ទេសរដ្ឋមន្ត្រី អៀង មូលី៖ ឆ្នាំ២០២៣ មានអ្នកឆ្លងមេរោគអេដស៍ថ្មី ១,២០០នាក់ ខណៈកម្ពុជាមានអ្នកឆ្លងសរុប ៧.៦ម៉ឺននាក់ និងអ្នកមិនទៅទទួលសេវាព្យាបាល ៨,០០០នាក់

(ភ្នំពេញ)៖ លោកទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានថ្លែងបញ្ជាក់ថា តាមតួលេខចុងក្រោយ អ្នកឆ្លងមេរោគអេដស៍ថ្មីនៅកម្ពុជាមានចំនួន ១.២០០នាក់ ក្នុងឆ្នាំ២០២៣ ខណៈដែលនៅកម្ពុជាមានអ្នកឆ្លងមេរោគអេដស៍សរុប ៧៦,០០០ម៉ឺននាក់ ក្នុងនោះមានអ្នកមិនទៅទទួលសេវាព្យាបាល (លាក់មុខ) មានរហូតទៅដល់ ៨,០០០នាក់ ដែលជាអត្រាគួរឱ្យព្រួយបារម្ភ។

លោកទេសរដ្ឋមន្ត្រី អៀង មូលី បានលើកឡើងយ៉ាងដូចនេះនាថ្ងៃទី០៨ ខែសីហា ឆ្នាំ២០២៤នេះ នាឱកាសដែលលោកអញ្ជើញជាអធិបតីបើកសិក្ខាសាលាជាមួយបណ្តាញសារព័ត៌មានស្តីពី ស្ថានភាព និងការចូលរួមឆ្លើយតបទៅនឹងមេរោគអេដស៍និងជំងឺអេដស៍នៅប្រទេសកម្ពុជា ដែលបានរៀបចំឡើងដោយអង្គការមូលនិធិថែទាំសុខភាពអ្នកជំងឺអេដស៍ (AHF) នៅសណ្ឋាគារភ្នំពេញ មានការចូលរួមពីលោកស្រី ឆៃ ច័ន្ទរិទ្ធី សូលីដា រដ្ឋលេខាធិការ និងប្រធានគណៈកម្មការប្រយុទ្ធនឹងជំងឺអេដស៍ក្រសួងព័ត៌មាន លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ី អង្គការមូលនិធិថែទាំសុខភាពអ្នកជំងឺអេដស៍ លោកសាស្ត្រាចារ្យជំនួយ អ៊ុក វិជ្ជា ប្រធានប្រធានមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ និងមានអ្នកសារព័ត៌មាន បណ្តាញការងារ និងអង្គការសង្គមស៊ីវិលជាច្រើនរូបទៀត។

លោកទេសរដ្ឋមន្ត្រី អៀង មូលី បានបន្ថែមទៀតថា កម្ពុជាជាប្រទេសដែលទទួលបាននូវការទទួលស្គាល់ពីអង្គការយូអិនអេដស៍ថា ឈរនៅលំដាប់កំពូល​ក្នុងការឆ្លើយតបនឹងមេរោគអេដស៍ និងជំងឺអេដស៍​ក្នុងតំបន់អាស៊ីប៉ាស៊ីហ្វ៊ិក។ ជោគជ័យរបស់កម្ពុជា គឺដោយសារមានសសរស្តម្ភ៣សំខាន់៖ ភាពជា អ្នកដឹកនាំ ឬភាពជាម្ចាស់, ភាពជាដៃគូ និង ការវិនិយោគ។ នៅក្នុងភាពជាអ្នកដឹកនាំ ឬភាពជាម្ចាស់ រាជរដ្ឋាភិបាលកម្ពុជាបានដាក់ចេញនូវផែនការយុទ្ធសាស្រ្តជាតិក្នុងឆ្លើយតបជាពហុវិស័យ និងផែនទីបង្ហាញផ្លូវឆ្ពោះទៅកាន់ចីរភាពនៃការឆ្លើយតប។

