ឈ្មោះឡើងឡូយ! ស្មាតហ្វូន «Xiaomi Mi A1» បង្ហាញរូបរាងហើយនៅទីផ្សារឥណ្ឌា ដែលកំពុងមានសក្តានុពលខ្លាំងបំផុត!
(ញូដេលី)៖ ក្រុមហ៊ុនផលិតទូរស័ព្ទដ៏ធំរបស់ប្រទេសចិន Xiaomi បានបង្ហាញស្មាតហ្វូនជំនាន់ចុងក្រោយបំផុតរបស់ខ្លួន មានឈ្មោះថា «Mi A1» នៅក្នុងទីក្រុងញូដេលី នៃប្រទេសឥណ្ឌា ដែលមានបំពាក់នូវកាមេរ៉ាភ្លោះចំនួនពីរ នៅខាងក្រោយ និងដំណើរការដោយប្រព័ន្ធប្រតិបត្តិការ Stock Android ជំនាន់ 7.1.2 Nouget។ នេះបើតាមការដកស្រង់ពីសារព័ត៌មាន Channel News Asia នៅល្ងាចថ្ងៃពុធ ទី០៦ ខែកញ្ញា ឆ្នាំ២០១៧។
Mi A1 មានបំពាក់នូវបន្ទះឈីប Snapdragon 625, អង្គចងចាំ (RAM) ទំហំ 04GB, និងសមត្ថភាពផ្ទុកទិន្នន័យទំហំ 64GB ខណៈផ្ទាំងអេក្រង់របស់វាគឺជាប្រភេទ LCD ដែលទំហំ 5.5អ៊ីញ កម្រិតរូបភាព Full HD 1920×1080 ភិចសែល។ រីឯនៅផ្នែកខាងក្រោយ ក្រៅពីកាមេរ៉ាភ្លោះទាំងពីរគ្រាប់ ដែលមានរូបរាងស្រដៀងនឹងកាមេរ៉ា របស់ត្រូលស្មាតហ្វូតកំពូលរបស់ Xiaomi គឺ Mi 6 នោះ ក៏មានកន្លែងស្កែនម្រាមដៃផងដែរ ស្របពេលដែលនៅក្នុងតួខ្លួនរបស់វា មានផ្ទុកថ្មថាមពល 3,080 mAh ដែលសាកតាមរន្ធប្រភេទ USB-C។
Stock Android មានន័យថា Xioami បានសម្រេចដាក់លក់ស្មាតហ្វូតជាលើកដំបូង ដោយពុំប្រើប្រាស់ស្គីនស្រោបខ្លួន MIUI 9 ឡើយ លើកលែងតែសម្រាប់កម្មវិធីកាមេរ៉ាប៉ុណ្ណោះ។ ម៉្យាងវិញទៀត Mi A1 ក៏ត្រូវបានក្រុមហ៊ុនសន្យាផងដែរថា នឹងតំឡើងជំនាន់ OS (ប្រព័ន្ធប្រតិបត្តិការ) ទៅដល់ Oreo (Android 8.0) ផងដែរនៅត្រឹមចុងឆ្នាំ២០១៧នេះ។
គួរបញ្ជាក់ថា ទូរស័ព្ទ Xiomi Mi A1 មានបីពណ៌សម្រាប់ឲ្យជ្រើសរើសគឺ ខ្មៅ មាស និងផ្កាឈូក និងមានតម្លៃ ២៣៤ដុល្លារនៅឥណ្ឌា។ ដោយឡែក Mi A1 នឹងពង្រីកទៅដាក់លក់បន្ថែមទៀត ទៅតាមទីផ្សារក្នុងប្រទេសចំនួន ៣៧ ផ្សេងទៀតជុំវិញសកលោក ចាប់ពីថ្ងៃទី១២ ខែកញ្ញានេះ៕
