លឺគេល្បីថា Nokia 8 ទំនងជាសញ្ញានៃអធិរាជស្មាតហ្វូន វិលត្រឡប់មកទីផ្សារវិញ! តើវាមានចំណុចអ្វីពិសេសជាងគេ?
(បរទេស)៖ ពិតជាមិនមែនជារឿងងាយឡើយ សម្រាប់ការប្រជ្រៀតចូលទីផ្សារដ៏មហាចង្អៀត ខណៈយក្សធំៗកំពុងរត់ប្រណាំងគ្នាដូចជា Samsung, Apple, Huawei, Xiaomi, និង Oppo ជាដើមនោះ ហើយ Nokia ពិតជាចាំបាច់មិនអាចខ្វះបាន នូវការប្រឹងប្រែងស្រាវជ្រាវឲ្យខ្លាំងមែនទែន ដើម្បីរកឲ្យបានបច្ចេកវិទ្យាថ្មីបំផុត ហើយត្រូវចិត្តអ្នកប្រើប្រាស់ភាគច្រើន។
សម្រាប់ស្មាតហ្វូនស៊េរីថ្មីចុងក្រោយបំផុត គឺ Nokia 8 ដែលនឹងចេញនាពេលឆាប់ៗក្នុងខែកញ្ញា ឆ្នាំ២០១៧ នេះត្រូវបានដាក់ទិសដៅថា នឹងក្រឡុកទីផ្សារស្មាតហ្វូន តាមរយៈបច្ចេកវិទ្យាថ្មីមួយចំនួន ដែលអាចថាប្លែកពីគេ ប៉ុន្តែគេនៅមិនទាន់ដឹងច្បាស់ថា តើវានឹងក្លាយជាភាពចាំបាច់សម្រាប់អ្នកប្រើប្រាស់ ដែលនឹងញ័រខ្លួនចង់បានដែរ ឬមួយក៏យ៉ាងណានោះឡើយ។ បច្ចេកវិទ្យាថ្មីបំផុតនោះគឺ កាម៉េរាភ្លោះបំពាក់បច្ចេកវិទ្យា Len របស់ Carl Zeiss ដែលអាចថតវីដេអូ 4K ជាមួយនឹងសំឡេងវិលជុំ ៣៦០ដឺក្រ និងអាចថតវីដេអូប្លង់ទាំងមុខទាំងក្រោយរួមបញ្ចូលគ្នា ជាវីដេអូតែមួយដោយចែកអេក្រង់ម្ខាងម្នាក់។
សម្រាប់អេក្រង់ IPS LCD 5.3 អ៊ីញ កម្រិតបង្ហាញរូបភាព 2K មិនមែនជារឿងថ្មី ហើយក៏មិនលើសគេដែរ ព្រោះ Sony ឡើងដល់អេក្រង់ 4K ទៅហើយ ប៉ុន្តែអ្វីដែលសំខាន់នោះ គឺក្រុមហ៊ុនអះអាងថា អេក្រង់នេះច្បាស់ល្អ និងស្ទើរតែល្អជាងអេក្រង់ AMOLED មួយចំនួនទៀតផង ពេលមើលក្រោមពន្លឺថ្ងៃ។ សម្រាប់ឈីប Snapdragon 835 គឺវាកប់ទៅហើយដូចជា One Plus 5 និង Xiaomi Mi 6 ប្រើប្រាស់ដែរ ប៉ុន្តែបើសម្រាប់ទៅឆ្នាំ២០១៨ វិញ ក្រុមហ៊ុនដទៃទៀតនឹងលោតឡើងខ្ពស់លើសនេះ ដូចជាឈីប Kirin ផលិតដោយ ក្រុមហ៊ុនយក្ស Huawei ជាដើម។
ស្វែងយល់បន្ថែមសម្រាប់កាម៉េរា គឺ Nokia 8 មានកាម៉េរាភ្លោះ 13 MP, f/2.0, laser និង phase detection autofocus, Carl Zeiss optics, OIS ព្រមទាំង dual-LED Flash ផងដែរ បូកនឹងកាម៉េរាមុខ 13 MP ហើយថាមពលថ្មវិញគឺ 3,090mAh។ សម្រាប់ Spec ទាំងប៉ុន្មាននេះ វានឹងក្លាយជាស្មាតហ្វូនល្អកំពូលមួយ ហើយបើអ្នកទិញ Nokia ក៏ប្រហែលមិនមែនដោយសារតែរឿងលក្ខណៈសម្បត្តិខ្លាំងប៉ុន្មាននោះដែរ តែវាអាចដោយសារអ្នកចង់បាន Brand Nokia ដែលគ្រប់គ្នាធ្លាប់គាំទ្រនេះ មកកាន់នៅក្នុងដៃវិញប៉ុណ្ណោះ។
យោងតាមបច្ចេកវិទ្យាទាំងឡាយ ដែលបំពាក់លើ Nokia 8 ខាងលើនេះ យើងអាចធ្វើការប៉ាន់ស្មានតម្លៃបានហើយ គឺវានឹងមិនក្រោម ៥០០ដុល្លារអាមេរិកនោះឡើយ៕
