(បរទេស)៖ តេឡេស្កូបអវកាស James Webb របស់អង្គការ NASA ESA និង CSA ទើបតែបានរកឃើញកាឡាក់ចំនួន ៧ ដែលត្រូវបានគេអះអាងថា បានកកើតឡើងប្រមាណ ៦៥០លានឆ្នាំ ក្រោយព្រឹត្តិការណ៍ Big Bang (Big Bang ជាបន្ទុះដែលបង្កើតចក្រវាលទាំងមូលនេះឡើង កាលពី ១៣.៨ពាន់លានឆ្នាំមុន)។
ពួកវាត្រូវចាត់ទុកជាកាឡាក់ស៊ីដំបូងៗបំផុត ដែលត្រូវបានរកឃើញតាមរយៈការអង្កេត ពន្លឺក្រហមអាំងហ្វ្រា (Infrared Light) ដោយឧបករណ៍របស់ James Webb ហើយក៏សុទ្ធតែជាកាឡាក់ស៊ី ស្ថិតនៅក្នុងកញ្ចុំកាឡាក់ស៊ីតែមួយ (Galaxy Cluster) ដែលកំពុងរីកធំធាត់ឡើងផងដែរ។
តាមពិតទៅកាឡាក់ស៊ី ដែលត្រូវបានអង្កេតរកឃើញទាំងអស់នេះ ពីដំបូងឡើយគឺត្រូវបានដាក់ជាបេក្ខភាពឲ្យតេឡេស្កូបអវកាស Hubble អង្កេត ប៉ុន្តែដោយសារតែ Hubble គ្មានសមត្ថភាពអាចអង្កេតពន្លឺក្រហមអាំងហ្វ្រាជិត (near-infrared) ដូច្នេះទោះធ្វើការឆ្លុះឃើញ ក៏មិនចេញលក្ខណៈលម្អិតដូចជា James Webb ពេលនេះដែរ។
គួរបញ្ជាក់ថា ក្រុមតារាវិទូដែលគ្រប់គ្រង James Webb បានប្រើប្រាស់ឧបករណ៍ វែកញែកពណ៌នៃពន្លឺក្រហមអាំងហ្វ្រាជិត NIRSpec (Near-Infrared Spectrograph) ដើម្បីគណនារកចម្ងាយរបស់កាឡាក់ស៊ីទាំងនោះ និងកំណត់ថា ពួកវាស្ថិតនៅក្នុងកញ្ចុំកាឡាក់ស៊ីតែមួយ ដែលកំពុងអភិវឌ្ឍក្រោយព្រឹត្តិការណ៍ Big Bang។ ក្នុងចំណោមកាឡាក់ស៊ីទាំង ៧ នោះ កាឡាក់ស៊ីមួយឈ្មោះ Galaxy YD4 ត្រូវបានគណនាថា មានចម្ងាយឆ្ងាយជាងគេ៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ NASA/ESA/CSA (ថ្ងៃចន្ទ ទី២៤ ខែមេសា ឆ្នាំ២០២៤)