ទីបំផុតស្គាល់ប្រភេទហ្វូស៊ីលដាយណូស័រធំបំផុតហើយ ដែលទើបត្រូវបានរកឃើញនៅអាហ្វ្រិក (រូបភាពខាងក្នុង)
(អាហ្រ្វិក)៖ របកគំហើញនាពេលថ្មីៗនេះ នៃផ្ទាំងហ្វូស៊ីលរបស់អម្បូរសត្វដាយណូស័រថ្មីមួយប្រភេទ នៅក្នុងប្រទេសអាហ្រ្វិកខាងត្បូង គឺជាដាយណូស័រ មានជាប់ខ្សែស្រឡាយជាមួយអម្បូរ Brontosaurus ដែលមានទម្ងន់ ២៦,០០០ផោន (១១,៨០០គីឡូក្រាម) ពោលគឺស្មើនឹងសត្វដំរីធំៗនៅអាហ្រ្វិកពីរដង។ នេះបើតាមការដកស្រង់ការផ្សាយ ចេញពីវែបសាយ CNN នៅល្ងាចថ្ងៃសុក្រ ទី២៨ ខែកញ្ញា ឆ្នាំ២០១៨។
ក្រុមអ្នកស្រាវជ្រាវបានដាក់ឈ្មោះឲ្យវាថា ឡេឌូម៉ាហាឌី ម៉ាហ្វូប (Ledumahadi mafube) ដែលក្នុងភាសា Sesotho របស់អាហ្រ្វិកខាងត្បូងមានន័យថា ជាស្នូររន្ទះយក្សនាព្រឹកព្រលឹម ហើយឈ្មោះនេះជាការឆ្លុះបញ្ចាំងពីទំហំដ៏ធំសម្បើមរបស់វា ព្រមទាំងស្តែងពីធាតុពិតដែលថា អម្បូររបស់វាបានបង្ហាញខ្លួនតាំងពីកំណើតដំបូង នៃអម្បូរដាយណូស័រកវែងធំៗ Brontosaurus មកម្ល៉េះ។ អ្វីដែលពិសេសទៀតនោះ Ledumahadi mafube កាលពី ២០០លានឆ្នាំមុន គឺជាសត្វលើគោកដ៏ធំជាងគេបំផុត។
គួរជម្រាបថា កាលពីឆ្នាំ២០១២ កំណត់ឆ្អឹងនៃសត្វដាយណូរដែលគេពុំស្គាល់ត្រូវបានរកឃើញជាលើកដំបូង ហើយក្រោយមកក៏មានរកឃើញនៃផ្ទាំងហ្វូស៊ីលរបស់សត្វដាយណូស័រពេញវ័យមួយតែម្តង ដែលវាទំនងជាបានងាប់នៅពេលមានអាយុប្រហែល ១៤ឆ្នាំ។ Ledumahadi មានជាប់ខ្សែស្រឡាយជិតនឹងអម្បូរ Sauropod ដូចទៅនឹងអម្បូរ Brontosaurus និងអម្បូរដទៃដែរ ដែលស៊ីរុក្ខជាតិជាអាហារហើយដើរជើងបួន។ ប៉ុន្តែផ្ទាំងហ្វូស៊ីលនេះ បង្ហាញថា ពួកវាបានធ្វើការវិត្តន៍មុន និងឯករាជ្យពីអម្បូរ Sauropods៕
