រកឃើញ Black Hole កំណាចនៅឆ្ងាយបំផុត តែអាចជះឥទ្ធិពលដល់ផែនដី, តែ១ឆ្នាំវាអាចលេបព្រះអាទិត្យ…
(បរទេស)៖ ក្រុមអ្នកវិទ្យាសាស្ត្រទើបតែអង្កេតដឹង អំពីវត្តមានរបស់ប្រហោងខ្មៅ (Black Hole) ស្ថិតនៅឆ្ងាយបំផុតមួយ តាមរយៈសកម្មភាពកម្ទេចផ្កាយមួយដួង ដែលបានបញ្ចេញនូវរលកសញ្ញាដោយផ្ទាល់ មកដល់ភពផែនដីយើងនេះតែម្តង។
ព្រោះតែការជះចេញនូវកំសួលថាមពល (jet) ឆ្ពោះមកកាន់ភពផែនដី តាមរយៈការស្រូបកម្ទេចតារាមួយដួងដោយ Black Hole មួយនោះហើយ ទើបក្រុមតារាវិទូអាចអង្កេតដឹង។ បាតុភូតបែបនេះយើងតែងហៅថា ព្រឹត្តិការណ៍រំខានដោយជំនោរ (tidal disruption event ឬ TDE) ហើយវាគឺជាពន្លឺ (visible light) ដែលអាចឲ្យក្រុមតារាវិទូចាប់បានផងដែរ។
![រកឃើញ Black Hole កំណាចនៅឆ្ងាយបំផុត តែអាចជះឥទ្ធិពលដល់ផែនដី, តែ១ឆ្នាំវាអាចលេបព្រះអាទិត្យ… រកឃើញ Black Hole កំណាចនៅឆ្ងាយបំផុត តែអាចជះឥទ្ធិពលដល់ផែនដី, តែ១ឆ្នាំវាអាចលេបព្រះអាទិត្យ…](https://cambospace-world.com/wp-content/uploads/2022/12/photo_2022-12-02_13-18-38-1024x576.jpg)
ការអង្កេតឃើញ Black Hole ដែលស្ថិតនៅឆ្ងាយសែនឆ្ងាយខាងលើនេះ ក៏ជាការត្រួសត្រាយផ្លូវឲ្យក្រុមអ្នកវិទ្យាសាស្ត្រស្វែងយល់បន្ថែមទៀត អំពីព្រឹត្តិការណ៍កញ្ជ្រោលៗឥតឧបមានៅក្នុងចក្រវាលយើងនេះ ដែលជាធម្មតាយើងអាចរកឃើញតាមរយៈ ពន្លឺប្រកបដោយថាមពលដូចជា កាំរស្មី ហ្គាំម៉ា (gamma-rays) និង កាំរស្មីអ៊ីច (X-rays) នោះ។
ព្រឹត្តិការណ៍ TDE មួយអាចកើតឡើងទៅបាន គឺនៅពេលដែលតារាមួយដួង ចល័តទៅកៀកនឹង Black Hole ខ្លាំងពេក ដែលនាំឲ្យ Black Hole នោះអាចពុះហែកតារានោះឲ្យខ្ទេចខ្ទីបាន ដោយកម្លាំងជំនោរដ៏មហាសាល ដែលត្រូវបានបង្កើតឡើងដោយកម្លាំងទំនាញដ៏មានឥទ្ធិពលនោះ។ ប្រមាណ ១% នៃព្រឹត្តិការណ៍ TDE ដែលត្រូវបានគេអង្កេតដឹងកន្លងមក សុទ្ធតែបានជះចេញនូវកំសួលថាមពល (jets) នៃធាតុផ្លាស្មា (plasma) និងវិទ្យុសកម្ម (radiation) ចេញពីប៉ូលនៃ Black Hole ទាំងនោះ។
![](https://cambospace-world.com/wp-content/uploads/2022/12/photo_2022-12-02_13-18-23-1024x576.jpg)
បើតាមក្រុមអ្នកជំនាញមកពី មន្ទីរអង្កេតតារាភាគខាងត្បូងរបស់អឺរ៉ុប (ESO) បានអះអាងថា ពួកគេបានប្រទះឃើញព្រឹត្តិការណ៍កម្រ TDEs មួយចំនួនដែរ ប៉ុន្តែពួកវានៅតែបង្កភាពស្រពិចស្រពិល និងពិបាកឲ្យយល់។ ក្រុមអ្នកតាមដាននៅតែបន្តស្វែងយល់ថា តើ Jet ត្រូវបានបង្កើតឡើងដោយរបៀបណាឲ្យប្រាកដ និងហេតុអ្វីបានជាព្រឹត្តការណ៍ TDE ភាគតិចបំផុតដែលអាចបង្កើត Jet នេះ។
សម្រាប់ព្រឹត្តិការណ៍ TDE ថ្មីខាងលើនេះ ត្រូវបានដាក់ឈ្មោះសម្គាល់ឲ្យថា AT2022cmc។ ក្រុមអ្នកតារាវិទូបានចាប់សញ្ញារបស់វាកាលពីអំលុងខែកុម្ភៈ ឆ្នាំ២០២២ តាមរយៈតេឡេស្កូបមួយនៅរដ្ឋ កាលីហ្វ័រញ៉ា ឈ្មោះ ZTF (Zwicky Transient Facility) ហើយក្រោយមកទើបបណ្តាញតេឡេស្កូប VLT នៅប្រទេសឈីលី ជាអ្នកអង្កេតបន្ត ទើបគេដឹងថា ជាការជះចេញនូវកំសួលថាមពល និងពន្លឺត្រង់មកកាន់តែផែនដីតែម្តង ដោយមានអានុភាពខ្លាំង និងរយៈពេលខ្លីប៉ុណ្ណោះ។
![](https://cambospace-world.com/wp-content/uploads/2022/12/photo_2022-12-02_13-29-12-1024x682.jpg)
បើតាមការគណនាពីក្រុមអ្នកវិទ្យាសាស្ត្រ ព្រឹត្តិការណ៍ Black Hole ហែកផ្កាយហៅថា «AT2022cmc» នោះមានចម្ងាយរហូតដល់ ៨.៥ពាន់លានឆ្នាំពន្លឺឯណោះពីភពផែនដី (១ឆ្នាំពន្លឺ = ៩.៤៦ទ្រីលានគីឡូម៉ែត្រ) ដូច្នេះវាមានន័យថា វាបានកើតមានឡើងតាំងពីចក្រវាលទើបមានអាយុកាល ៥.៣ពាន់លានឆ្នាំ។ កម្លាំងរបស់ AT2022cmc គឺខ្លាំងជាងការផ្ទុះជះកាំរស្មីហ្គាំម៉ា (gamma-ray) ខ្លាំងបំផុតក្នុងទីអវកាស រហូតដល់ទៅ ១០០ដងឯណោះ ហើយកម្លាំងនៃ Black Hole នោះត្រូវបានគេគណនាថា អាចលេបព្រះអាទិត្យយើងបានពាក់កណ្តាលក្នុង ១ឆ្នាំ៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ SPACE (ថ្ងៃសុក្រ ទី០២ ខែធ្នូ ឆ្នាំ២០២២)
![480×240 Banner](https://cambospace-world.com/wp-content/uploads/2024/02/cambo-space-donate-1.png)