ប្រទេសទាំង ១០ នេះមានផ្ទៃដីធំណាស់ តែអត់មានព្រំដែនជាប់សមុទ្រទេ! តើធំដល់កម្រិតណាទៅ?
(បរទេស)៖ សម្រាបប្រទេសមួយ ដែលអាចហៅថា Landlocked គឺជាជាបណ្តាប្រទេសនៅជុំវិញពិភពលោក ដែលមានព្រំដែនត្រូវហ៊ុនព័ទ្ធទាំងស្រុង ដោយប្រទេសដទៃៗទៀត ពោលគឺប្រទេសទាំងនោះ ពុំមានច្រកព្រំដែនភ្ជាប់ទៅនឹងដែនសមុទ្រនោះឡើយ។ ដោយឡែក ប្រទេសមួយចំនួនទៀត ទោះបីជាមានសមុទ្រក៏ដោយ នៅតែត្រូវចាត់ទុកថា ប្រទេស Landlocked ដដែល ប្រសិនបើសមុទ្រទាំងនោះ មិនផ្តល់ការចេញចូលទៅកាន់មហាសមុទ្របើកចំហ ណាមួយដដែលទេនោះ។
សព្វថ្ងៃមានវត្តមានប្រទេសចំនួន ៤៤ នៅលើពិភពលោក ដែលពុំមានចក្រចេញចូលទៅកាន់សមុទ្របើកចំហឡើយ។ នៅទ្វីបអាមេរិកខាងជើង និងទ្វីបអូស្រ្តាលី គឺពុំមានវត្តមាននៃប្រទេស Landlocked ឡើយ ខណៈប្រទេសគ្មានព្រំដែនសមុទ្រភាគច្រើន ពោលគឺដល់ទៅ ១៨ប្រទេស ស្ថិតនៅទ្វីបអាហ្រ្វិក។ ចំណែកនៅទ្វីបអឺរ៉ុបវិញ គឹមាន ១៣ប្រទេស និងនៅទ្វីបអាស៊ីមាន ១២ប្រទេស ស្របពេលដែលទ្វីបអាមេរិកខាងត្បូង មានត្រឹម ០២ប្រទេស។
ខាងក្រោមនេះ គឺជាបញ្ជីនៃប្រទេសគ្មានព្រំដែនជាប់សមុទ្រ ដ៏ធំជាងគេទាំង ១០ នៅលើពិភពលោក៖
១. កាហ្សាក់ស្ថាន គឺជាប្រទេស Landlocked ដ៏ធំមានគេបង្អស់ ដែលមានផ្ទៃដីទំហំសរុប ២,៧២៤,៩០០គីឡូម៉ែត្រក្រឡា ហើយវាត្រូវហ៊ុមព័ទ្ធដោយប្រទេសចំនួន ០៥ រួមមាន ចិន, កៀរហ្សីស៊ីស្ថាន (Kyrgystan), រុស្ស៊ី, តួកមេនីស្ថាន (Turkmenistan), និង អូបេគីស្ថាន។
២. ម៉ុងហ្គោលី គឺជាប្រទេស Landlocked ដ៏ធំទី០២បន្ទាប់ពីកាហ្សាក់ស្ថាន ដែលមានផ្ទៃដីទំហំ ១,៥៦៦,៥០០គីឡូម៉ែត្រក្រឡា ហើយវាត្រូវបានហ៊ុមព័ទ្ធដោយប្រទេសរុស្ស៊ី និង ចិនប៉ុណ្ណោះ ។
៣. ឆាដ គឺជាប្រទេស Landlocked ធំទី០៣ ដែលមានទំហំ ១,២៨៤,០០០គីឡូម៉ែត្រក្រឡា និងហ៊ុមព័ទ្ធដោយ លីប៊ី, ស៊ូដង់, សាធារណរដ្ឋអាហ្រ្វិកកណ្តាល, កាមេរូន, នីហ្សេរីយ៉ា, និង នីហ្សេ។
