អង្គការ AHF នឹងរៀបចំទិវាពិភពលោកប្រយុទ្ធនឹង ជំងឺអេដស៍ឆ្នាំ២០២១ នៅថ្ងៃទី០១ ខែធ្នូ ក្នុងទឹកដីខេត្តសៀមរាប

0 214

(ភ្នំពេញ)៖ អង្គការមូលនិធិថែទាំសុខភាពអ្នកជំងឺអេដស៍ (AHF) រួមជាមួយរដ្ឋាភិបាល និងអង្គការសង្គមស៊ីវិល នឹងរៀបចំពិធីអបអរសាទរទិវាពិភពលោកប្រយុទ្ធនឹងជំងឺ អេដស៍ឆ្នាំ២០២១ នាថ្ងៃទី០១ ខែធ្នូ ឆ្នាំ២០២១ ខាងមុខនេះនៅលើទឹកដីខេត្តសៀមរាប ជាមួយនឹងការបង្ហាញប្រធានបទថ្មីទាន់ពេលវេលាមួយគឺ«ជំងឺអេដស៍៖ ស្ដីពីជំងឺឆ្លងរាតត្បាតដទៃ»។

ប្រធានបទថ្មីនេះ និងផ្លាកសញ្ញាជាការក្រើនរំលឹកដល់ពិភពលោកថា សូម្បីតែនៅក្នុងអំឡុងពេលរាតត្បាតដោយមេរោគកូវីដ១៩ ការប្រយុទ្ធនឹងមេរោគអេដស៍ គឺនៅតែជា ប្រធានបទ ដែលត្រូវតែយកចិត្តទុកដាក់ខ្ពស់នៃសុខភាពសាធារណៈសកល ពីព្រោះវានៅតែធ្វើឲ្យបាត់បង់ជីវិតរាប់រយពាន់នាក់ជារៀងរាល់ឆ្នាំ។

ជាប្រពៃណីយូរអង្វែងមកហើយអង្គការ AHF រួមជាមួយរដ្ឋាភិបាល និងអង្គការសង្គមស៊ីវិលមកពីជុំវិញពិភពលោក នឹងរៀបចំកម្មវិធីរំលឹកជាច្រើន រួមទាំងព្រឹត្តិការណ៍ ផ្សាយផ្ទាល់ និងព្រឹត្តការសង្គមដោយរក្សាគម្លាតសុវត្តិភាព ដើម្បីរំលឹកដល់អ្នកដែលបានបាត់បង់ជីវិតដោយសារជំងឺអេដស៍ និងលើកកម្ពស់ការយល់ដឹងជាសាធារណៈ អំពីសារៈសំខាន់នៃការធ្វើតេស្តឈាម ការបង្ការ និងការព្យាបាលជំងឺអេដស៍និងដើម្បីស្វែងរកការគាំទ្រក្នុងបន្តការប្រយុទ្ធដ៏សំខាន់នេះ។

មូលនិធិថែទាំសុខភាពអេដស៍ ហៅកាត់ថា (AHF) នឹងរៀបចំព្រឹត្តិការណ៍ជាបន្តបន្ទាប់ក្រោមបាវចនា «ជំងឺអេដស៍» ស្ដីពីជំងឺឆ្លងរាតត្បាតដទៃ។ ប្រធានបទនេះ នឹងបន្ត បម្រើដល់ការដាស់តឿនថា ទោះជានៅអំឡុងការឆ្លងរាតត្បាតនៃជំងឺ COVID-19 ក៏ដោយ ពិភពលោកនៅតែត្រូវតែបន្តកិច្ចខិតខំប្រឹងប្រែងប្រយុទ្ធប្រឆាំងនឹងជំងឺអេដស៍ ឬ ហ៊ីវ (HIV) ដែលជាជំងឺឆ្លងមួយបានឆ្លងរាលដាលអស់រយៈពេលជាង៣០ឆ្នាំមកនេះ។

របាយការណ៍មួយចេញផ្សាយដោយមូលនិធិសកល Global Fund កាលពីពេលថ្មីៗនេះ បានបង្ហាញថា ជំងឺឆ្លងរាតត្បាតពិតជាជះឥទ្ធិពលអាក្រក់យ៉ាងខ្លាំងដល់ប្រព័ន្ធ សុខាភិបាល និងការផ្ដល់សេវានានានៅតាមបណ្ដាប្រទេសមានប្រាក់ចំណូលទាប និងមធ្យម នៅក្នុងតំបន់អាហ្វ្រិក និងអាស៊ីកាលពីឆ្នាំ២០២០។ ជាក់ស្ដែងការផ្ដល់ សេវាពាក់ព័ន្ធនឹងជំងឺអេដស៍ ឬ HIV បានទទួលរងការរំខានដល់ជិត២ភាគ៣ នៃបណ្ដាប្រទេសទាំងនេះ។

