ចង់ស្រកគីឡូឆាប់ សូមកុំជ្រើសវិធីបង្អត់អាហារឲ្យសោះ ព្រោះវានឹងបង្កបញ្ហាធំ…
(បរទេស)៖ ការបង្អត់អាហារជាប្រការគ្រោះថ្នាក់បំផុត ហើយការអត់អាហារ គឺជារឿងមួយដែលអ្នកទាំងអស់គ្នា គួរតែជៀសវាងពីព្រោះ វានឹងធ្វើឲ្យស្បែករបស់អ្នក មានសភាពស្ងួត ក្រិន និងជ្រីវជ្រួញបានយ៉ាងងាយ ដោយសារតែខ្វះសារធាតុអាហារ ដែលសម្រាប់ចិញ្ចឹមកោសិកាស្បែកទាំងនោះ។ ដូច្នេះហើយប្រសិនបើអ្នកចង់សម្រកទំងន់ នោះអ្នកមិនត្រូវបង្អត់អាហារជាដាច់ខាត។ នេះបើតាមវែបសាយសុខភាពសកល។
ផ្ទុយទៅវិញអ្នកគ្រាន់តែ កំណត់អាហារ ដែលគួរទទួលទានឲ្យបានត្រឹមត្រូវ និងព្យាយាមហាត់ប្រាណឲ្យបានច្រើន។ ម្យ៉ាងវិញទៀត ប្រសិនបើអ្នកចង់កាត់បន្ថយរបស់អាហារនៅពេលណាមួយ អ្នកត្រូវទទួលទានទឹកដោះគោឆៅបន្ថែម ឬទឹកដោះគោជូរមួយកែវ គឺរឹតតែប្រសើរ។ ទឹកផ្លែឈើស្រស់ពីធម្មជាតិ គឺជាជម្រើសយ៉ាងប្រសើរសម្រាប់អ្នក ដូចញុំាក្រូចមុនម៉ោង ៩៖០០នាទីព្រឹក, ញុំាទឹកការ៉ុតពេលធ្វើការងារ ប្រើភ្នែកច្រើន និងញុំាទឹកផ្លែឈើ ឬផ្លែឈើជូរៗពេលមានអារម្មណ៍ឈឺក្បាល និងមិនស្រស់ស្រាយ។
ងាកទៅកាន់ចំណុចសំខាន់បន្ថែមទៀត ការអត់អាហារក្រៅពីមានផលប៉ះពាល់ចំពោះស្បែកហើយ វាថែមទាំងធ្វើឲ្យកែវភ្នែកមានសភាពស្រអាប់ មិនស្រស់ថ្លា និងមានផលប៉ះពាល់យ៉ាងធ្ងន់ធ្ងរដល់សុខភាព និងផ្នែកផ្សេងៗនៃសារពាង្គកាយផងដែរ ព្រោះគ្រប់សារីរាង្គលើដងខ្លួនរបស់មនុស្ស ត្រូវការសារធាតុចិញ្ចឹមគ្រប់រសជាតិទាំងអស់ ពីរបបអាហារដែលយើងទទួលទានទាំង ០៣ពេល បើខ្វះមួយពេល គឺនឹងមានបញ្ហា។
វិធីសាស្ត្រល្អ៖ ការបង្អត់អាហារ មិនមែនមិនអាចធ្វើសោះនោះទេ ប៉ុន្តែអ្នកគួរប្តូរមកធ្វើការបន្ថយអាហារវិញ ដោយមិនត្រូវញុំាអាហារណា ដែលមានជាតិខ្លាញ់ និងខេឡេស្តូរ៉ូលច្រើនពេក ដូចជា ភ្លៅមាន់បំពង សាច់ជ្រូកបីជាន់ សាច់គោជាប់ខ្លាញ់ និងគ្រឿងសមុទ្រ នោះឡើយ (លើកលែងត្រី) ព្រោះទាំងអស់នេះ សុទ្ធសឹងតែជាអាហារងាយធ្វើឲ្យអ្នកធាត់ លើសឈាម និងកើតជំងឺឡើងជាតិអាស៊ីដ។
មួយវិញទៀត ការហាត់ប្រាណមួយថ្ងៃយ៉ាងតិច ៣០នាទី តាមរយៈការរត់តិចៗ រាំងកម្សាន្ត គ្រវីកង លើកដុំដែក និងផ្សេងៗទៀត ដែលនាំឲ្យអ្នកចេញញើស និងជាតិពុលនោះ ក៏ជារឿងដែលកាន់តែប្រសើរផងដែរ ព្រោះវានឹងធ្វើឲ្យខួរក្បាលអ្នកដំណើរការបានល្អ និងគេងឆាប់លក់ ហើយងើបពីដំណេកឡើងវិញ ប្រកបដោយអារម្មណ៍ស្រស់ថ្លា ដើម្បីបំពេញការងារប្រចាំថ្ងៃ ប្រកបដោយប្រសិទ្ធភាព៕