វដ្តព្រះអាទិត្យ «១១ឆ្នាំ» ឈានចូលមកដល់នៅឆ្នាំ២០២៣នេះ ទើបនាំឲ្យមានការជះអណ្តាតភ្លើង និងព្យុះខ្លាំងក្លា (យល់ដឹងឡើងវិញ)
(បរទេស)៖ រយៈពេលជាច្រើនសប្តាហ៍មកនេះ ព្រះអាទិត្យបានឈានចូលវដ្តរបស់ខ្លួន ដែលមានរយៈពេលជាង ១១ឆ្នាំម្តង (Sun Cycle) ឬយើងអាចហៅថា ជាពេលព្រះអាទិត្យភ្ញាក់ពីដំណេក។ ដំណើរនៃការប្រែប្រួលវិលជុំនេះ តែងតែបង្កឲ្យព្រះអាទិត្យ បញ្ចេញនូវព្រឹត្តិការណ៍ខុសធម្មតាដូចជា ការជះចេញនូវអណ្តាតភ្លើង (flare) ច្រើន និងធំធេងជាងឆ្នាំធម្មតា ហើយស្ថានការណ៍បែបនេះ នឹងបញ្ចប់នៅក្នុងរយៈពេល ២-៣ ឆ្នាំទៀតទៅតាមធម្មជាតិ។
![](https://cambospace-world.com/wp-content/uploads/2023/03/New-វដ្ត-1024x576.jpg)
កាលពីថ្ងៃទី២០ ខែមីនា ឆ្នាំ២០២៣ (ម៉ោងនៅអាមេរិក) ព្រះអាទិត្យបានជះចេញនូវអណ្តាតភ្លើង ដែលមានកម្ពស់ស្មើនឹងផែនដីចំនួន ១៤ ដាក់បន្តុបលើគ្នា (ឬស្មើនឹងកម្ពស់ ១៤០,០០០គីឡូម៉ែត្រ) ហើយតំបន់ខ្មៅដែលកើតមានស្របពេលជាមួយគ្នានៅស្រទាប់ Corona នោះ មានវិសាលភាពអាចផ្ទុកភពផែនដីចាប់ពី ២០ – ៣០ ឯណោះ។ ទោះបីជាស្ថានភាពបែបនេះ មានភាពកញ្ជ្រោលខ្លាំងពិតមែន តែក៏ស្ថិតនៅក្នុងការព្យាករណ៍រួចទៅហើយដែរ ពីសំណាក់ក្រុមអ្នកវិទ្យាសាស្ត្រអង្គការ NASA ដែលមានឧបករណ៍តេឡេស្កូប តាមដានសកម្មភាពព្រះអាទិត្យជាប្រចាំ។
![វដ្តព្រះអាទិត្យ «១១ឆ្នាំ» ឈានចូលមកដល់នៅឆ្នាំ២០២៣នេះ ទើបនាំឲ្យមានការជះអណ្តាតភ្លើង (flare) ខ្លាំងក្លា (យល់ដឹង) វដ្តព្រះអាទិត្យ «១១ឆ្នាំ» ឈានចូលមកដល់នៅឆ្នាំ២០២៣នេះ ទើបនាំឲ្យមានការជះអណ្តាតភ្លើង (flare) ខ្លាំងក្លា (យល់ដឹង)](https://cambospace-world.com/wp-content/uploads/2023/03/photo_2023-03-23_19-15-31-1024x538.jpg)
គិតចាប់ពីខែកុម្ភៈ រហូតដល់ខែមីនា ឆ្នាំ២០២៣ នេះ តេឡេស្កូប Solar Dynamics Observatory របស់ NASA បានផ្តិតយកទិដ្ឋភាពជាបន្តបន្ទាប់ នៃសកម្មភាពកញ្ជ្រោលរបស់ព្រះអាទិត្យ បូករួមទាំងព្រឹត្តិការណ៍ជះចេញនូវអណ្តាតភ្លើង ពីស្រទាប់ខូរ៉ូណា (Coronal Mass Ejection ឬ CME) កាលពីថ្ងៃទី២០ ខែមីនា នោះផងដែរ។ យ៉ាងណាក៏ដោយ វាមិនមែនមានន័យថា មនុស្សលោក និងភពផែនដីមិនទទួលរងគ្រោះនោះឡើយ។
