កុំទាន់អាលខកចិត្ត! នេះជារូបភាព Jupiter ដែលផ្គុំឡើងពីរូបថតជាងកន្លះលានសន្លឹក!

0 483

(បរទេស)៖ ដើម្បីជាការលួងចិត្តដល់អ្នកខំរង់ចាំតាមដានព្រឹត្តិការណ៍កម្រ តែបែរជាចំពេលអាកាសធាតុមិនអំណោយផងនោះ ពេលនេះយើងខ្ញុំមានរូបថតភពព្រហស្បតិ៍ (Jupiter) មួយសន្លឹក ដែលត្រូវបានផ្តិត និងផ្គុំឡើងពីរូបថត ដ៏ច្រើនសន្លឹកស្ទើរមិនគួរឲ្យជឿ ហើយវាត្រូវបានបញ្ចេញចំឱកាសដែលភពឧស្ម័នយក្សលេខ ១ មួយនេះ គោចរមកកាន់ចំណុចកៀកនឹងភពផែនដីបំផុត មិនធ្លាប់មានក្នុងរយៈពេល ៥៩ឆ្នាំ (៥៩១ លានគីឡូម៉ែត្រពីផែនដី) នៅយប់ថ្ងៃចន្ទ ទី២៦ ខែកញ្ញា ឆ្នាំ២០២២ នេះតែម្តង, ហើយវានឹងកើតឡើងម្តងទៀតរហូតដល់ទៅឆ្នាំ ២១៣៩ ឯណោះ។

កុំទាន់អាលខកចិត្ត! នេះជារូបភាព Jupiter ដែលផ្គុំឡើងពីរូបថតជាកន្លះលានសន្លឹក!
រូបភាពភពព្រហស្បតិ៍ (Jupiter) ថតដោយលោក Andrew McCarthy (ផ្គុំចេញពីរូបថត ៦០០,០០០សន្លឹក)

បើយើងមើលមួយភ្លែត រូបមួយសន្លឹកនេះគឺសាមញ្ញៗប៉ុណ្ណោះ ប៉ុន្តែតាមការពិតទៅ វាត្រូវបានផ្គុំឡើងពីរូបថតជាងកន្លះលានសន្លឹក (៦០០,០០០សន្លឹក)។ ហេតុអ្វីក៏ច្រើនដល់ម្លឹង? អ្នកជំនាញថតរូបមួយរូបឈ្មោះ Andrew McCarthy មកពីរដ្ឋ Arizona សហរដ្ឋអាមេរិក បានប្រឹងប្រែងបំពេញកិច្ចការងារនេះ ដើម្បីទទួលបាននូវភាពភពព្រហស្បតិ៍មួយសន្លឹក ដែលប្រកបដោយភាពលម្អិត (detail) ខ្ពស់បំផុត ហើយលោកបានធ្វើរឿងនេះកាលពីយប់ថ្ងៃទី ១៧ ខែកញ្ញា ឆ្នាំ២០២២ ជាពេលដែលភពព្រហស្បតិ៍គោចរមកដល់ ចំណុចកាន់តែកៀកនឹងផែនដីយើងខ្លាំង។

ភពព្រហស្បតិ៍ (Jupiter) ថតដោយ Hubble (រូបភាពពី NASA/ESA)

គួរបញ្ជាក់ថា លោក Andrew McCarthy បានប្រើប្រាស់ពេលពេញមួយយប់ ដើម្បីថតរូបភាពភពព្រហស្បតិ៍ចំនួន ៦០០,០០០សន្លឹក ដោយប្រើប្រាស់តេឡេស្កូបនៅលើដី មានមុខកាត់ ១១អ៊ីញចំនួនមួយគ្រឿង និងកាមេរ៉ាចំនួនមួយគ្រឿងទៀត ដែលមានសមត្ថភាពអាចផ្តិតបានទិដ្ឋភាព នៅទីអវកាសឆ្ងាយៗ។ លោកអ្នកក៏អាចចូលទៅគាំទ្រស្នាដៃរបស់លោក Andrew តាមរយៈគណនី Instagram ឈ្មោះ @cosmic_background និងវែបសាយ https://cosmicbackground.io/ របស់លោកផ្ទាល់ផងដែរ៕

ប្រែសម្រួល៖ ឥន្ទ វុត្ថា (Cambo Space)
ប្រភព៖ SPACE (ថ្ងៃចន្ទ ទី២៦ ខែកញ្ញា ឆ្នាំ២០២២)

Leave A Reply

Your email address will not be published.