នេះជារូបភាពនេប៊ូឡា Horsehead ដែលប្រែជាខ្មែរថា «ក្បាលសេះ» ថតដោយ Hubble

(បរទេស)៖ បណ្តុំពពកធូលី-ឧស្ម័ន នេប៊ូឡា (Nebula) មានឈ្មោះថា Horsehead ដែលបកប្រែជាភាសាខ្មែរថា «ក្បាលសេះ» មានទីតាំងស្ថិតនៅក្នុងតារានិករ អូរ៉ៃអិន (Orion) ហើយវាក៏មានឈ្មោះជាផ្លូវការមួយទៀតថា «Barbard 33» ផងដែរ។

Horsehead មានកម្ពស់ចាប់ពី ៣ – ៤ឆ្នាំពន្លឺ និងត្រូវបានរកឃើញដំបូងកាលពីចុងទសវត្សរ៍ ១៨០០ ដោយវាមានចម្ងាយ ១,៥០០ឆ្នាំពន្លឺពីផែនដីយើង (១ឆ្នាំពន្លឺ = ៩.៤៦ទ្រីលានគីឡូម៉ែត្រ) ប្រការនេះក៏មានន័យថា ពន្លឺរបស់វាត្រូវធ្វើដំណើររយៈពេល ១,៥០០ឆ្នាំ ទើបអាចមកដល់យើងផងដែរ។

រូបភាពថ្មី គុណភាពខ្ពស់ និងស្រស់ស្អាតរបស់ Horsehead Nebula ត្រូវបានថតដោយឧបករណ៍ Wide Field Camera 3 នៅលើតេឡេស្កូបអវកាស Hubble របស់អង្គការ NASA និង ESA ដែលបង្ហាញអំពីបណ្តុំពពកពណ៌ត្នោត និងផ្កាយបញ្ចេញពន្លឺទាំងនៅក្នុង Nebula នេះផង និងនៅខាងក្រោយ (Background) របស់វាផង។

កាលណោះវាត្រូវបានចាត់ទុកជា ការដុសខាត់សមត្ថភាពបន្ថែមដល់ Hubble ប្រកបដោយប្រសិទ្ធភាពខ្ពស់បំផុត តាមរយៈបេសកកម្ម Space Shuttle របស់អង្គការ NASA ជាពិសេសគឺការបំពាក់ឧបករណ៍ថតរូបភាពថ្មីដល់តេឡេស្កូបអវកាសនេះ កាលពីអំលុងឆ្នាំ ២០០៩ គឺ Wide Field Camera 3 នោះឯង៕

ប្រែសម្រួល៖ Cambo Space (ឥន្ទ វុត្ថា)
ប្រភព និង Image Credit៖ NASA/ESA/Hubble Heritage Team