តួយ៉ាងការជះចេញនូវ flare ឬ ព្យុះព្រះអាទិត្យ (Solar Storm) តែងតែមានឥទ្ធិពលធ្ងន់ ឬស្រាលមកលើផែនដី និងភពនានាក្នុងប្រព័ន្ធទាំងមូល ដោយអាស្រ័យលើទំហំរបស់ព្រឹត្តិការណ៍នោះ។ សម្រាប់ភពផែនដី Solar Storm ដែលផ្ទុកទៅដោយរលកធាតុវិទ្យុសកម្មដ៏កំណាច អាចបង្កបញ្ហាដល់ផ្កាយរណបនានា (បើធ្ងន់ធ្ងរខ្លាំង គឺអាចបំផ្លាញផ្កាយរណបបាន) និងធ្វើឲ្យដាច់ចរន្តអគ្គិសនីលើភពផែនដីផងដែរ ខណៈប្រព័ន្ធវិទ្យុទាក់ទងនានា នឹងត្រូវកាត់ផ្តាច់ជាបណ្តោះអាសន្ន នៅតំបន់ដែលព្យុះព្រះអាទិត្យបោកចំ។
![](https://cambospace-world.com/wp-content/uploads/2023/03/Z-solar-dark-1024x555.jpg)
គួរបញ្ជាក់ថា វដ្តថ្មីរបស់ព្រះអាទិត្យកំពុងចាប់ផ្តើមនៅក្នុងឆ្នាំ ២០២៣ នេះ ហើយចលនាកញ្ជ្រោលខុសធម្មតានៃព្រះអាទិត្យ នឹងបញ្ចប់នៅឆ្នាំ ២០២៥ ឬ ២០២៦ ខាងមុខ។ ងាកចេញពីព្រឹត្តិការណ៍ដ៏គួរឲ្យភ័យខ្លាចទាំងនោះ ទិដ្ឋភាពដ៏ស្រស់ស្អាតមួយចំនួនក៏តែងតែកើតឡើងដែរ នោះគឺការបង្ហាញវត្តមានរបស់ពន្លឺសំរាំងប៉ូល (Aurora) នៅប៉ូលខាងជើង និងប៉ូលខាងត្បូងផែនដី ដែលកើតចេញពីភាគល្អិតផ្ទុកថាមពលមកពីព្រះអាទិត្យ ធ្វើប្រតិកម្មជាមួយភាគល្អិត នៅក្នុងស្រទាប់បរិយាកាសផ្នែកខាងលើរបស់ផែនដី។
![](https://cambospace-world.com/wp-content/uploads/2023/03/photo_2023-03-23_19-13-38-1024x576.jpg)
ជាការពិត ពន្លឺព្រះអាទិត្យត្រូវការពេល ៨នាទីប៉ុណ្ណោះ ដើម្បីធ្វើដំណើរមកកាន់ផែនដី តែភាគល្អិតវិញគឺត្រូវការពេលយ៉ាងតិច ៣ថ្ងៃ ទើបអាចចល័តមកដល់, ដូច្នេះក្រោយកើតមានព្រឹត្តិការណ៍ CME លើព្រះអាទិត្យរួច ៣ថ្ងៃក្រោយមកទៀត ទើបយើងអាចឃើញពន្លឺ Aurora លើប៉ូលផែនដី។ ដូច្នេះព្រឹត្តិការណ៍ CME កាលពីថ្ងៃទី២០ ខែមីនា នោះនឹងបង្កឲ្យមាន Aurora លើផែនដី នៅថ្ងៃទី ២៣ ឬ ២៤ ខែមីនា ឆាប់ៗខាងមុខនេះ (ម៉ោងនៅអាមេរិក)៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ SPACE/NASA (ថ្ងៃព្រហស្បតិ៍ ទី២៣ ខែមីនា ឆ្នាំ២០២៣)
![480×240 Banner](https://cambospace-world.com/wp-content/uploads/2024/02/cambo-space-donate-1.png)