អស្ចារ្យមែន! តេឡេស្កូបយក្សរបស់ចិន រកឃើញតារា Pulsars ចំនួន ១១ បន្ថែមទៀត!
(ប៉េកាំង)៖ ក្រុមអ្នកវិទ្យាសាស្ត្រចិនបានអះអាងថា ចានតេឡេស្កូបយក្សដែលមានប្រវែងរហូតដល់ទៅ ៥០០ម៉ែត្រ ធំជាងគេបង្អស់នៅលើពិភពលោកនោះ (FAST) បានរកឃើញតារា Pulsars ចំនួន ១១ ថ្មីបន្ថែមទៀត។ នេះបើតាមសារព័ត៌មាន ស៊ីនហួរ ដកស្រង់សេចក្តីប្រកាស ពីក្រុមអ្នកឃ្លាំមើលតារាសាស្ត្រជាតិចិន (NAOC) នៅថ្ងៃអង្គារ ទី១៣ ខែមីនា ឆ្នាំ២០១៨។
គិតចាប់តាំងពីតេឡេស្កូប FAST ចាប់ដំណើរការកាលពីខែកញ្ញា ឆ្នាំ២០១៦ វាបានរុករកឃើញតារា Pulsars សរុបចំនួន ៥១ ហើយ ដែលត្រូវបានបញ្ជាក់ថា ជាតារាប្រភេទ Pulsars យ៉ាងពិតប្រាកដ ខណៈចំនួន ១១ ក្នុងចំណោមនេះ ត្រូវបានក្រុមអង្កេតនៅតាមបណ្តាប្រទេសនានា ទទួលស្គាល់ផងដែរ។ Pulsars គឺជាពពួកតារា ឬផ្កាយ ដែលបញ្ចេញថាមពលខ្លាំងបំផុត ដែលបញ្ចេញកាំរស្មីអេឡិចត្រូម៉ាញេទិច ចេញពីប៉ូលទាំងពីររបស់វា (សកម្មភាពដូចគេគ្រវីខ្សែតី)។
យោងតាមលោក Zhang Pei អ្នកវិទ្យាសាស្ត្រនៃ NAOC តារា Pulsars ជាមួយនឹងដង់ស៊ីតេ និងថាមពល គឺត្រូវបានចាត់ទុកជាទីកន្លែងបញ្ចេញថាមពលដ៏ខ្លាំងមហិមា ដែលគ្មានអ្វីអាចជំនួសបាននោះឡើយ រហូតដល់វាអាចយកមកជំនួសជាថាមពល ដើម្បីបង្វែទិសដៅផ្កាយរណបណាមួយ បានទៀតផង។
គួរបញ្ជាក់បន្ថែមទៀតថា ចានតេឡេស្កូបយក្ស FAST មានវិសាលភាពប៉ុនទីលានបាត់ទាត់ចំនួន ៣០ រួមបញ្ចូលគ្នា ដែលវាមានតួនាទីសំខាន់ នៅក្នុងការអង្កេតរកតារា Pulsar នោះតែម្តង ស្ថិតនៅក្នុងខេត្តកួយចូវ ភាគនិរតីប្រទេសចិន។ FAST ពិតជាមានសមត្ថភាពនៅក្នុងការរុករកម៉ូលេគុលឆ្លងប្រព័ន្ធផ្កាយ និងរលកសញ្ញានៃទំនាក់ទំនងឆ្លងកាត់ប្រព័ន្ធផ្កាយផងដែរ។
បញ្ជាក់ចំណុចសំខាន់៖ តារា Pulsar គឺជាពួកផ្កាយណឺត្រុង ឬ កូនផ្កាយស ដែលមានទំនាញខ្លាំង និងរង្វិលជុំយ៉ាងលឿន ព្រមទាំងមានបញ្ចេញកាំរស្មីវិទ្យុសកម្ម នៃអេឡិចត្រូម៉ាញេទិច ដ៏ខ្លាំងក្លាផងដែរ៕
