ឧទ្យានដូចក្នុងរឿង «Star Wars» ជិតក្លាយជាការពិត! នេះជាក្តីសុបិន្តដែលមនុស្សចង់ឃើញ…
(អាមេរិក)៖ ឧទ្យានរបស់ Disney ដើម្បីបំពេញទៅតាមអ្នកស្រមៃ ចង់ឃើញទិដ្ឋភាពពិតៗ នៃភាពយន្តអវកាស Star War នោះកាន់តែខិតជិតទៅរកការពិតមែនទែនហើយ ព្រោះសកម្មភាពសាងសង់ គឺកំពុងដុតដៃដុតជើង ដើម្បីឈានទៅរកការសម្រេចជាស្ថាពរ។ នេះបើតាមការចេញផ្សាយដោយ សារព័ត៌មាន Space ដែលត្រូវបានដកស្រង់នៅយប់ថ្ងៃចន្ទ ទី១៨ ខែមិថុនា ឆ្នាំ២០១៨។
នៅក្នុងឱកាសនៃការបើកបង្ហាញការដ្ឋានកំពុងសាងសង់ តារាសម្តែង និងជាតួសំខាន់ក្នុងភាពយន្ត Star Wars គឺលោក Warwick Davis ក៏បានបង្ហាញវត្តមានរង់ចាំទទួលភ្ញៀវចូលមកឧទ្យាន Star Wars កំពុងសាងសង់ ដែលបានគេដាក់រហស្សនាមថា «ឧទ្យាន Star Wars បទពិសោធន៍នៃជីវិតដ៏រំភើបពិតៗ» នេះផងដែរ។ សម្រាប់ឧទ្យាន Disney នេះនឹងត្រូវដាក់ឲ្យដំណើរការជាផ្លូវការ នៅឆ្នាំ២០១៩ខាងមុខ។
ឧទ្យាន Star Wars របស់ Disney នឹងក្លាយជាទីលានមួយធំធេងផ្សេងទៀត ដែលត្រូវបានបន្ថែមទៅក្នុងសួនរបស់ខ្លួន ដូច្នេះវានឹងក្លាយជាកន្លែងដែលទាក់ទាញខ្លាំងសម្រាប់ក្មេងៗ ជាពិសេសយុវវ័យដែលស្រឡាញ់ ទិដ្ឋភាពក្នុងខ្សែភាពយន្ត Star Wars និងអ្នកដែលស្រឡាញ់ទិដ្ឋភាព នៃកាឡាក់ស៊ី ភព ផ្កាយ និងទិដ្ឋភាពតាមបែបប្រឌិត-វិទ្យាសាស្ត្រ បន្ថែមដោយភ្លើងពណ៌ បែបអណ្តែតអណ្តូងជាច្រើនទៀត។
ដូច្នេះសង្ឃឹមថា យើងទាំងអស់គ្នាដែលស្រឡាញ់វិស័យវិទ្យាសាស្ត្រ និងអវកាស អាចមានលទ្ធភាព ឬឱកាស ទៅទស្សនាដោយផ្ទាល់នូវសួន Star Wars ដែលកំពូងព្យាយាមកែច្នៃ ឲ្យស្របទៅតាមទិដ្ឋភាពជាក់ស្តែងនៃសាច់រឿងនោះ ដូចជាការធ្វើដំណើរឆ្លងកាត់កាឡាក់ស៊ី ការរកឃើញភពនៅប្រព័ន្ធផ្កាយផ្សេង និងដើរហើរនៅបរិស្ថាននៃភព ដែលមនុស្សបានទៅដល់នោះ៕
