ទីក្រុងនៃប្រទេសអាស៊ានទាំង ១០ ដែលមានមនុស្សរស់នៅច្រើនជាងគេ! តើភ្នំពេញជាប់លេខប៉ុន្មាន ហើយទីក្រុងណាជាប់លេខ ១…?
(ភ្នំពេញ)៖ គិតមកទល់ថ្ងៃទី៣០ ខែមេសា ឆ្នាំ២០១៨នេះ គឺជាខួបទី ១៩ឆ្នាំគត់ ដែលកម្ពុជាបានក្លាយខ្លួនជាសមាជិកទី ១០ និងជាកូនពៅរបស់សមាគមប្រជាជាតិអាស៊ីអាគ្នេយ៍ហៅកាត់ថា អាស៊ាន (ASEAN) ហើយក្នុងនោះកម្ពុជាបានកសាងទំនាក់ទំនងប្រជាមួយសមាជិកនានា និងអភិវឌ្ឍន៍សេដ្ឋកិច្ចរបស់ខ្លួនបានយ៉ាងល្អប្រសើរ មកទល់នឹងពេលបច្ចុប្បន្ននេះ។
ជាក់ស្តែងទីក្រុងភ្នំពេញដែលធ្លាប់រងគ្រោះដោយសង្គ្រាមរាប់ទសវត្សរ៍ ប្រែជាកន្លែងរស់នៅប្រកបដោយភាពស៊ីវីល័យ និងការអភិវឌ្ឍមិនចាញ់បណ្តាប្រទេសមួយចំនួននៅអាស៊ាននោះឡើយ។ សម្រាប់ចំនួនប្រជាជននៅទីក្រុងភ្នំពេញ និងទីក្រុងធំៗនានាក្នុងប្រទេសទាំង ៩ ទៀតរបស់អាស៊ាននោះ គឺមានការកើនឡើងពីមួយឆ្នាំទៅមួយឆ្នាំ ដោយសារតែចរន្តនៃការអភិវឌ្ឍសេដ្ឋកិច្ច និងធ្វើចំណាកស្រុក។ ដូច្នេះ តើទីក្រុងណានៅអាស៊ានដែលមានប្រជាជនរស់នៅច្រើនជាងគេ? តើរាជធានីភ្នំពេញរបស់ព្រះរាជាណាចក្រយើង មានចំនួនប្រជាជនស្ថិតនៅក្នុងលំដាប់ទីប៉ុន្មាន? សូមតាមចម្លើយជាបន្តបន្ទាប់ដូចខាងក្រោម៖
១០៖ ទីក្រុងបង់ដាសេរីបេហ្គាវ៉ាន់ នៃប្រទេសប្រ៊ុយណេ៖ រាជាណាចក្រប្រ៊ុយណេមានផ្ទៃដីតូច ហើយប្រជាជនក៏តិចផងដែរ គឺតែ ៤២៣,១៩៦នាក់ប៉ុណ្ណោះ (តួលេខឆ្នាំ២០១៦)។ សម្រាប់ប្រជាជនរស់នៅទីក្រុងនេះ គឺមានចំនួនតែជាង ១០០ពាន់នាក់ប៉ុណ្ណោះ។
០៩៖ ទីក្រុងវៀងច័ន្ទ នៃប្រទេសឡាវ៖ ជាប្រទេសមួយដែលគ្មានព្រំដែនជាប់សមុទ្រនោះទេ ហើយប្រជាជាតិអាស៊ានមួយនេះ មានប្រជាជនសរុបចំនួន ៦,៧៥៨,៣៥៣នាក់ (តួលេខឆ្នាំ២០១៦)។ សម្រាប់ចំនួនប្រជាជនក្នុងទីក្រុងវៀងច័ន្ទវិញ គឺស្ថិតនៅខ្ទង់ ២០០,០០០នាក់។
០៨៖ ទីក្រុងភ្នំពេញ នៃប្រទេសកម្ពុជា៖ បើគិតតាមតួលេខឆ្នាំ២០១៨នេះ ប្រជាជនកម្ពុជាសរុបមានចំនួន ១៦,២៤៥,៧២៩នាក់។ សម្រាប់ទីក្រុងភ្នំពេញវិញ គឺប្រជាជនដែលរស់នៅទីនេះជាអចិន្ត្រៃយ៍ មានចំនួនរហូតដល់ទៅដល់ជាង ២លាននាក់។
