រម្លឹក៖ «១១ មីនា ២០១១» ជប៉ុនរងគ្រោះរញ្ជួយដីកម្រិតធ្ងន់, រលកយក្សស៊ូណាមិ និងការផ្ទុះរោងចក្រនុយក្លេអ៊ែរ (មានវីដេអូ)
(បរទេស)៖ ពិភពលោកទាំងមូលនៅតែចងចាំជាប់ជានិច្ច ចំពោះមហាសោកនាដកម្ម ជាប្រវត្តិសាស្ត្រនៃប្រជាជាតិជប៉ុន ដែលបានកើតមានឡើងកាលពីថ្ងៃសុក្រ ទី១១ ខែមីនា ឆ្នាំ២០១១ នោះគឺគ្រោះរញ្ជួយដីកម្រិតធ្ងន់, រលកយក្សស៊ូណាមិក៏កំណាច និងការផ្ទុះរោងចក្រផលិតថាមពលនុយក្លេអ៊ែរ ដែលជារួមបានផ្តាច់ជីវិតប្រជាជនជប៉ុន អស់រាប់ម៉ឺននាក់ (បូកទាំងអ្នកបាត់ខ្លួន ដែលគ្មានថ្ងៃត្រូវបានរកឃើញ)។
![](https://cambospace-world.com/wp-content/uploads/2024/03/photo_2024-03-11_13-15-28.jpg)
គ្រោះរញ្ជួយដីបាតសមុទ្រ (សមុទ្រប៉ាស៊ីហ្វិកភាគខាងកើតជប៉ុន ឬភាគឦសានទីក្រុងតូក្យូ) ក្នុងកម្រិតរហូតដល់ទៅ ៩.០នៃរង្វាស់រិចទ័រ (ជាកម្រិតខ្ពស់កម្រកើតមានជាទីបំផុត) បានកើតមានឡើង នៅវេលាម៉ោង ២៖៤៦នាទីរសៀលថ្ងៃទី១១ ខែមីនា ឆ្នាំ២០១១នោះ និងបានបង្កទៅជារលកយក្សស៊ូណាមិ ដែលមានកម្ពស់រហូតដល់ទៅ ១៤ម៉ែត្រ បោកបក់មកលើតំបន់ជាច្រើននៃខេត្ត Iwate, Miyagi, Chiba, Fukushima និង Ibaraki ស្ថិតនៅជាប់ឆ្នេរសមុទ្រប៉ាស៊ីហ្វិចភាគខាងកើត និងឦសានប្រទេសជប៉ុន។
![](https://cambospace-world.com/wp-content/uploads/2024/03/photo_2024-03-11_13-13-34-1024x576.jpg)
រញ្ជួយដីកម្រិតធ្ងន់លើនេះ ក៏បានជះឥទ្ធិពលដល់រោងចក្រនុយក្លេអ៊ែរ ហ៊្វូគូស៊ីម៉ា (Fukushima) ដែលស្ថិតនៅខេត្ត Fukushima ភាគឦសានប្រទេសជប៉ុនផងដែរ ដោយក្នុងនោះវាបានផ្ទុះ និងបង្កឲ្យមានការជម្លៀសមនុស្សរាប់ពាន់នាក់ចេញពីតំបន់នោះ។ ខាងក្រោមនេះជាវីដេអូពេញ អំពីគ្រោះមហន្តរាយកាលណោះ៖
គួរបញ្ជាក់ថា មនុស្សយ៉ាងហោចណាស់ ២០,០០០នាក់បានបាត់បង់ជីវិត នៅក្នុងគ្រោះមហន្តរាយផ្ទួនៗខាងលើនេះ ដោយក្នុងនោះជាង ២,៥០០នាក់ មិនត្រូវបានរកឃើញសាកសពឡើយ ខណៈមនុស្សជាង ៦,០០០នាក់ទៀតបានរងរបួស និងជាង ៤៧០,០០០នាក់ ត្រូវបានជម្លៀសចេញពីលំនៅដ្ឋាន។
![](https://cambospace-world.com/wp-content/uploads/2024/03/photo_2024-03-11_13-13-43-1024x654.jpg)
សម្រាប់ការខាតបង់ផ្នែកសេដ្ឋកិច្ចជប៉ុនដោយចំពោះវិញ គឺប្រមាណខ្ទង់ ១៩៩ពាន់លានដុល្លារសហរដ្ឋអាមេរិក (១៦.៩ទ្រីលានយ៉េន បើតាមទិន្នន័យពីរាជរដ្ឋាភិបាលជប៉ុន) ខណៈធនាគារពិភពលោក (World Bank) វិញបានគណនាថា ជប៉ុនបានខាតបង់សេដ្ឋកិច្ចប្រមាណ ២៣៥ពាន់លានដុល្លារ កាលពីឆ្នាំ២០១១ និងបានក្លាយជាការខាតបង់ដ៏អាក្រក់បំផុតផ្នែកសេដ្ឋកិច្ចរបស់ប្រទេសមួយ ដោយសារគ្រោះមហន្តរាយធម្មជាតិ៕
![](https://cambospace-world.com/wp-content/uploads/2024/03/photo_2024-03-11_13-13-24-1024x686.jpg)
ប្រែសម្រួល៖ ឥន្ទ វុត្ថា (រក្សាសិទ្ធិដោយ Cambo Space)
ប្រភព៖ Live Science (ថ្ងៃចន្ទ ទី១១ ខែមីនា ឆ្នាំ២០២៤)
![480×240 Banner](https://cambospace-world.com/wp-content/uploads/2024/02/cambo-space-donate-1.png)