ចង់បានសម្រស់នៅតែក្មេងស្អាត និងសុខភាពល្អពេញមួយតួខ្លួន ចូរព្យាយាមទទួលទានអាហារទាំង ០៥ ប្រភេទនេះ…
១. ខ្ទឹមស៖ វាមានគុណសម្បត្តិពិសេស អាចជួយកម្ចាត់អាការៈមួយចំនួនបានដូចជា ប្រើជាថ្នាំបណ្តេញខ្យល់ចេញពីក្នុងពោះវៀន បំបាត់រោគក្អកកាត់ស្លេស និងជួយរំលាយអាហារ។
ក្រៅពីនេះ ខ្ទឹមសមានសារជាតិ អែលលីស៊ីន (Allicin) ដែលជួយកាត់បន្ថយជាតិខ្លាញ់ក្នុងឈាម ឬអាចហៅថា កូលេស្តូរ៉ល នោះចោលបានផងដែរ។ ការទទួលទានខ្ទឹមសក្នុងមួយថ្ងៃ១ ទៅ ៣ កំពឹសអាចជួយការពាររោគបេះដូង ការពារការកកផ្តុំនៃឈាមក្នុងរាងកាយ ដែលជាហេតុធ្វើឲ្យមានជំងឺកកស្ទះឈាម ឬបេះដូងខ្វះឈាមបាន។
២. បន្លែ និងផ្លែឈើ៖ ការទទួលទានបន្លែផ្លែឈើជាប់ជាប្រចាំ រួមទាំងរុក្ខជាតិ សណ្តែកផ្សេងៗដែលសម្បូរទៅដោយ វីតាមីន ធាតុរ៉ែ និងអង់ស៊ីមជាច្រើនមុខនោះ អាចជួយពង្រឹងកោសិកាក្នុងរាងកាយឲ្យរឹងមាំ សាច់ដុំហាប់ណែននិង ស្បែកតឹងណែនល្អ។ ក្រៅពីនេះបន្លែទាំងនេះ នៅអាចជួយឲ្យមានថាមពលខ្លាំងក្លា និងប្រព័ន្ធកាកសំណល់បញ្ចេញចោលដូចជាលាមក ទឹកនោមបានល្អទៀតផង។
៣. តៅហ៊ូ៖ មានប្រូតេអ៊ីនយ៉ាងខ្ពស់ និងជួយកិនរំលាយអាហារបានយ៉ាងល្អ។ ក្រុមឯកទេសបានរកឃើញថា ប្រូតេអ៊ីននៅក្នុងសណ្តែកសៀង ជួយកាត់បន្ថយជាតិខ្លាញ់អាក្រក់ក្នុងឈាម និងជួយបន្ថែមបរិមាណខ្លាញ់ល្អៗ បញ្ចូលទៅវិញ។ វាអាចជួយការពាររោគសសៃឈាមបេះដូង និងការពាររោគបេះដូងមួយចំនួន។ ក្នុងសណ្តែកសៀងសម្បូរទៅដោយសារជាតិ កាល់ស្យូម ដែក ស័ង្កសី និងវីតាមីនB។
៤. ត្រីសមុទ្រ៖ មានដូចជា ត្រីសាល់ម៉ុន ត្រីធូណា និងត្រីសាឌីនជាដើម ដែលពួកវាមានអាស៊ីតខ្លាញ់អូមេហ្គា 3 ដែលក្រុមអ្នកស្រាវជ្រាវបានរកឃើញចា ត្រីទាំងនោះអាចជួយការពាររោគ បេះដូង ឈាមត្បៀតតូច , ជួយការពារដល់ការធ្វើការងាររបស់ប្រព័ន្ធខួរក្បាល និងកាត់បន្ថយជំងឺលើសឈាម។
ក្នុងត្រីសមុទ្រមានជាតិខ្លាញ់ម៉្យាងឈ្មោះ (ត្រាយគ្លីស៊ីរៃ) អាចជួយថែរក្សាចលនាចង្វាក់បេះដូង ឲ្យមានដំណើរការលោតបានល្អ ហើយក្រៅពីនេះនៅមានសារជាតិ អាចជួយការពារមិនឲ្យកោសិកាធ្វើការងារខុសប្រក្រតីទៀតផង។
៥. តែ៖ ជួយកាត់បន្ថយភាពចាស់ និងធ្វើឲ្យមានអាយុយឺនយូរ ជាពិសេសតែបៃតង ក្រៅពីការពាររោគសសៃឈាមបេះដូង ហើយនៅអាចកាត់បន្ថយជាតិខ្លាញ់ក្នុងសរសៃឈាម និងជួយការពាររោគមហារីកបានទៀតផង។ តែមានលក្ខណៈពិសេសម៉្យាងទៀត គឺអាចជួយថែរក្សាអនាម័យក្នុងមាត់ និងកម្ចាត់បាក់តេរីមួយចំនួនចេញពីក្នុងមាត់ ហើយអាចធ្វើឲ្យធ្មេញកាន់តែរឹងមាំ៕
