អន្តរជាតិ និងបច្ចេកវិទ្យាអវកាស និងវិទ្យាសាស្ត្រ

នេះជារូបភាពដ៏អស្ចារ្យនៃ «នេប៊ូឡាក្តាម (Crab Nebula)» ផ្តិតយកដោយ James Webb! (មានវីដេអូ)

By vuthacambospace Last updated Oct 31, 2023

(បរទេស)៖ តេឡេស្កូបអវកាស James Webb របស់អង្គការ NASA ESA និង CSA ទើបតែបានផ្តិតយករូបភាពបន្ថែមនៃ នេប៊ូឡាក្តាម (Crab Nebula) នៅក្នុងទម្រង់ជាពន្លឺក្រហមអាំងហ្វ្រា (Infrared Light) ហើយយើងទាំងអស់គ្នា ពិតជាប្រកែកមិនបានឡើយថា វាមើលទៅអស្ចារ្យ និងប្លែកភ្នែកមិនធ្លាប់មាន បើធៀបនឹងរូបភាពថតដោយតេឡេស្កូបមុនៗ។

Crab Nebula ស្ថិតនៅចម្ងាយខ្ទង់់ ៦,៥០០ឆ្នាំពន្លឺពីផែនដី (១ឆ្នាំពន្លឺ = ៩.៤៦ទ្រីលានគីឡូម៉ែត្រ) ដោយវាគឺជាកាកសំណល់បន្សល់ទុកពីការផ្ទុះ (Supernova) របស់ផ្កាយមួយដួង។ ការអង្កេតដោយទម្រង់ Infrared ទៅលើនេប៊ូឡាមួយនេះ គឺស្ថិតក្នុងគោលដៅសិក្សាស្វែងយល់បន្ថែម អំពីសមាសធាតុផ្សំសំខាន់ៗ និងការប្រែប្រួលនៅក្នុងនោះ ដើម្បីជាប្រយោជន៍ដល់ការសិក្សាអំពី ដំណើរវិវត្តន៍របស់ពពួក Nebula ប្រភេទនេះ។

រូបភាពទី១ នៃ Crab Nebula (Image: NASA, ESA, CSA, STScI, T. Temim (Princeton University)

សម្រាប់រូបភាពទី ១ នេះគឺជាការរួមបញ្ចូលគ្នាដោយ រូបដែលត្រូវបានថតយកដោយ កាមេរ៉ាចាប់យកពន្លឺក្រហមអាំងហ្វ្រាជិត NIRCam (Near-Infrared Camera) និងរូបដែលត្រូវបានផ្តិតដោយ ឧបករណ៍ចាប់យកពន្លឺក្រហមអាំងហ្វ្រាកម្រិតមធ្យម MIRI (Mid-Infrared Instrument)។ លក្ខណៈពិសេសនៃរូបនេះ គឺយើងអាចមើលឃើញនូវ សមាសធាតុផ្សំសំខាន់ៗដូចជា ស្ពាន់ធ័រអ៊ីយ៉ូដួ (ionized sulfur) ដែលមានពណ៌ទឹកក្រូច, ដែកអ៊ីយ៉ូដួ (ionized iron) មានពណ៌ខៀវ, ធូលី (dust) មានពណ៌លឿង ស និងបៃតង, និងការបំភាយនៃភាគល្អិតផ្ទុកបន្ទុកអគ្គិសនី (electrons) ឬយើងហៅថា synchrotron emission ដែលមានពណ៌ស។

នេះជារូបភាពដ៏អស្ចារ្យនៃ «នេប៊ូឡាក្តាម (Crab Nebula)» ផ្តិតយកដោយ James Webb! (មានវីដេអូ) — រូបភាពទី ២ (ឆ្វេង) នៃ Crab Nebula ធៀបនឹងរូបភាពទី ១ (ស្តាំ) (Hubble Image: NASA, ESA, J. Hester, A. Loll (Arizona State University); Webb Image: NASA, ESA, CSA, STScI, T. Temim (Princeton University)

ដោយឡែកសម្រាប់រូបភាពទី ២ វិញគឺត្រូវបានថតយកដោយតេឡេស្កូបអវកាស Hubble កាលពីឆ្នាំ ២០០៥ ក្នុងទម្រង់អុបទិក (Optical Image)។ ក្នុងរូបភាពទាំង ២ ទម្រង់ដោយ Webb ផង និងដោយ Hubble ផង គឺសុទ្ធសឹងតែជាតម្លៃដល់ការសិក្សាស្វែងយល់ អំពីដំណើរវិវត្តន៍នៃ Nebula មួយនេះ នៅក្រោយបន្ទុះស៊ូពើណូវ៉ា ដែលតែងតែជាទីបញ្ចប់របស់ផ្កាយ មានទំហំធំជាងព្រះអាទិត្យយើង៕

ប្រែសម្រួល៖ Cambo Space (ឥន្ទ វុត្ថា)
ប្រភព៖ NASA/ESA/CSA