(បរទេស)៖ តាមការសិក្សាស្រាវជ្រាវ ដោយមូលនិធិមហារីកពិភពលោក (The world Cancer Research Fund) បានរកឃើញថា អ្នកហាត់ប្រាណជាប្រចាំប្រមាណ ៣០នាទី ជារៀងរាល់ថ្ងៃ មានអត្រាប្រឈមតិច ចំពោះការកើតជំងឺមហារីក ពេលអាយុកើនឡើង។
ទាំងនេះអាចបណ្តាលឲ្យមានរួបរាងសមសួនមិនធាត់ ព្រោះការធាត់អាចឈានទៅរកជំងឺមហារីកបាន។
លោកវេជ្ជបណ្ឌិត រ៉ាឆេល ថមស៊ុន នៃមូលនិធិខាងលើបានឲ្យដឹងថា ខណៈនេះមានភស្តុតាង ដែលអះអាងយ៉ាងច្បាស់ថា ការហាត់ប្រាណក៏ជាកត្តាដ៏សំខាន់ ក្នុងការបង្ការជំងឺមហារីក និងមិនត្រូវគិតថា ទាល់តែហាត់ប្រាណខ្លាំងៗប៉ុណ្ណោះ ទើបអាចបង្ការជំងឺមហារីកបាននោះទេ ព្រោះមនុស្សជាច្រើន ដែលធ្វើការហាត់ប្រាណស្រាលៗជាប្រចាំរាល់ថ្ងៃ ដូចជាការដើរលឿន ការរត់ត្រឹកៗ ឬការឡើងចុះកាំជណ្តើរ ក៏អាចបង្ការជំងឺមហារីកបានដែរ។
ការហាត់ប្រាណមិនគ្រាន់តែជួយបន្ថយអត្រាប្រឈម នឹងជំងឺមហារីកប៉ុណ្ណោះទេ ប៉ុន្តែក៏ជួយបង្ការការបាត់បង់ជីវិត ដោយសារជំងឺបេះដូង ឬជំងឺដាច់សសៃឈាមក្នុងខួរក្បាល រួមទាំងបន្ថយឱកាស នៃការកើតជំងឺទឹកនោមផ្អែមបានទៀតផង។
ដូច្នេះបន្ទាប់ពីបានអានអត្ថបទនេះរួច បងប្អូនអាចចាប់ផ្តើមបង្កើតទម្លាប់ហាត់ប្រាណ ក្នុងរយៈពេល ៣០នាទីយ៉ាងតិចជាប្រចាំថ្ងៃ គឺមិនមែនជារឿងលំបាកនោះទេ ព្រោះថា បើសិនជាលោកអ្នក បណ្តោយឲ្យរាងកាយកាន់តែធាត់ ឬមិនបញ្ចេញជាតិពុលជាប្រចាំទេនោះ វានឹងអាចបង្កជំងឺជាច្រើន ដែលគេចមិនផុត៕
