ភពផែនដីនឹងមាន «ព្រះចន្ទទី២» មួយរយៈពេលខ្លី, តើនេះមានន័យដូចម្តេច? (យល់ដឹង) (វីដេអូ)
(បរទេស)៖ នៅអំលុងពាក់កណ្តាលខែកញ្ញា ឆ្នាំ២០២៤នេះ មានការចុះផ្សាយដោយសារព័ត៌មានធំៗរបស់សកលលោកតែម្តង អំពីការជិតមកដល់នៃ «ព្រះចន្ទទី២» របស់ផែនដី ដែលនឹងស្ថិតនៅជាមួយភពរបស់យើងនេះមួយរយៈពេលខ្លី។ ប្រិយមិត្តជាច្រើនទំនងជាមិនទាន់បានដឹង ឬយល់ចំពោះរឿងនេះនៅឡើយទេ ដូច្នេះ Cambo Space សូមធ្វើការបកស្រាយជូននៅក្នុងអត្ថបទថ្មីនេះតែម្តង។
ពេលឮថាព្រះចន្ទី២ បងប្អូនមួយចំនួនប្រហែលជាអាចគិតដល់ថា នឹងមានព្រះចន្ទចំនួន ២ រះលើមេឃផងក៏មិនដឹង។ តែតាមការពិត គឺវានឹងមិនមែនបែបនោះទាល់តែសោះ។ ការអះអាងថា ផែនដីនឹងមានព្រះចន្ទទី ២ នោះ គឺយោងលើលក្ខខណ្ឌកំណត់ទូទៅនៃភាពជាព្រះចន្ទប៉ុណ្ណោះ ដូចជាព្រះចន្ទរបស់ផែនដីយើង ដែលកំពុងគោចរជាមធ្យម ៣៨០,០០០km ពីភពផែនដីនោះឯង នោះគឺការមានគន្លងគោចរត្រឹមត្រូវជុំវិញភពផែនដី និងទទួលរងឥទ្ធិពលទំនាញពីផែនដីជានិច្ច ដោយមិនរបូតចេញទៅណា។
អ្វីមួយដែលក្រុមអ្នកវិទ្យាសាស្ត្រនៃអង្គការ NASA បានអះអាងថា នឹងមកក្លាយជាព្រះចន្ទទី ២ របស់ភពផែនដីយើងនោះ នឹងមកដល់នៅថ្ងៃទី២៩ ខែកញ្ញា ឆ្នាំ២០២៤ ហើយត្រលប់ទៅវិញនៅថ្ងៃទី២៥ ខែវិច្ឆិកា ឆ្នាំដដែល ដូច្នេះមានន័យថា វានឹងដើរតួជាព្រះចន្ទទី ២ បានជិត ២ខែដែរ។ អូខេ! ចូលមកដល់ការពិតជាក់ស្តែងវិញ, ប្រសិនបើយើងចាត់ទុកវាជាព្រះចន្ទនោះ ក៏ហាក់ដូចជាឲ្យតម្លៃជ្រុលហួសហេតុពេក ព្រោះវាត្រឹមជាអាចម៍ផ្កាយមួយដុំប៉ុណ្ណោះ ដែលមានឈ្មោះសម្គាល់ថា 2024 PT5។
អាចម៍ផ្កាយ 2024 PT5 ត្រូវបានរកឃើញដោយ បណ្តាញតេឡេស្កូបសង្កេតរកអាចម៍ផ្កាយគ្រោះថ្នាក់ ដើម្បីចេញសារព្រមាន (Asteroid Terrestrial-impact Last Alert System ឬ ATLAS) របស់ NASA កាលពីអំលុងខែសីហា ឆ្នាំ២០២៤ថ្មីៗនេះប៉ុណ្ណោះ ដោយវាមានប្រភពពីតំបន់ជង្រុកអាចម៍ផ្កាយតូចៗឈ្មោះ Arjuna ដែលគោចរជុំវិញព្រះអាទិត្យក្នុងគន្លងកៀកជាមួយផែនដីផងដែរ (ផែនដីមានគម្លាតជាមធ្យម ១៥០លានkm ពីព្រះអាទិត្យ) និងត្រូវបានចាត់បញ្ជូនទៅក្នុង វត្ថុអវកាសកៀកៗផែនដី (NEOs) ហើយ Arjuna និងផែនដី គោចរជុំវិញព្រះអាទិត្យក្នុងគន្លងដូចទ្រនាប់ជើងសេះ (បណ្តាក់គ្នា)។ ទោះជាយ៉ាងណា វានឹងមិនបង្កការគំរាមកំហែងដល់ភពផែនដីយើងឡើយ។