៤. នីហ្សេ គឺជាប្រទេស Landlocked ដ៏ធំលំដាប់ថ្នាក់ទី០៤ ដែលមានផ្ទៃដីលាតសន្ធឹងទំហំ១,២៦៧,០០០គីឡូម៉ែត្រក្រឡា និងស្ថិតនៅចន្លោះ អាល់ហ្សេរី, ប៊ីនីន (Benin), ប៊ើគីណា ហ្វាសូ (Burkina Faso), ឆាដ (Chad), លីប៊ី, ម៉ាលី, និង នីហ្សេរីយ៉ា។
៥. ម៉ាលី គឺជាប្រទេស Landlocked ខ្នាតធំទី០៥ ដែលមានទំហំ ១,២៤០,១៩២គីឡូម៉ែត្រក្រឡា និងហ៊ុមព័ទ្ធដោយ អាល់ហ្សេរី, ប៊ើគីណា ហ្វាសូ (Burkina Faso), កូឌីវ័រ (Cote d’ lvoire), ហ្គីណេ (Guinea), មូរីតានា (Mauritania), នីហ្សេ, និង សេនីហ្កាល់។
៦. អេត្យូពី គឺជាប្រទេស Landlocked ធំទី០៦ ដែលមានផ្ទៃដីទំហំ ១,១០៤,៣០០គីឡូម៉ែត្រក្រឡា និងហ៊ុមព័ទ្ធដោយជីប៊ូទី, អេរីទ្រា (Eritrea), កែនយ៉ា, សូម៉ាលី, និង ស៊ូដង់។
៧. បូឡាវី ដែលមានទំហំ ១,០៩៨,៥៨១គីឡូម៉ែត្រក្រឡា គឺជាប្រទេស Landlocked ធំជាងគេបង្អស់ នៅក្រៅក្រុមទ្វីបអាស៊ី និងអាហ្រ្វិក និងមានប្រទេសសរុបចំនួន ០៥ នៅព័ទ្ធជុំវិញ រួមមានដូចជា អាហ្សង់ទីន ប្រេស៊ីល ឈីលី ប៉ារ៉ាហ្កាយ និង ប៉េរូ។
៨. ហ្សាមបៀ ជាមួយផ្ទៃដីទំហំ ៧៥២,៦១២គីឡូម៉ែត្រក្រឡា ដែលឈរនៅលេខរៀងទី០៨ ស្ថិតនៅចន្លោះប្រទេសអាហ្រ្វិកចំនួន០៨ រួមមាន អាន់ហ្កូឡា (Angola), សាធារណរដ្ឋប្រជាធិបតេយ្យកុងហ្គោ, ម៉ាឡាវី (Malawi), ម៉ូហ្សំប៊ីក (Mozambique), ណាម៊ីបៀ (Namibia), តង់ហ្សានី, ហ្ស៊ីមបាវេ, និង បូតស្វាណា (Botswana)។
៩. អាហ្វហ្គានីស្ថាន ដែលជាប្រទេស Landlocked ធំទី០៩ លើលោក មានផ្ទៃដី ៦៥២,២៣០គីឡូម៉ែត្រក្រឡា ត្រូវហ៊ុមព័ទ្ធដោយចិន, ប៉ាគីស្ថាន, តាជីគីស្ថាន, តួកមេនីស្ថាន (Turkmenistan), អូបេគីស្ថាន, និង ឥណ្ឌា។
១០. ចុងក្រោយ សាធារណរដ្ឋអាហ្រ្វិកកណ្តាល គឺជាប្រទេស Landlocked ដ៏ធំទី១០ ដែលមានទំហំ ៦២២,៩៨៤គីឡូម៉ែត្រក្រឡា ដោយប្រទេសនេះត្រូវបានហ៊ុមព័ទ្ធដោយប្រទេសអាហ្រ្វិកចំនួន ០៦ផ្សេងទៀត រួមមាន កាមេរូន, ឆាដ, ស៊ូដង់, ស៊ូដង់ខាងត្បូង, សាធារណរដ្ឋប្រជាធិបតេយ្យកុងហ្គោ និងសាធារណរដ្ឋកុងហ្គោ៕
