NASA បញ្ជូនឧបករណ៍ពិសេសតូចមួយ ឡើងទៅកាន់ស្ថានីយអវកាស ISS ដើម្បីសិក្សាពីចលនាអាតូម…
(អាមេរិក)៖ តាមរយៈការបាញ់បង្ហោះឧបករណ៍ពិសោធន៍មួយចំនួន ទៅកាន់ស្ថានីយអវកាសអន្តរជាតិ ISS នាដើមសប្តាហ៍នេះ អ្នកវិទ្យាសាស្រ្តរបស់អង្គការ NASA នឹងអាចបង្កើតលក្ខខណ្ឌសីតុណ្ហភាពមួយ ដែលត្រជាក់ជាងទីអវកាសដល់ទៅ ១០ពាន់លានដង ដើម្បីផ្តោតការសិក្សាស្រាវជ្រាវទៅលើប្រតិកម្ម Quantum ដ៏ចម្លែករបស់អាតូម។ នេះបើតាមការដកស្រង់ការផ្សាយចេញពីវែបសាយ Space.com នៅរសៀលថ្ងៃចន្ទ ទី២១ ខែឧសភា ឆ្នាំ២០១៨។
Cold Atom Laboratory ឬ CAL គឺប្រៀបដូចជាមន្ទីរស្រាវជ្រាវរូបវិទ្យាដ៏តូចមួយ ដែលមានទំហំប៉ុន្មានធុងទឹកកកប៉ុណ្ណោះ ដោយវាត្រូវបានរចនាឡើងដោយមន្ទីរពិសោធន៍ Jet Propulsion Laboratory (JPL) របស់ NASA នៅរដ្ឋកាលីហ្វរញ៉ា។ CAL មានសមត្ថភាពធ្វើឲ្យបណ្តុំពពករបស់អាតូមចុះត្រជាក់បាន តាមរយៈការប្រើប្រាស់កាំរស្មីឡាស៊ែរ និងកម្លាំងម៉ាញេទិចលើស្ថានីយ ISS នៅត្រឹមកម្រិតដ៏សែនទាបបំផុត តាមតែអាចធ្វើទៅបាន។
នៅក្នុងការពិសោធន៍លើស្ថានីយអវកាសអន្តរជាតិ ពពកអាតូចដ៏ត្រជាក់ទាំងនេះ នឹងត្រូវគេបញ្ចុះសីតុណ្ហភាពឲ្យធ្លាក់នៅក្បែរកម្រិតដែលគេហៅថា Absolute Zero គឺប្រហាក់ប្រហែលនឹងដក២៧៣អង្សាសេ។ ពពកទាំងនេះ ដែលត្រូវគេស្គាល់ Bose-Einstein Condensates (BECs) មានផ្ទុកនូវអាតូចដែលត្រជាក់ៗ និងធ្វើចលានាយឺតមែនទែន។
នៅក្រោមកម្លាំងទំនាញរបស់ផែនដី អ្នកវិទ្យាសាស្រ្តពុំអាចបង្អង់ល្បឿនធ្វើចលនានៃ អាតូមទាំងនោះដែលស្ថិតក្នុង BEOs ដែលធ្វើការវិត្តន៍ដោយសេរី ឲ្យបានយឺតល្មមគ្រប់គ្រាន់ ដើម្បីឲ្យក្រុមរូបវិទូអង្កេតស្វែងយល់ពីពួកវា បានលើសពីមួយវិនាទីឡើយ។ ដូច្នេះហើយអ្នកវិទ្យាសាស្រ្តមិនងាយនឹងមានឱកាស ធ្វើការសិក្សាទៅលើបុគ្គលិកលក្ខណៈនៃ Quantum របស់ពួកវានោះទេ។
យ៉ាងណាមិញ នៅលើស្ថានីយអវកាស ISS ដែលស្ថិតក្រោមបរិស្ថាននៃការគ្មានកម្លាំងទំនាញវិញនោះ អ្វីៗគឺខុសឆ្ងាយពីផែនដី។ ដោយពុំមានទំនាញផែនដីជាឧបសគ្គ អាតូមទាំងនេះអាចឲ្យគេបង្អង់ល្បឿនរបស់ពួកវាបាន តាមរយៈការប្រើប្រាស់ឡាស៊ែរ និងកម្លាំងម៉ាញេទិច នៅក្នុងប្រអប់មួយដែលមានទំហំប៉ុនធុងទឹកកកនោះ។
គួរជម្រាបថា តាមរយៈការប្រើប្រាស់ CAL ដើម្បីសិក្សាទៅលើសកម្មភាព Quantum របស់អាតូម ក្រុមអ្នកវិទ្យាសាស្រ្តផ្នែករូបវិទ្យា នឹងអាចបង្កើនការស្វែងយល់អំពីរបៀបធ្វើប្រតិកម្មរបស់អាតូម នៅក្រោមលក្ខខណ្ឌសីតុណ្ហភាពដែលត្រជាក់បែបនេះ៕
