ផ្ទុះភ្នំភ្លើងទៀតហើយនៅភាគនិរតីជប៉ុន និងជះកម្អែរផេះឡើងលើផ្ទៃអាកាស ២.៣គីឡូម៉ែត្រ!
(តូក្យូ)៖ ភ្នំភ្លើង Shinmoe ដែលស្ថិតនៅចន្លោះខេត្ត ខាហ្គោស៊ីម៉ា (Kagoshima) និង មីយ៉ាហ្សាគី (Miyazaki) នៃប្រទេសជប៉ុន បានផ្ទុះឡើងជាថ្មីម្តងទៀតនាព្រឹកថ្ងៃសុក្រនេះ។ នេះបើតាមទីភ្នាក់ងារឧតុនិយមជប៉ុន JMA ដកស្រង់ខ្លឹមសារដោយទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃសុក្រ ទី២២ ខែមិថុនា ឆ្នាំ២០១៨។
បើតាមទីភ្នាក់ងារ JMA ការផ្ទុះដ៏កក្រើកសាជាថ្មីម្តងទៀតនៅឯភ្នំភ្លើងជប៉ុន Shimoe ភាគនិរតីនៃប្រទេសជប៉ុននេះ បានបណ្តាលឲ្យពពកផ្សែង និងកម្អែរផេះ ជះឡើងទៅលើផ្ទៃអាកាសកម្ពស់ដល់ទៅ ២,៣០០ម៉ែត្រ ចេញពីមាត់របស់វា។ ជាមួយគ្នានេះ JMA បានបន្តរក្សាកម្រិតប្រុងយ័ត្ននៃភ្នំភ្លើងនេះនៅកម្រិតលេខ ៣ ក្នុងចំណោមកម្រិតខ្ពស់បំផុត ៥ ដែលព្រមានមិនឲ្យមានការចូលមកក្បែរភ្នំភ្លើង ដែលមានកម្ពស់ ១,៤២១ម៉ែត្រនេះឡើយ។
គួរជម្រាបថា ភ្នំភ្លើង Shinmoe កាលពីខែមីនាកន្លងទៅ ក៏បានផ្ទុះជះកម្អែរផេះឡើងទៅផ្ទៃអាកាស កម្ពស់រាប់ពាន់ម៉ែត្រផងដែរ៕
