(យូអិន)៖ មូលនិធិអង្គការសហប្រជាជាតិ សម្រាប់កុមារ ឬ អង្គការ UNICEF នៅថ្ងៃចន្ទសប្ដាហ៍នេះបានវាយតម្លៃថា ទារក ៣៨៦,០០០នាក់ ចាប់កំណើតនៅទូទាំងពិភពលោកបាន នៅថ្ងៃចូលឆ្នាំថ្មី ហើយ ៩០ភាគរយ នៅក្នុងតំបន់មិនសូវមានការអភិវឌ្ឍ (ប្រទេសក្រីក្រ និងកំពុងអភិវឌ្ឍន៍)។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅល្ងាចថ្ងៃអង្គារ ទី០២ ខែមករា ឆ្នាំ២០១៨។
យោងតាម UNICEF ចំនួនទារកចាប់កំណើតពាក់កណ្ដាល ត្រូវបានប៉ាន់ស្មាននៅក្នុងប្រទេសចំនួន ០៩ មានដូចជា ឥណ្ឌា India (៦៩,០៧០នាក់), ចិន (៤៤,៧៦០នាក់), នីហ្សេរីយ៉ា (២០,២១០នាក់), ប៉ាគីស្ថាន (១៤,៩១០នាក់), ឥណ្ឌូណេស៊ី (១៣,៣៧០នាក់), សហរដ្ឋអាមេរិក (១១,២៨០នាក់), សាធារណរដ្ឋប្រជាធិបតេយ្យកុងហ្គោ (៩,៤០០នាក់), អេត្យូពី (៩,០២០នាក់) និងបង់ក្លាដែស (៨,៣៧០នាក់)។ ប៉ុន្តែក្នុងចំណោមទារកទាំងអស់ខាងលើ មានទារកខ្លះគ្មានភ័ព្វសំណាងឆ្លងផុតថ្ងៃដំបូងរបស់ពួកគេ។
គួរបញ្ជាក់ថា កាលពីឆ្នាំ២០១៦ ទារកជាង ២,៦០០នាក់ ត្រូវបានគេប៉ាន់ស្មានថា បានស្លាប់នៅក្នុងរយៈ ២៤ម៉ោងដំបូង បន្ទាប់ពីកំណើតរបស់ពួកគេ ហើយបើតាម UNICEF ទារកជាង ២លាននាក់ មិនអាចឆ្លងផុតសប្ដាហ៍ដំបូងនៃជីវិតរបស់ពួកគេ គិតនៅក្នុងឆ្នាំដដែល។ ជាងនេះទៅទៀតទារក ២.៦លាននាក់ បានស្លាប់នៅក្នុងខែដំបូងរបស់ពួកគេ ខណៈក្នុងចំណោម ទារកទាំងនេះច្រើនជាង ៨០ភាគរយ ស្លាប់ដោយសារកើតមិនគ្រប់ខែ ពិបាកក្នុងការសម្រាល ការឆ្លងមេរោគ ឬក៏មានជំងឺរលាកសួតជាដើម៕
