Nokia ចេញម៉ូដែលថ្មីជាលើកដំបូងហើយ មានឈ្មោះថា «Nokia 6» ដើរដោយ Android Nougat
(ហ្វាំងឡង់)៖ HMD ជាក្រុមហ៊ុនគ្រប់គ្រងលើស្លាកសញ្ញា Nokia ដែលធ្លាប់ល្បីល្បាញរាប់ទសវត្សរ៍នៅលើសកលលោក និងបានបាត់មុខលើទីផ្សារអស់ជាច្រើនឆ្នាំមកហើយនោះ ទីបំផុតបានប្រកាសឲ្យដឹងថា ក្រុមហ៊ុន Nokia នឹងត្រឡប់មកកាន់ទីផ្សារស្មាតហ្វូនវិញ ជាមួយស្មាតហ្វូនថ្មី ដែលមានឈ្មោះថា «Nokia 6» ប្រើប្រាស់ប្រព័ន្ធដំណើរការ Android ជំនាន់ចុងក្រោយ។ នេះបើតាមការចេញផ្សាយដោយទីភ្នាក់ងារព័ត៌មានចិនស៊ិនហួរ នាព្រឹកថ្ងៃចន្ទ ទី០៩ ខែមករា ឆ្នាំ២០១៧។
យោងតាមសេចក្តីប្រកាសព័ត៌មានរបស់ក្រុមហ៊ុនខាងលើ ទូរស័ព្ទដែលនឹងចេញលក់នៅដើមឆ្នាំ២០១៧ នេះគឺមានគោលដៅឆ្ពោះទីកាន់ទីផ្សារប្រទេសចិន ដែលជាទីផ្សារស្មាតហ្វូនធំជាងគេបំផុតនៅលើពិភពលោក ហើយសម្រាប់ទូរស័ព្ទដែលចាត់ទុកជាម៉ូដែលថ្មីប្រកបដោយការរចនាទាក់ទាញ និងមានបំពាក់នូវបច្ចេកវិទ្យាទំនើបៗចុងក្រោយនេះ នឹងដាក់លក់ក្នុងតម្លៃដ៏ប្រកួតប្រជែងបំផុត គឺ ២៤៥ដុល្លារអាមេរិក។
លោក Arto Nummela នាយកប្រតិបត្តិនៃក្រុមហ៊ុន HMD Global បាននិយាយថា «យើងព្យាយាមជំរុញល្បឿនទៅមុខ ដើម្បីបង្កើតនូវតួនាទីស្នូលមួយនៃម៉ាកសញ្ញាស្មាតហ្វូន»។ ក្រុមហ៊ុន HMD មានមូលដ្ឋាននៅទីក្រុង Espoo ប្រទេសហ្វាំងឡង់ ដែលបានទទួលសិទ្ធិគ្រប់គ្រងលើស្លាកសញ្ញា Nokia រយៈពេល ១០ឆ្នាំក្រោយពីស្លាកសញ្ញាដែលធ្លាប់មានឥទ្ធិពលលើលោកនេះ បានដាច់ចេញពីក្រុមហ៊ុន Microsoft។
គួរបញ្ជាក់ថាលក្ខណៈពិសេសមួយចំនួន នៃ Nokia 6 គឺវាមានបំពាក់បន្ទះឈីប Qualcomm Snapdragon 430 ដែលមាន Processor X6 LTE, Ram 4GB, មេម៉ូរីក្នុងម៉ាស៊ីន 64GB, អេក្រង់ 5.5អ៊ីញ (2.5D + FHD), ថាមពលថ្ម 3,000mAh, កាមេរ៉ាធំ 16MP និងដំណើរការដោយប្រព័ន្ធ Android ជំនាន់ចុងក្រោយបំផុត Nougat។ ក្រុមហ៊ុនរំពឹងថា Nokia 6 នឹងអាចស្តារមុខមាត់របស់ខ្លួនឡើងវិញ ខណៈដែលវាបានចាប់ផ្តើមខាតបង់នៅចុងទសវត្សរ៍ឆ្នាំ ២០០០ រហូតមកដល់បច្ចុប្បន្ន៕
