ផ្កាយដុះកន្ទុយបិសាច (Devil Comet) ដាច់ស្នែងបាត់ហើយ ក្រោយកើតមានករណីផ្ទុះ

(បរទេស)៖ ផ្កាយដុះកន្ទុយខ្នាតធំ និងមានពន្លឺខ្លាំងបំផុតមួយឈ្មោះ 12P/Pons-Brooks ឬដែលគេស្គាល់កន្លងមកនេះថា ផ្កាយដុះកន្ទុយបិសាច (Devil Comet) នោះ ត្រូវបានក្រុមតារាវិទូអះអាងថា បានបាត់បង់ស្នែងរបស់វាហើយ បន្ទាប់ពីករណីផ្ទុះចុងក្រោយបានកើតឡើងនៅលើ វត្ថុអវកាសមានទំហំប៉ុនទីក្រុងមួយនោះ។

តារាវិទូមួយរូបឈ្មោះ Richard Miles ដែលជានាយកនៃសហគមន៍តារាវិទូ ចក្រភពអង់គ្លេស (BAA) បានពន្យល់ថា ស្នែង (horn) របស់ Devil Comet នោះពីដំបូងឡើងបានកកើតឡើង ដោយសារតែលក្ខណៈនៃរូបរាងរបស់វា បូកផ្សំជាមួយនឹងចំហាយទឹកកកឧស្ម័ន និងធូលីដែលជះចេញពីខ្លួនវារបស់វា។

យោងតាមទិន្នន័យថ្មីបានបង្ហាញថា ផ្កាយដុះកន្ទុយ 12P/Pons-Brooks មានមុខកាត់ប្រមាណ ១៧គីឡូម៉ែត្រ ដែលនេះពិតជាធំធេងខ្លាំងណាស់ ឬស្មើនឹងទំហំទីក្រុងមួយទៅហើយ ខណៈវានឹងចល័តមកកាន់ចំណុចកៀកផែនដី (ជាង ២០០លានគីឡូម៉ែត្រ) មិនធ្លាប់មានក្នុងរយៈពេលខ្ទង់ ៧០ឆ្នាំ នៅអំលុងពាក់កណ្តាលខែមេសា ឆ្នាំ២០២៤។

ទោះបីជាចម្ងាយនេះ ឆ្ងាយជាងគម្លាតរវាងផែនដី និងព្រះអាទិត្យទៅទៀត តែក្រុមតារាវិទូនៅតែអះអាងថា វាអាចឲ្យមនុស្សលោកលើផែនដី មើលឃើញដោយភ្នែកទទេ ឬយ៉ាងហោចណាស់ដោយកែវយឺតតូចល្មម ព្រោះពន្លឺរបស់វា នឹងភ្លឺចែងចាំងខ្លាំងណាស់ ក្រោយការគោចរមកកាន់តែកៀកនឹងព្រះអាទិត្យ។

គួរបញ្ជាក់ថា មូលហេតុដែលបានបង្កឲ្យ Devil Comet បាត់បង់ស្នែង (horn) របស់វានោះ គឺក្រោយការកើតមានករណីផ្ទុះដ៏ខ្លាំងក្លាជាលើកទី ៣ កាលពីថ្ងៃទី៣១ ខែតុលា ឆ្នាំ២០២៣ នៅលើតួខ្លួនរបស់វា បន្ទាប់ពីការផ្ទុះដ៏កក្រើកពីរលើកមុន នោះគឺលើកទី ១ កាលពីថ្ងៃទី២០ ខែកក្កដា និងលើកទី ២ នៅថ្ងៃ០៥ ខែតុលា ក្នុងឆ្នាំ២០២៣ ដូចគ្នា ហើយការផ្ទុះនោះទំនងជាបានបង្កការប្រែប្រួលទៅលើផ្ទៃ ឬភ្នំទឹកកក ដែលតែងតែជះចំហាយចេញពីខ្លួនវានោះ។

ដោយឡែក ក្រោយករណីផ្ទុះលើកទី ៣ ខ្លួនរបស់ Devil Comet ក៏ចាប់ផ្តើមបញ្ចេញចំហាយ ឬកន្ទុយពណ៌បៃតង (green) ចេញពីខ្លួនរបស់វាដែរ។ សម្រាប់ពណ៌បៃតង នៃចំហាយរបស់ផ្កាយដុះកន្ទុយនេះ ជាទូទៅគឺបណ្តាលមកពីប្រតិកម្មនៃម៉ូលេគុលកាបូនឌីអាតូមិច (diatomic carbon) ឬគេហៅថា ម៉ូលេគុលកាបូនអាតូម ២ (two atom carbon) ដែលធ្វើប្រតិកម្មជាមួយភាគល្អិតជះចេញពីព្រះអាទិត្យ ស្ថិតនៅតាមគន្លងគោចររបស់ផ្កាយដុះកន្ទុយនោះ៕

ប្រែសម្រួល៖ Cambo Space (ឥន្ទ វុត្ថា)
ប្រភព៖ Live Science (ថ្ងៃពុធ ទី២២ ខែវិច្ឆិកា ឆ្នាំ២០២៣)