ផ្ទាំងទឹកកកយក្ស A-83 (ធំជាងខេត្តកែប) របេះចេញពីទ្វីបអង់តាកទិក (រូបភាព+វីដេអូ)

5,038

(បរទេស)៖ ទីបំផុតផ្ទាំងទឹកកកយក្សមួយឈ្មោះ A-83 ដែលមានទំហំធំជាងខេត្តកែប នៃប្រទេសកម្ពុជារបស់យើងទៅទៀតនោះ ទើបតែបានរបេះចេញពីធ្នើទឹកកក ប្រាន់ត៍ (Brunt Ice Shelf) ដែលស្ថិតនៅជាប់ទ្វីបអង់តាកទិកនោះហើយ។ វាមិនខុសពីការព្យាករណ៍នោះឡើយ ខណៈជោគវាសនារបស់ A-83 ក៏នឹងមិនខុសពីផ្ទាំងទឹកកកយក្សមុនៗ ដែលបានរបេះចេញពីតំបន់នោះ រួចទើបរបូតទៅកាន់មហាសមុទ្រ និងរលាយអស់នោះដែរ។

(Video From YouTube: Cambo Space Edu)

ទិន្នន័យថ្មីខាងលើនេះ គឺទទួលបានមកពី ឧបករណ៍ផ្តិតរូបភាពជាពន្លឺក្រហមអាំងហ្វ្រា TIRS-2 (Thermal Infrared Sensor-2) ជាប់ផ្កាយរណប Landsat 9 របស់អង្គការ NASALandsat 9 បាននិងកំពុងបំពេញបេសកកម្មមួយឈ្មោះ LEAP (Landsat Extended Acquisitions of the Poles) តាំងតែពីឆ្នាំ២០២២ ដើម្បីសង្កេតមើលបម្រែបម្រួលកម្រិតផ្ទាំងទឹកកក, ធ្នើទឹកកក និងទឹកកកប៉ូលតាមរដូវនៅតំបន់ប៉ូលទាំងពីរ ជាពិសេសកោះ ហ្គ្រីនលែនដ៍ (Greenland) និងទ្វីបអង់តាកទិក។

ផ្កាយរណប Landsat (រូបភាពពី USGS)

ការមានឧបករណ៍សិនស័រ TIRS-2 គឺអាចឲ្យក្រុមអ្នកវិទ្យាសាស្ត្រប្រើប្រាស់ ដើម្បីសង្កេតមើលបម្រែបម្រួលទឹកកកគ្រប់ប្រភេទនៅតំបន់ប៉ូលទាំងពីរ បើទោះបីជាក្នុងករណីខ្វះពន្លឺព្រះអាទិត្យ ដែលនាំឲ្យកាមេរ៉ាធម្មតាៗមិនអាចមើលឃើញនោះក៏ដោយ។ តាមរយៈរូបភាពពី Landsat 9 ដែលត្រូវបានថតពេលគ្មានពន្លឺព្រះអាទិត្យកាលពីថ្ងៃទី២០ និង ២២ ខែឧសភា ឆ្នាំ២០២៤ គ្រប់គ្នាអាចឃើញនឹងភ្នែកនូវការរបេះចេញទាំងស្រុងរបស់ A-83 ពីធ្នើទឹកកក Brunt

ផ្ទាំងទឹកកក A-83 មុន និងក្រោយរបេះទាំងស្រុង (រូបភាពពី USGS)

នៅក្នុងរូបភាព​ Infrared ទាំងនេះ ពណ៌ស និងពណ៌ស្វាយតំណាងឲ្យទឹកកកដែលមាន សីតុណ្ហភាពត្រជាក់ខ្លាំង ខណៈពណ៌លឿង និងពណ៌ទឹកក្រូច គឺតំណាងឲ្យផ្ទៃមហាសមុទ្រ ស្ថិតនៅជាប់ផ្ទាំងទឹកកកនោះ ដែលមានសីតុណ្ហភាពខ្ពស់ជាង។ សម្រាប់ទំហំរបស់ A-83 វិញគឺ ៣៧៥គីឡូម៉ែត្រក្រលា ដែលធំជាងខេត្តកែបនៃប្រទេសកម្ពុជាទៅទៀត (ខេត្តកែបមានទំហំ ៣៣៦គីឡូម៉ែត្រក្រលា)

ផ្ទាំងទឹកកក A-83 កាលមិនទាន់របេះទាំងស្រុង (រូបភាពពី USGS)

ទោះបីជាការរបេះចេញនៃផ្ទាំងទឹកកកពីធ្នើទឹកកក គឺជាដំណើរធម្មតានៅទ្វីបអង់តាកទិក តែវាក៏សញ្ញាដែលបង្ហាញថា ធ្នើទឹកកក Brunt កំពុងទទួលរងសម្ពាធនៃខ្យល់ប្រែប្រួលពីមហាសមុទ្រ ដូចជាតំបន់ផ្សេងៗនៅជុំវិញទ្វីបអង់តាកទិកដែរ ជាពិសេសគឺការធ្លាក់ចុះនៃបរិមាណទឹកកកសមុទ្រ (sea ice) ដូចដែលរបាយការណ៍ចុងក្រោយពីអង្គការ NASA បានចេញផ្សាយក្នុងឆ្នាំ២០២៤ នេះ។ ពិតណាស់ នេះជាការប្រែប្រួលអាកាសធាតុផែនដី៕

ទីតាំងនៃផ្ទាំងទឹកកក A-83 (រូបភាពពី NASA)

ប្រែសម្រួល៖ ឥន្ទ វុត្ថា (Cambo Space)
ប្រភព៖ NASA (ថ្ងៃសៅរ៍ ទី២៥ ខែឧសភា ឆ្នាំ២០២៤)

480×240 Banner