ប្រទេសប៉េរូជាប់លេខ ១ ខាងផលិតមាសនៅអាមេរិកឡាទីន ប៉ុន្តែមកមើលកន្លែងជីករ៉ែនេះវិញ គួរឲ្យអាសូ…!
(លីម៉ា)៖ អំណោយផលទីតាំងភូមិសាស្ត្រ នៃប្រទេសប៉េរូ ពិតជាបានជួយសេដ្ឋកិច្ចប្រទេសនេះ ឲ្យរីកចំរើនលឿនដោយមិនបាច់ប្រឹងខ្លាំង ដូចបណ្តាប្រទេសភាគច្រើនលើលោកនោះឡើយ ព្រោះតែរ៉ែមាស និងប្រាក់កប់ពាសពេញក្រោមដី ត្រូវការតែអ្នកមានជំនាញ ធ្វើការជីក និងចម្រាញទៅជាផលិតផលសម្រេចប៉ុណ្ណោះ ប៉ុន្តែផលប៉ះពាល់ដល់បរិស្ថានវិញ ក៏ធំធេងទៅតាមសកម្មភាពនោះដែរ។ នេះបើតាមការរបាយការណ៍ថ្មី ចេញផ្សាយនាដើមឆ្នាំ២០១៨ ថ្មីៗកន្លងទៅនេះ។
ប្រទេសប៉េរូក៏មានផ្ទៃដីជាប់ព្រៃអាំម៉ាហ្សូណ ដែលជាគំរបទឹកភ្លៀង និងព្រៃឈើធំបំផុតនៅលើពិភពលោកផងដែរ ប៉ុន្តែនៅតំបន់នោះត្រូវបានក្រុមជំនាញដឹងថា មានបង្កប់រ៉ែមាសយ៉ាងច្រើនក្រាស់ក្រែល ដែលជាហេតុនាំឲ្យការជីករកខុសច្បាប់ មានការកើនឡើងយ៉ាងគំហុក។ ទោះបីជាសកម្មភាពស្របច្បាប់ ឬខុសច្បាប់ក៏ដោយ ប៉ុន្តែផលប៉ះពាល់ធ្ងន់ធ្ងរដល់ បរិស្ថាន គឺមិនអាចជៀសផុតឡើយ មានដូចជាការកាប់បំផ្លាញព្រៃឈើ ការបំពុលទឹក និងការបំផ្លាញជីវៈចំរុះជារួមតែម្តង។
សមាគមរ៉ែ ប្រេង និងថាមពលជាតិ នៃប្រទេសប៉េរូបានឱ្យដឹងថា ទីក្រុងលីម៉ានៅតែអាចរក្សាដំណែងជាអ្នកផលិតមាស នំាមុខគេនៅអាមេរិកឡាទីន និងធំជាងគេលំដាប់ទី០៦ នៅក្នុងពិភពលោកកាលពីឆ្នាំ២០១៧ ជាមួយការផលិតមាស ១៥១តោន កាលពីឆ្នាំមុន។
យោងតាមទិន្នន័យចេញផ្សាយកាលពីថ្ងៃអង្គារ ផលិតផលមាសធំជាងគេ គឺបានមកពីភាគខាងជើងតំបន់ ឡា លីប៊ឺតាដ (La Libertad) ចំនួន ៤៣តោន និងតំបន់ កាហ្សាម៉ារកា (Cajamarca) ចំនួន ៣៣តោន តាមពីក្រោយដោយភាគខាងត្បូង នៃតំបន់ អារ៉េឃ្វីប៉ា (Arequipa) ២០តោន តំបន់ អាយ៉ាគូចូ (Ayacucho) ១២តោន។
ចំណែកឯរ៉ែប្រាក់វិញ ប៉េរូគឺជាអ្នកផលិតប្រាក់ធំទី ០២ ក្នុងលោកកាលពីឆ្នាំមុន តាមពីក្រោយមិចស៊ីកូ ដោយផលិតបានប្រាក់ ៤,៣០៤តោន។ ជាងនេះទៅទៀត ប៉េរូ ក៏ត្រូវបានគេស្គាល់ផងដែរថា ជាអ្នកផលិតលោហៈដ៏ធំ ហើយ ៦០ភាគរយ នៃចំណូលពីការនាំ ចេញរបស់ខ្លួនបានមកពីឧស្សហកម្មរ៉ែ។
គួរបញ្ជាក់ថា នៅរយៈពេល ០៨ខែដំបូងកាលពីឆ្នាំ២០១៧ ប៉េរូបាននាំចេញរ៉ែគិតជាទឹកប្រាក់សរុប ១៦.៦៩៨ពាន់លានដុល្លារ ឬកើនឡើង ២៤ភាគរយ ខណៈការនាំចេញទង់ដែងសរុបជាទឹកប្រាក់ ៨.២៥២ពាន់លានដុល្លារ ឬកើនឡើង ៣៥ភាគរយ និងការនាំចេញមាសកើនដល់ ៥.១៦៤ពាន់លានដុល្លារ ឬកើនឡើង ០៧ភាគរយ បើធៀបទៅនឹងរយៈពេលដូចគ្នា កាលពីឆ្នាំ២០១៦៕
