(អាមេរិក)៖ អង្គការអវកាសអាមេរិក NASA កំពុងរៀបចំត្រៀមបាញ់គ្រាប់រ៉ុក្កែតចំនួន ២គ្រឿង ចូលទៅកាន់បេះដូងនៃពន្លឺ Aurora (សំរាំងប៉ូល) ស្ថិតនៅប៉ូលខាងជើងនៃភពផែនដី ដើម្បីស្វែងយល់អំពីអាថ៌កំបាំង ដែលបង្កឲ្យមានបាតុភូតធម្មជាតិដ៏អស្ចារ្យនោះឡើង។ កម្មវិធីសិក្សានេះដឹកនាំដោយតារាវិទូ Stephen Kaeppler មកពីសាកលវិទ្យាល័យ Clemson។
យាន NASA ដែលនឹងត្រូវហោះទៅតាមគ្រាប់រ៉ុក្កែតខាងលើនេះមានឈ្មោះថា Ion-Neutral Coupling (INC) បាននិងកំពុងត្រៀមហោះឡើង តាមរយៈឱកាសចំនួន ២លើក នោះគឺលើកទី១៖ នៅចន្លោះថ្ងៃទី២៣ ខែមីនា ដល់ថ្ងៃទី០១ ខែមេសា ឆ្នាំ២០២២ (កាលពីថ្ងៃទី២៣ ខែមីនា ការបាញ់បង្ហោះត្រូវបានពន្យារពេលវិញ ព្រោះតែអាកាសធាតុមិនល្អ) និងលើកទី២៖ ចាប់ពីថ្ងៃទី៣ ដល់ទី៧ ខែមេសា។
ក្រុមអ្នកវិទ្យាសាស្ត្រដែលចូលរួមក្នុងកម្មវិធីនេះ មានបំណងបញ្ជូនឧបករណ៍ស្ទាបស្ទង់សំខាន់ៗមួយចំនួន ដែលនឹងត្រូវដឹកនាំតាមរយៈគ្រាប់រ៉ុក្កែតទាំងពីរគ្រឿង ចូលទៅកាន់ចំណុចកណ្តាល (បេះដូង) នៃតំបន់កំពុងកើតមានបាតុភូតពន្លឺ Aurora។ ឧបករណ៍ស្ទាបស្ទង់ទាំងនេះ នឹងស្វែងយល់អំពី ខ្យល់, សីតុណ្ហភាព និងសម្ពាធនៃភាគល្អិត ផ្លាស្មា (plasma) ដែលមាននៅក្នុងបណ្តុំនៃពន្លឺ Aurora នៅពីលើតំបន់ប៉ូលខាងជើងភពផែនដីនោះ។
តារាវិទូ Stephen Kaeppler បានលើកជាឧទាហរណ៍យ៉ាងដូច្នេះថា «យើងទាំងអស់គ្នាសុទ្ធតែដឹងថា នៅពេលយើងសង្កៀតបាតដៃទាំងពីរ យូរៗទៅវានឹងឡើងកម្តៅ។ វាជាគោលគំនិតដូចគ្នា គ្រាន់តែពេលនេះយើងត្រូវដោះស្រាយ រវាងឧស្ម័ន និងឧស្ម័នវិញម្តង»។ ការលើកឡើងរបស់លោក Kaeppler គឺចង់សំដៅទៅលើការកកិតនៃភាគល្អិតមកពីព្រះអាទិត្យ ទៅនឹងម៉ូលេគុលនៃបរិយាកាសស្រទាប់លើរបស់ផែនដី នៅត្រង់តំបន់ប៉ូល ដែលនាំឲ្យកើតចេញជាពន្លឺ Aurora នោះឯង។
គួរបញ្ជាក់ថា ក្រុមរ៉ុក្កែតដំបូងនឹងទៅដល់បណ្តុំនៃចំហាយភាគល្អិតចំរុះពណ៌(ពន្លឺ Aurora) ដែលស្ថិតនៅរយៈកម្ពស់ ២៩៩គីឡូម៉ែត្រពីផ្ទៃផែនដី។ បើតាមក្រុមអ្នកវិទ្យាសាស្ត្រ ដំណើរនៃភាគល្អិតបញ្ចេញពន្លឺចំរុះពណ៌របស់បាតុភូត Aurora គឺមិនសូវខុសទៅនឹងកាំជ្រួច ដែលផ្ទុះចេញជាពន្លឺចំរុះពណ៌ នៅលើផ្ទៃមេឃពេលមានបុណ្យទាននោះឡើយ។ រ៉ុក្កែតទាំងនោះ នឹងធ្លាក់មកលើផែនដីវិញភ្លាមៗ ក្រោយពីបានបញ្ជូនឧបករណ៍ស្ទាបស្ទង់ ឡើងទៅដល់រយៈកម្ពស់ដែលបានកំណត់ហើយ៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ Live Science (ថ្ងៃសៅរ៍ ទី២៦ ខែមីនា ឆ្នាំ២០២២)
