ពេលនេះអង្គការ NASA មានប្រធានថ្មីហើយ ដែលប្តេជ្ញាធ្វើតាមគោលនយោបាយ លោក ដូណាល់ ត្រាំ…
(វ៉ាស៊ីនតោន)៖ ទីបំផុតលោក Jim Bridenstine ត្រូវបានព្រឹទ្ធសភាអាមេរិកអនុម័តឲ្យឡើងកាន់តំណែងជាប្រធានអង្គការ NASA ថ្មីហើយ បន្ទាប់ពីប្រធានាធិបតី លោក ដូណាល់ ត្រាំ បានណែនាំឈ្មោះលោកទៅកាន់សភា អស់រយៈពេល០៧ខែទៅហើយនោះ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នារសៀលថ្ងៃសុក្រ ទី២០ ខែមេសា
លោក Jim បានថ្លែងស្វាគមន៍ ចំពោះការទទួលស្គាល់រូបលោក ពីសំណាក់ព្រឹទ្ធសភាយ៉ាងដូច្នេះថា «វាជាពិសេសជាកិត្តិយសមួយ ដែលខ្ញុំត្រូវបានទទួលស្គាល់ដោយព្រឹទ្ធសភា នៃសហរដ្ឋអាមេរិក ដើម្បីកាន់តំណែងជាអ្នកដឹកនាំអង្គការ NASA។ ខ្ញុំទន្ទឹងរង់ចាំការបំពេញការងារជាមួយក្រុមការងារដ៏ជំនាញ របស់អង្គការអវកាសនេះ ដើម្បីសម្រេចឲ្យបាននូវទស្សនវិស័យរបស់លោកប្រធានាធិបតី (ត្រាំ) សម្រាប់ភាពជាអ្នកដឹកនាំរបស់សហរដ្ឋអាមេរិក នៅក្នុងវិស័យអវកាស»។
គួរបញ្ជាក់ថា លោក Jim គឺជាអាកាសយានិកមួយរូប នៃកងទ័ពអាកាសសហរដ្ឋអាមេរិក និងជាអតីតនាយកសារៈមន្ទីរអាកាស និងអវកាស Tulsa Air និង Planetarium ផងដែរ។ លោកត្រូវបានជ្រើសតាំងឲ្យចូលទៅក្នុងសភា កាលពីឆ្នាំ២០១២ ដើម្បីធ្វើជាសមាជិកសភាតំណាងស្រុកមួយ នៃរដ្ឋអូក្លាហូម៉ា។ កាលពីពេលថ្មីៗនេះ លោក Jim ក៏ត្រូវបានតែងតាំងជាសមាជិក នៃគណកម្មាធិការបច្ចេកវិទ្យា វិទ្យាសាស្ត្រ និងអវកាស នៃគណកម្មាធិការយោធា របស់សភាសហរដ្ឋអាមេរិក ហើយឥឡូវនេះទើបក្លាយប្រធានអង្គការ NASA។
បើតាមការលើកឡើងរបស់ លោក ត្រាំ កាលពីចុងឆ្នាំ២០១៧ គឺប្រធានាធិបតីអាមេរិករូបនេះមានបំណងចង់ «ស្តារការដឹកនាំរបស់អាមេរិក នៅទីអវកាសឡើងវិញ» តាមរយៈការបោះជំហានធំ ទៅស្រាវជ្រាវនៅលើឋានព្រះច័ន្ទ ប្រកបដោយសក្តានុពលជាងមុន ដោយមិនមែនគ្រាន់តែបញ្ជូនមនុស្សទៅបន្សល់ទុកដានជើង ដោតទង់ជាតិលើឋានព្រះច័ន្ទ ហើយនាំគ្នាត្រឡប់មកផ្ទះវិញដូចកាលពីប៉ុន្មានទសវត្សរ៍មុននោះឡើយ។
សេចក្តីថ្លែងការណ៍របស់ លោក Robert Lightfoot អតីតប្រធានរដ្ឋបាល នៃអង្គការ NASA បានឲ្យដឹងថា «អង្គការ NASA ទន្ទឹងរង់ចាំ ការគាំទ្រដោយផ្ទាល់ប្រកបដោយប្រយុទ្ធសាស្ត្រភ្លឺស្វាង ពីសំណាក់លោកប្រធានាធិបតី ដែលជួយឲ្យយើងបំរើការងារ ក្នុងការបញ្ជូនមនុស្សទៅកាន់ឋានព្រះច័ន្ទឡើងវិញ និងធ្វើដំណើរទៅកាន់ភពអង្គារ ព្រមទាំងបើកចំហទ្វារទៅរកទីអវកាសឆ្ងាយៗផងដែរ»។
គួររំលឹកថា នយោបាយអវកាសថ្មីរបស់ លោក ដូណាល់ ត្រាំ ដែលត្រូវបានចុះហត្ថលេខាទទួលស្គាល់កាលពីអំឡុងចុងឆ្នាំ២០១៧នោះ គឺផ្តោតសំខាន់លើចំណុចធំៗមួយចំនួនដូចជា ការធ្វើកិច្ចសហការរវាងស្ថាប័នរដ្ឋ និងឯកជនលើការអភិវឌ្ឍកម្មវិធីអវកាស, ការកសាងហេដ្ឋារចនាសម្ព័ន្ធ សម្រាប់ជម្រុញការស្រាវជ្រាវទីអវកាសឆ្ងាយៗ, ការអភិវឌ្ឍវិស័យអវកាស ដើម្បីឲ្យអាមេរិកនៅតែបន្តនាំមុខគេ និងការពុះពារទៅរកបេសកកម្មថ្មីៗប្លែកៗ ព្រមទាំងការស្វែងរករបកគំហើញថ្មីៗ និងបច្ចេកវិទ្យាដែលអាចរុញច្រានអាមេរិក ទៅរកអនាគតភ្លឺស្វាងផងដែរ៕