បន្ថែមពីលើនេះ ការធ្វើរកមេរោគអេដស៍ក៏បានធ្លាក់ចុះ ៤០ភាគរយផងដែរ ចាប់ពីខែមេសា ដល់ខែកញ្ញា ឆ្នាំ២០២០ ធៀបទៅនឹងរយៈពេលដូចគ្នាកាលពីឆ្នាំ២០១៩។ ប៉ុន្តែ ទោះជាជួបបញ្ហាប្រឈមទាំងនេះក្ដី ជំងឺ COVID-19 មិនគួរត្រូវបានប្រើប្រាស់ជាលេសក្នុងការកាត់បន្ថយការឆ្លើយតបជាសកលទៅនឹងជំងឺអេដស៍នោះឡើយ ផ្ទុយទៅវិញវាចាំបាច់ត្រូវតែមានការប្ដេជ្ញាចិត្តបន្ថែមដើម្បីប្រយុទ្ធប្រឆាំងនឹងជំងឺអេដស៍។

លោកវេជ្ជបណ្ឌិត ឈឹម សារ៉ាត់ នាយកការិយាល័យប្រចាំតំបន់អាស៊ីនៃអង្គការ AHF បានថ្លែងថា «វិបត្តកូវីដ១៩ គឺជាការដាស់តឿនដ៏ធ្ងន់ធ្ងរមួយ សម្រាប់ពិភពលោក ជាពិសេសនៅទូទាំងតំបន់អាស៊ី ដែលមនុស្សនៅតាមប្រទេសជាច្រើន មិនសូវមានឱកាសទទួលបានការចាក់វ៉ាក់សាំង, បាត់បង់ការងារ, និងកំពុងទទួល រងអសន្តិសុខស្បៀង។ វិធានការបិទខ្ទប់តឹងរ៉ឹង ក៏បានជះផលប៉ះពាល់ផងដែរ ចំពោះផ្នែកជាច្រើននៃសង្គម រួមមានការបង្កជាឧបសគ្គ ដល់សមត្ថភាពរបស់តំបន់អាស៊ី ក្នុងការឆ្លើយតបចំពោះវិបត្តិជំងឺអេដស៍ និងគំរាមកំហែងចំពោះវឌ្ឍនភាពដែលសម្រេចបាន ក្នុងការប្រយុទ្ធប្រឆាំងជំងឺនេះ»។

លោក សារ៉ាត់ បានបន្តថា «ទិវាពិភពលោកប្រយុទ្ធប្រឆាំងនឹងជំងឺអេដស៍ ផ្តល់ឲ្យយើងនូវឱកាសដើម្បីឆ្លុះបញ្ចាំងឡើងវិញចំពោះវឌ្ឍនភាពនោះ ហើយក្រើនរំលឹក អ្នករាល់គ្នាថា មនុស្សរាប់លាននាក់ ជាពិសេសបុគ្គលងាយរងគ្រោះ នៅតែមិនទាន់មានឱកាសទទួលបាន ឱសថសង្រ្គោះជីវិតពួកគេនៅឡើយទេ។ ទោះបីបច្ចុប្បន្នកូវីដ១៩ កំពុងនៅបន្តជាវិបត្តិជំងឺឆ្លងដ៏ធំមួយ ដដែលក៏ដោយ ទន្ទឹមគ្នាមេដឹកនាំពិភពលោក ត្រូវតែបន្តព្យាយាមប្រឹងប្រែងឲ្យខ្លាំងថែមទៀត ដើម្បីបញ្ចប់វិបត្តិជំងឺអេដស៍ផងដែរ»៕

អង្គការមូលនិធិថែទាំសុខភាពអ្នកជំងឺអេដស៍ (AHF) ជាអង្គការប្រយុទ្ធនឹងជំងឺអេដស៍ធំជាងគេបំផុតនៅលើពិភពលោក ដោយបច្ចុប្បន្នអង្គការកំពុងផ្តល់ការព្យាបាល ថែទាំ និងសេវាកម្មដល់មនុស្សជាង ១.៤៧លាននាក់ នៅក្នុង៤៥ប្រទេសទូទាំងពិភពលោក ដូចជានៅសហរដ្ឋអាមេរិក អាហ្វ្រិក អាមេរិកឡាទីន ការាបៀន តំបន់អាស៊ីប៉ាស៊ីហ្វិក និងអឺរ៉ុបខាងកើតជាដើម។សម្រាប់ព័ត៌មានលម្អិតអំពី សូមចូលទៅកាន់គេហទំព័រទំព័រហ្វេសប៊ុក៖ www.facebook.com/aidshealth និង Twitter: @aidshealthcare ឬ Instagram: @aidshealthcare។ AHF www.aidshealth.org ៕

អង្គការ AHF នឹងរៀបចំទិវាពិភពលោកប្រយុទ្ធនឹង ជំងឺអេដស៍ឆ្នាំ២០២១ នៅថ្ងៃទី០១ ខែធ្នូ ក្នុងទឹកដីខេត្តសៀមរាប
Leave A Reply

Your email address will not be published.