០៧៖ ទីក្រុងសិង្ហបុរី នៃប្រទេសសិង្ហបុរី៖ ពិតប្រាកដណាស់ ប្រទេសមានសេដ្ឋកិច្ចអភិវឌ្ឍន៍ខ្លាំងក្លានេះ គឺមានឈ្មោះប្រទេស និងទីក្រុងតែមួយ ដោយមានប្រជាជនរស់នៅសរុបជាង ៥.៦លាននាក់ (តួលេខឆ្នាំ២០១៦)។
០៦៖ ទីក្រុងគូឡាឡាំពួ នៃប្រទេសម៉ាឡេស៊ី៖ នៅឆ្នាំ២០១៨នេះ ប្រទេសម៉ាឡេស៊ីមានប្រជាជនកើនឡើងដល់ជិត ៣២លាននាក់ហើយ។ ទីក្រុងគូឡាឡាំពួដ៏ល្អឆើតឆាយ និងល្បីល្បាញខ្លាំងនៅអាស៊ាន មានប្រជាជនរស់នៅសរុបជិត ៧.២៥លាននាក់ គិតទាំងតំបន់ដ៏មានសក្តានុពលដែលព័ទ្ធជុំវិញ។
០៥៖ ទីក្រុងរ៉ង់ហ្គូន នៃប្រទេសមីយ៉ាន់ម៉ា៖ គិតត្រឹមតួលេខឆ្នាំ២០១៦ សហភាពមីយ៉ាន់ម៉ាមានប្រជាជានសរុបជិត ៥៣លាននាក់។ ដោយឡែកអតីតរដ្ឋធានីដែលមានឈ្មោះថា រ៉ង់ហ្គូន ឬយាំងហ្គន់ គឺមានប្រជាជនរស់នៅរហូតដល់ទៅជាង ៧.៧លាននាក់។
០៤៖ ទីក្រុងហាណូយ នៃប្រទេសវៀតណាម៖ យើងតាមស្ថិតិឆ្នាំ២០១៦ ប្រជាជនវៀតណាមសរុបមានចំនួនរហូតដល់ទៅ ៩៤.៥លាននាក់ឯណោះ។ សម្រាប់ទីក្រុងហាណូយវិញ ប្រជាជនដែលរស់នៅទីនោះមានសរុបជិត ៨លាននាក់ហើយ។
០៣៖ ទីក្រុងម៉ានីល នៃប្រទេសហ្វីលីពីន៖ តួលេខនៅឆ្នាំ២០១៦ ប្រទេសហ្វីលីពីនមានប្រជាជានសរុបរហូតដល់ទៅ ១០៣.៣លាននាក់។ ដោយឡែកទីក្រុងម៉ានីលដ៏ធំធេង គឺមានប្រជាជនសរុបរហូតដល់ទៅជាង ១៣លាននាក់ហើយ។
០២៖ ទីក្រុងបាងកក នៃប្រទេសថៃ៖ តួលេខឆ្នាំ២០១៦បង្ហាញថា ប្រជាជនថៃសរុបមានចំនួន ៦៨.៨៦លាននាក់។ ដោយឡែកប្រជាជនដែលរស់នៅតំបន់សក្តានុពលជុំវិញ និងក្នុងទីក្រុងបាងកក គឺមានសរុបរហូតដល់ទៅ ១៤លាននាក់ឯណោះ។
០១៖ ទីក្រុងហ្សាការតា នៃប្រទេសឥណ្ឌូណេស៊ី៖ ប្រជាជាតិយក្សប្រចាំតំបន់អាស៊ាន និងលេខ ៣ ប្រចាំតំបន់អាស៊ីនេះ មានប្រជាជនសរុប ២៦១.១លាននាក់ (តួលេខឆ្នាំ២០១៦)។ ដោយឡែកទីក្រុងហ្សាការតាវិញ គិតទាំងតំបន់មានសក្តានុពលជុំវិញ និងក្នុងទីក្រុងតែម្តង សរុបចូលគ្នាមានប្រជាជនរហូតដល់ទៅជាង ៣០លាននាក់៕
ប្រភព៖ Wikipedia
