HOT NEWS: តេឡេស្កូប James Webb ផ្តិតបានរូបភាព កាឡាក់ស៊ីឆ្ងាយបំផុតថ្មី១ (មានវីដេអូ)
(បរទេស)៖ តេឡេស្កូបអវកាស James Webb របស់អង្គការ NASA ESA និង CSA ទើបតែផ្តិតបានរូបភាពកាឡាក់ស៊ីឆ្ងាយៗថ្មី ដែលអាចមានអាយុកាលចន្លោះពី ៤៥០លានឆ្នាំ ទៅ ៣៥០លានឆ្នាំ បន្ទាប់ពីព្រឹត្តិការណ៍ ប៊ីកប៊ែង (Big Bang) (ជាបន្ទុះដែលបង្កើតចេញជាចក្រវាលទាំងមូល កាលពី ១៣.៨ពាន់លានឆ្នាំមុន)។ ពួកវាស្ថិតនៅក្នុងបណ្តុំកាឡាក់ស៊ី (Galaxy Cluster) មានឈ្មោះថា Abell 2744។
កាឡាក់ស៊ីដែលត្រូវបានរកឃើញ និងគួរឲ្យចាប់អារម្មណ៍ទាំងនោះមានចំនួន ២ ដោយត្រូវបានដាក់់ឈ្មោះសម្គាល់ឲ្យថា z-10.5 និង z-12.5 ដោយមានអាយុកាល ៣៥០លានឆ្នាំ (z-12.5 ឬ GLASS-z12) ទៅ ៤៥០លានឆ្នាំ (z-10.5) បន្ទាប់ពីព្រឹត្តិការណ៍ Big Bang។
រូបភាពថ្មីៗទាំង ២ នេះត្រូវបានចាត់ទុកជា ការបើកទំព័រដ៏ថ្មីសន្លាងបំផុតនៃវិស័យតារាសាស្ត្រ ព្រោះកាឡាក់ស៊ី ១ ក្នុងចំណោមនោះ គឺ GLASS-z12 ដែលបានកកើតឡើង ៣៥០លានឆ្នាំបន្ទាប់ពី Big Bang ទំនងជាមានផ្ទុកនូវពន្លឺផ្កាយដ៏សែនឆ្ងាយបំផុត (most distant starlight) ដែលយើងមិនធ្លាប់បានឃើញពីមុនមក។
ចំពោះកាឡាក់ស៊ីឆ្ងាយៗបំផុត និងមានពន្លឺភ្លឺមិនធម្មតាទាំង ២ ដែលត្រូវបានបង្ហាញដោយក្រុមការងារគ្រប់គ្រង James Webb នៅថ្ងៃទី១៧ ខែវិច្ឆិកា ឆ្នាំ២០២២ នេះ នឹងជួយឲ្យយើងយល់ដឹងកាន់តែស៊ីជម្រៅបន្ថែមទៀត អំពីពពួកតារាដែលបានចាប់កំណើតដំបូងៗ បន្ទាប់ពីបន្ទុះ Big Bang។
គួររំលឹកផងដែរថា បេក្ខភាពកាឡាក់ស៊ីឆ្ងាយៗបំផុតពីមុនគឺ GN-z11 ត្រូវបានថតដោយ Hubble រួមសហការជាមួយ Keck Observatory កាលពីឆ្នាំ ២០១៦ ដោយវាមានអាយុកាល ៤០០លានឆ្នាំបន្ទាប់ពី Big Bang។
ដោយឡែក កាលពីអំលុងខែកក្កដា ឆ្នាំ២០២២ ក្រុមការងារគ្រប់គ្រង James Webb ក៏បានប្រកាសផងដែរពីការរកឃើញកាឡាក់ស៊ីដែលអាចមានវ័យ «ចំណាស់បំផុត» មិនធ្លាប់ត្រូវបានជួបប្រទះ នោះគឺ «១៣.៥ពាន់លានឆ្នាំ» (៣០០លានឆ្នាំបន្ទាប់ពីព្រឹត្តិការណ៍ Big Bang)។ វាត្រូវបានដាក់ឈ្មោះសម្គាល់ថា GLASS-z13 ហើយក៏កំពុងស្ថិតក្នុងការសិក្សាដើម្បីបញ្ជាក់ការពិតនៅឡើយដែរ៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ NASA/ESA/CSA (ថ្ងៃព្រហស្បតិ៍ ទី១៧ ខែវិច្ឆិកា ឆ្នាំ២០២២)