ជាពិសេសក្នុងខែមីនា ឆ្នាំ២០២៤នេះ រាជរដ្ឋាភិបាលបានដាក់ចេញនូវគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ ផងដែរ។ ចំពោះភាពដៃគូ យើងបានសហការ​គ្នាជាមួយម្ចាស់ជំនួយដៃគូអភិវឌ្ឍ អង្គការសង្គមស៊ីវិលធ្វើការឆ្លើយតបព្រមគ្នា។ ចំណែកឯការវិនិយោគវិញ រាជរដ្ឋាភិបាលបានចូលរួមចំណែកទិញ​ឱសថប្រឆាំងនឹងមេរោគអេដស៍តាំងពីឆ្នាំ២០១៥មក ព្រមទាំងផ្តល់ការគាំទ្របុគ្គលិកជាប់កិច្ចសន្យាផងដែរ។

លោកទេសរដ្ឋមន្ត្រី អៀង មូលី បានបញ្ជាក់ទៀតថា តាមរយៈការចូលរួមក្នុងវេទិកាអន្តរជាតិក្នុងខែមិថុនា និងកក្កដាកន្លងទៅថ្មីៗនេះ កម្ពុជាបានបង្ហាញជូនអង្គការយូអិនអេដស៍ពីគោលនយោបាយជាតិ​បញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ ដែលបានដាក់ចេញដោយកិច្ចប្រជុំពេញអង្គគណៈរដ្ឋមន្ត្រី នាថ្ងៃទី១៥ ខែមីនា ឆ្នាំ២០២៤កន្លងទៅ។ ទន្ទឹមនឹងនេះ អង្គការយូអិនអេដស៍បានទទួលស្គាល់ថា កម្ពុជាជាប់ចំណាត់ថ្នាក់លេខ១ នៅអាស៊ីប៉ាស៊ីហ្វ៊ិក ក្នុងការឆ្លើយតបនឹងមេរោគអេដស៍ និងជំងឺអេដស៍ផងដែរ។ ក្នុងនោះគោលដៅ ៩៥-៩៥-៩៥ កម្ពុជាសម្រេចបាន ៨៩-៩៨-៩៨។

នាឱកាសនោះដែរលោកទេសរដ្ឋមន្ត្រី អៀង មូលី ក៏បានស្នើអ្នកសារព័ត៌មាន និងសិក្ខាកាមបន្តចូលរួមផ្សព្វផ្សាយឱ្យកាន់តែសកម្មអំពីហានិភ័យនៃមេរោគអេដស៍, ចូលរួមផ្សព្វផ្សាយលើកទឹកចិត្តឱ្យអ្នកសង្ស័យ​ទៅធ្វើតេស្តរកមេរោគអេដស៍, ចូលរួមផ្សព្វផ្សាយពីរឿងរ៉ាវជោគជ័យនៃគ្រួសារដែលរងគ្រោះដោយសារមេរោគអេដស៍ និងចូលរួមលុបបំបាត់ការមាក់ងាយ និងរើសអើងលើគ្រប់ទម្រង់ ភេទ អ្នកផ្ទុកមេរោគអេដស៍ និងអ្នកជំងឺអេដស៍។

បើតាមការបញ្ជាក់ពីលោកវេជ្ជបណ្ឌិត ឈឹម សារ៉ាត់ ប្រទេសកម្ពុជាត្រូវបានទទួលស្គាល់ជាប្រទេសដែលទទួលបានជោគជ័យក្នុងកាងារប្រយុទ្ធនឹងជំងឺអេសដ៍ដែលក្នុងនោះ ៩០% នៃអ្នកផ្ទុកមេរោគអេដស៍​កំពុងទទួលបានការព្យាបាលដោយថ្នាំប្រឆាំងមេរោគអេដស៏ តែចំនួននៃការឆ្លងមេរោគអេដស៍ថ្មី ជាពិសេសក្នុងចំណោមយុវជនវ័យក្មេង និងការស្លាប់ដោយសារជំងឺអេដស៍នៅតែជាការព្រួយបារម្ភ ដែលយើងទាំងអស់គ្នាត្រូវ ផ្តោតការយកចិត្តទុកដាក់ និងចូលរួមប្រយុទ្ធទប់ស្កាត់ឱ្យសកម្មបំផុត។ ការរើសអើង និងការមាក់ងាយនៅគ្រប់ទម្រង់ ចំពោះអ្នករស់នៅជាមួយមេរោគអេដស៍ និងក្រុមប្រឈមមុខនៅតែ មានបន្ត ដែលជាឧបសគ្គចម្បងសម្រាប់ការឆ្លើយតបនឹងមេរោគអេដស៍ផងដែរ៕