តើលោកអ្នកចង់ដឹងថា 2024 PT5 មានទំហំប៉ុណ្ណាទេ? ចម្លើយគឺវាមានមុខកាត់ចន្លោះ ១០-៤០ម៉ែត្រប៉ុណ្ណោះ។ ដូច្នេះទោះបីជាវាបានមកក្លាយជាព្រះចន្ទទី ២ ក៏មនុស្សលើផែនដីមិនអាចមើលឃើញវត្តមានរបស់វានោះដែរ។ ដូចអ្វីដែលយើងបានបញ្ជាក់ខាងលើនោះឯង យោងតាមលក្ខខណ្ឌបច្ចេកទេស នៃការកំណត់បុគ្គលិកលក្ខណៈរបស់ព្រះចន្ទ នោះវានឹងដើរតួជាព្រះចន្ទទី ២ មែនហើយ តែតាមការពិតជាក់ស្តែង វានឹងត្រឹមជាអាចម៍ផ្កាយតូចមួយ ដែលត្រូវបានឃាត់ទុកក្នុងគន្លងគោចរជុំវិញផែនដី មួយរយៈពេលខ្លីប៉ុណ្ណោះ។
សម្រាប់ការធ្លាក់ចូលក្នុងដែនទំនាញផែនដី និងក្លាយជាព្រះចន្ទមួយរយៈរបស់ 2024 PT5 នោះ នឹងចាប់ផ្តើមនៅថ្ងៃទី២៩ ខែកញ្ញា ហើយបញ្ចប់ទៅវិញនៅថ្ងៃទី២៥ ខែវិច្ឆិកា ឆ្នាំ២០២៤ (គិតតាមពេលវេលានៅសហរដ្ឋអាមេរិក) ខណៈក្រុមអ្នកវិទ្យាសាស្ត្រអាចដឹងបាន ព្រោះតែការត្រួតពិនិត្យលើល្បឿន និងគន្លងគោចរដែលវាកំពុងចល័តមកគឺ ៣,៥៤០km ក្នុងមួយម៉ោង ព្រមទាំងឱកាសដែលវានឹងត្រូវឃាត់ទុក ដោយដែនទំនាញផែនដីនៅពេលមកកៀកផែនដីបំផុតក្នុងចម្ងាយ ៤.៥លានkmនោះ។ បើតាម NASA អាចម៍ផ្កាយមួយនេះនឹងគោចរជុំវិញផែនដីជិត ២ខែ (៥៦.៦ថ្ងៃនៃពេលវេលាលើផែនដី) ហើយបន្ទាប់ពីនោះវានឹងរបូតចេញទៅកាន់គន្លងគោចរដើមនៅជុំវិញព្រះអាទិត្យវិញ។
គួរបញ្ជាក់ថា នោះនឹងមិនមែនជាលើកទី១ ដែលភពផែនដីមានព្រះចន្ទទី ២ មួយរយៈខ្លីនោះឡើយ។ ជាការពិត ភពផែនដីក៏ធ្លាប់ជួបបទពិសោធន៍បែបនេះរួចមកហើយ ក្នុងនោះមានដូចជាជាមួយអាចម៍ផ្កាយ 2020 CD3 ដែលបានគោចរជុំវិញផែនដីប៉ុន្មានឆ្នាំដែរ មុនរបូតចេញទៅវិញកាលពីឆ្នាំ២០២០ ព្រមទាំងអាចម៍ផ្កាយ 2022 NX1 ដែលបានចូលមកគោចរជុំវិញផែនដីកាលពីឆ្នាំ១៩៨១ និងបានរបូតចេញទៅវិញកាលពីឆ្នាំ២០២២ ហើយវាត្រូវបានគេរំពឹងថា នឹងមកម្តងទៀតនៅឆ្នាំ២០៥១៕
ប្រែសម្រួល៖ Cambo Space (ឥន្ទ វត្ថា)
ប្រភព៖ NASA (ថ្ងៃអាទិត្យ ទី២២ ខែកញ្ញា ឆ្នាំ២០២៤)
