ទម្លាយគំរោងយក្សរបស់អង់គ្លេស «ដែលចង់កសាងនាវាចម្បាំងទឹកកក» កាលពីសម័យសង្គ្រាមលោក តែត្រូវបរាជ័យ…
(អាមេរិក)៖ កាលពីសម័យសង្រ្គាមលោកលើកទីពីរ ចក្រភពអង់គ្លេស បានរៀបចំគម្រោងសម្ងាត់ ដើម្បីបង្កើតសព្វាវុធលើផ្ទៃទឹកដ៏ចម្លែកមួយ ដើម្បីទប់ទល់នឹងប្រទេសអាល្លឺម៉ង់។ នេះបើតាមការដកស្រង់ការផ្សាយចេញពី វែបសាយនៃស្ថានីយទូរទស្សន៍ CNN នៅល្ងាចថ្ងៃសុក្រ ទី២៧ ខែមេសា ឆ្នាំ២០១៨។
ក្នុងកិច្ចប្រឹងប្រែងរិះរកវិធីសាស្រ្ត ដើម្បីយកឈ្នះលើនាវា U-Boat ដ៏សាហាវរបស់អាល្លឺម៉ង់ ចក្រភពអង់គ្លេស បានរកឃើញគំនិតយ៉ាងចម្លែកមួយ គឺការបង្កើតនាវាដឹកយន្តហោះចេញពីផ្ទាំងទឹកកក ដោយសារតែពួកវាធំអាចផ្តល់ធនធានបានគ្រប់គ្រាន់ និងឥតគិតថ្លៃ ហើយត្រូវគេជឿជាក់ថា មិនអាចពន្លិចបានថែមទៀតផង។ ទោះបីជាគំនិតនេះស្តាប់មើលទៅគួរឲ្យអស់សំណើចយ៉ាងណាក្តី គម្រោងសម្ងាត់នេះ បានទទួលការអនុញ្ញាតដោយផ្ទាល់ពី លោក Winston Churchill ដែលជានាយករដ្ឋមន្រ្តីអង់គ្លេសនាសម័យនោះ។
គួរជម្រាបថា នាវាគំរូមួយត្រូវបានគេបង្កើតឡើង និងធ្វើតេស្តនៅឯបឹង Patricia ក្នុងប្រទេសកាណាដា សម្រាប់រយៈពេល០៤ខែ ប៉ុន្តែខណៈពេលវេលាបានបន្តទៅមុខ ការចំណាយក្នុងគម្រោងនេះបានកើនឡើងកាន់តែខ្ពស់ ហើយបញ្ហាផ្សេងៗក៏បានលេចឡើងជាបន្តបន្ទាប់ រហូតទាល់តែចុងក្រោយគម្រោងអភិវឌ្ឍន៍នាវាទឹកកកនេះ ត្រូវបានគេសម្រេចបោះបង់ចោល។
នាវាចម្បាំងទឹកកកខាងលើ ត្រូវបានគេស្នើឡើងថា នឹងមានបណ្តោយប្រវែង ៦១០ម៉ែត្រ និងទទឹងប្រវែង ៦០ម៉ែត្រ ជាមួយទម្ងន់ជាង ០២លានតោន និងទីធ្លាគ្រប់គ្រាន់សម្រាប់ផ្ទុកយន្តហោះចម្បាំងចំនួន ៣០០គ្រឿង ហើយធ្វើដំណើរក្នុងល្បឿន ១៣គីឡូម៉ែត្រក្នុងមួយម៉ោង ព្រមទាំងអាចទប់ទល់ជាមួយរលកកម្ពស់រហូតដល់ ១៥ម៉ែត្របាន។
គម្រោងនាវាចម្បាំង Habbakuk គឺជាគំនិតផ្តួចផ្តើមរបស់អ្នកវិទ្យាសាស្រ្តម្នាក់ឈ្មោះ Geoffrey Pyke របស់ចក្រភពអង់គ្លេស ដែលព្យាយាមរកមធ្យោបាយដើម្បីការពារនាវារបស់ក្រុមសម្ព័ន្ធមិត្ត Allied នៅឯតំបន់នៅពាក់កណ្តាលមហាសមុទ្រអាត្លង់ទិកទឹកកក ជាទីដែលនាវាមុជទឹក U-Boat របស់ពួកណាហ្ស៊ី (Nazi) អាល្លឺម៉ង់ ឈរជើងនៅផុតពីចម្ងាយវាយប្រហារ របស់យន្តហោះចម្បាំងរបស់ Allied៕
