 នឹងមិនមកប៉ះជាមួយផែនដីនាខែកុម្ភៈ ឆ្នាំ២០១៩ឡើយ ដោយវាគ្រាន់តែនឹងធ្វើដំណើរកាត់ភពរបស់យើងប៉ុណ្ណោះ នាថ្ងៃទី១៣ ខែមករា ឆ្នាំ២០១៩។ ម៉្យាងវិញទៀត តាមពិតទៅបើតាម NASA អាចម៍ផ្កាយ 2002 NT7 នឹងហោះមកនៅចម្ងាយ ៦១លានគីឡូម៉ែត្រ ឯណោះពីផែនដី ដែលឆ្ងាយជាងភពអង្គារ (Mars) ទៅទៀត៕