Breaking៖ James Webb រកឃើញភពដំបូង! វាមានទំហំ ៩៩% នៃផែនដី (មានវីដេអូ)

1,929

(បរទេស)៖ ត្រឹមដើមឆ្នាំ ២០២៣ នេះប៉ុណ្ណោះ ការស្រាវជ្រាវផ្នែកអវកាស និងវិទ្យាសាស្ត្រហាក់ដូចជាមមាញឹកជាងការស្មាន ដោយពេលនេះអង្គការ NASA ESA និង CSA បានប្រកាសរកឃើញភពថ្មីមួយទៀតហើយ ដែលជាភពស្ថិតនៅចម្ងាយ ៤១ឆ្នាំពន្លឺពីផែនដីយើង (១ឆ្នាំពន្លឺ = ៩.៤៦ទ្រីលានគីឡូម៉ែត្រ) ខណៈប្រវែងអង្កត់ផ្ចិតរបស់វាវិញនោះ គឺស្មើនឹង ៩៩% តែម្តងនៃអង្កត់ផ្ចិតផែនដី (ផែនដីមានអង្កត់ផ្ចិត ១២,៧៤២គីឡូម៉ែត្រ)

តេឡេស្កូបអវកាស TESS (រូបភាពពី NASA)

ភពថ្មីខាងលើនេះ ពីដំបូងឡើយត្រូវបានតេឡេស្កូបអវកាស TESS ដាក់ចូលទៅក្នុងបញ្ចីបេក្ខភាពនៃការតាមដាន ហើយនៅទីបំផុតវាបានក្លាយជាលើកទី ១ សម្រាប់តេឡេស្កូបអវកាស James Webb ទៅវិញ ដែលបានសម្ងំអង្កេតរហូតដឹងថា ភព exoplanet ស្ថិតនៅចម្ងាយ ៤១ឆ្នាំពន្លឺនោះ ពិតជាមានវត្តមានមែន។ ភពនោះត្រូវបានដាក់ឈ្មោះឲ្យថា LHS 475 b ហើយវាប្រភេទភពថ្ម (rocky planet) ដូចនឹងភពផែនដីយើងដែរ។

Breaking៖ James Webb រកឃើញភពដំបូង! វាមានទំហំ ៩៩% នៃផែនដី និងនៅមិនឆ្ងាយប៉ុន្មានឡើយ
តេឡេស្កូបអវកាស James Webb (រូបភាពពី NASA)

សម្រាប់ធាតុផ្សំនៅក្នុងបរិយាកាសរបស់ LHS 475 b មានអ្វីខ្លះនោះ គឺតម្រូវឲ្យតេឡេស្កូបអវកាស James Webb បន្តការសិក្សាបន្ថែមទៀត ខណៈការបញ្ជាក់វត្តមានរបស់ភពនេះ ត្រូវបានធ្វើឡើងដោយងាយៗតាមរយៈ ឧបករណ៍តាមដានពន្លឺក្រហមអាំងហ្វ្រាជិត NIRSpec (Near-Infrared Spectrograph)James Webb គ្រាន់តែអង្កេតដំណើរគោចរឆ្លងកាត់ផ្កាយរបស់ភព LHS 475 b ចំនួន ២ លើកប៉ុណ្ណោះក៏អាចបញ្ជាក់វត្តមានវាបាន ហើយក៏មិនប្រើពេលយូរដែរព្រោះភព rocky មួយនេះគោចរជុំវិញផ្កាយមេវាមួយជុំ (ស្មើនឹង ១ឆ្នាំរបស់វា) ដោយប្រើប្រាស់ពេលតែ ២ថ្ងៃប៉ុណ្ណោះនៃពេលវេលាលើភពផែនដី។

រូបតំណាងនៃភព LHS 475 b គោចរជុំវិញផ្កាយ LHS 475 (រូបភាពពី NASA ESA និង CSA)

ទោះជាយ៉ាងណា ភព LHS 475 b គោចរជុំវិញផ្កាយ LHS 475 ក្នុងគម្លាតយ៉ាងកៀក ហើយបើទោះបីជាផ្កាយនេះជាប្រភេទផ្កាយក្រហមទំហំតូច (Red Dwarf) ដែលមិនសូវក្តៅដូចព្រះអាទិត្យយើងក្តី ក៏វានៅតែអាចធ្វើឲ្យផ្ទៃរបស់ភព LHS 475 b នោះ មានកម្តៅក្តៅជាងលើផែនដីរាប់រយអង្សាសេណាឯណោះ។ រាប់រយអង្សាសេ? គ្រាន់តែឃើញចំនួននេះ លោកអ្នកអាចប៉ាន់ស្មានបានថា ភព rocky មួយនេះ មិនស្វាគមន៍ជីវិតឡើយ ហើយក៏មិនស្ថិតនៅក្នុងតំបន់អំណោយផលដល់ការកកើតជីវិត (Habitable Zone) នោះដែរ។ តែយ៉ាងណា ការអង្កេតបន្តនៅថ្ងៃមុខរបស់ James Webb នឹងអាចប្រាប់យើងពីធាតុគីមីផ្សំសំខាន់ៗ នៅក្នុងបរិយាកាស rocky planet មួយនេះបាន។

ការអង្កេតរកវត្តមាន LHS 475 b (រូបភាពពី NASA ESA CSA)

សម្រាប់រយៈចម្ងាយ ៤១ឆ្នាំពន្លឺ គឺមិនអាចចាត់ទុកថាឆ្ងាយនោះឡើយ បើគិតក្នុងន័យតារាសាស្ត្រនោះ ហើយលោកអ្នកអាចរកឃើញប្រព័ន្ធផ្កាយ LHS 475 នៅក្នុងតារានិករ អក់តានស៍ (Octans) លើផ្ទៃមេឃផែនដី។ សេចក្តីប្រកាសអំពីការរកឃើញនេះត្រូវបានធ្វើឡើងនៅក្នុងសន្និបាត នៃសង្គមអ្នកតារាសាស្ត្រអាមេរិក (American Astronomical Society ឬ AAS) នៅថ្ងៃទី១១ ខែមករា ឆ្នាំ២០២៣ (ពេលវេលានៅសហរដ្ឋអាមេរិក)៕

ប្រែសម្រួល៖ Cambo Space (ឥន្ទ វុត្ថា)
ប្រភព៖ NASA/ESA/CSA (ថ្ងៃព្រហស្បតិ៍ ទី១២ ខែមករា ឆ្នាំ២០២៣)