ស្ថានីយបណ្តែតលើសមុទ្រទឹកកក នឹងត្រូវកសាងឡើងនៅឆ្នាំក្រោយ, រុស្ស៊ីបន្តការស្រាវជ្រាវរឹតតែខ្លាំង នៅមហាសមុទ្រអាក់ទិច…
(ម៉ូស្គូ)៖ ការដ្ឋានសាងសង់ស្ថានីយស្រាវជ្រាវ ដែលធុននឹងទឹកកកនៅតំបន់ប៉ូលខាងជើង ដែលត្រូវបានរចនាឡើង ដើម្បីសិក្សាពីមហាសមុទ្រអាក់ទិចនោះ នឹងចាប់ផ្តើមនៅទីក្រុង Saint Petersburg នាឆ្នាំ២០១៩។ នេះបើតាមការឲ្យដឹងពីសំណាក់រដ្ឋមន្រ្តីធនធានធម្មជាតិ និងបរិស្ថានរុស្ស៊ី លោក ស៊ឺហ្គៃ ដុនស្កុយ (Sergei Donskoy) ដកស្រង់សម្តីដោយសារព័ត៌មានរុស្ស៊ី Sputnik នៅរសៀលថ្ងៃចន្ទ ទី០៧ ខែឧសភា ឆ្នាំ២០១៨។
បើតាមលោក Sergei Donskoy សំណាក់កាលនៃការកំណត់តម្រូវការផ្នែកបច្ចេកទេស កំពុងត្រូវត្រៀមរៀបចំនាពេលនេះ ខណៈដំណាក់កាលរចនានឹងចាប់ផ្តើមនាពេលឆាប់ៗខាងមុខ ខណៈដំណាក់កាលនៃការសាងសង់ នឹងត្រូវប្រព្រឹត្តទៅនាឆ្នាំក្រោយ។ លោក Donskoy ក៏បានសង្កត់ធ្ងន់ផងដែរថា ស្ថានីយតាមដានសមុទ្រទឹកកកអណ្តែតទឹកនេះ នឹងប្លែកខុសពីគេ ហើយមានភាពលំបាកខ្លាំង ក្នុងការសាងសង់ឡើង។
គួរជម្រាបថា ស្ថានីយខាងលើ នឹងត្រូវប្រើប្រាស់សម្រាប់ការធ្វើការសិក្សាស្រាវជ្រាវ នៅសមុទ្រអាក់ទិច ខណៈមានការអង្កេតពីលោកខាងលិចមិនដាក់ភ្នែក អំពីការបង្កើនឥទ្ធិពលសន្សឹមរបស់រុស្ស៊ី នៅតំបន់មហាសមុទ្រទឹកកកអាក់ទិច ដែលរុស្ស៊ីមានសិទ្ធិស្ទើរតែពាក់កណ្តាល ដោយសារតែផ្ទៃប៉ូលខាងជើង ដ៏ធំធេងរបស់ប្រទេសនេះ។
រំលឹកព័ត៌មាន៖ តាមព័ត៌មានដែលបានចេញផ្សាយ កាលពីចុងខែមេសា កន្លងទៅនេះ សហរដ្ឋអាមេរិកបានប្រកាសថា យុទ្ធសាស្រ្តថ្មីរបស់ខ្លួន ពាក់ព័ន្ធនឹងប្រតិបត្តិការនៅតំបន់សមុទ្រទឹកកកអាក់ទិច (ប៉ូលខាងជើង) នឹងត្រូវដាក់ចេញនៅររដូវក្តៅនាឆ្នាំ២០១៨ (ចន្លោះអំឡុងចុងខែមិថុនា និងខែសីហា) ដើម្បីឆ្លើយតបចំពោះការស្ថានភាពកាន់តែយាប់យឺន នៃការរលាយផ្ទៃទឹកកកនៅទីនោះ ដែលជាកត្តាចម្បងមួយ មិនអាចទប់ស្កាត់បានទៀតឡើយ។
មេបញ្ជាការទ័ពជើងទឹកអាមេរិក លោក Richard Spencer បានប្រាប់ក្រុមអ្នកសារព័ត៌មានថា កងទ័ពជើងទឹក ត្រូវការធ្វើកំណែប្រែយុទ្ធសាស្រ្តតំបន់អាក់ទិចរបស់ខ្លួន ដែលត្រូវបានប្រើប្រាស់បន្តមកទល់ពេលនេះ តាំងតែពី០៤ឆ្នាំមុន ពីព្រោះថាបញ្ហាបម្រែបម្រួលអាកាសធាតុលើសាកលលោកបាន និងកំពុងបង្កឲ្យផ្ទាំងទឹកកនៅសមុទ្រដ៏ត្រជាក់នេះ រលាយក្នុងកម្រិតគួរឲ្យបារម្ភខ្លាំង។
ជាមួយគ្នានេះ លោក Spencer ក៏បានសង្កត់ធ្ងន់ផងដែរថា ការកើនឡើងនៃសកម្មភាពរបស់រុស្ស៊ី នៅក្នុងតំបន់អាក់ទិច គួរតែត្រូវផ្តោតការយកចិត្តទុកដាក់ឲ្យបានហ្មត់ចត់បន្តិច។ បើតាមលោក Spencer រុស្ស៊ីកំពុងត្រួសត្រាយបង្កើតផ្លូវធ្វើដំណើរមួយខ្សែប្រវែង ៣.៦គីឡូម៉ែត្រនៅទីនោះ ក្រោមហេតុផលបង្កើនកិច្ចប្រឹងប្រែង ក្នុងសមត្ថភាពរុករក និងជួយសង្រ្គោះ។
គួរជម្រាបថា ខណៈក្រសួងការពារជាតិអាមេរិក បានដាក់ចេញយុទ្ធសាស្រ្តការពារជាតិ ដែលមានភាពកោងកាចជាងមុននោះ គោលនយោបាយថ្មីសម្រាប់តំបន់មហាសមុទ្រទឹកកកអាក់ទិច ត្រូវគេរំពឹងថា នឹងដើរតាមទំនោរដូចគ្នា។ ម៉្យាងវិញទៀត កងកម្លាំងការពារដែនសមុទ្រអាមេរិក ក៏បានដាក់សំណើបំពាក់ប្រព័ន្ធមីស៊ីលប្រដេញប្រឆាំងនាវា នៅលើនាវាបំបែកទឹកកករបស់ខ្លួនផងដែរ ខណៈដែលកងម៉ារីនចំនួន ៣០០នាក់ ត្រូវបានគេអះអាងកំពុងធ្វើការហ្វឹកហាត់នៅក្នុងប្រទេសន័រវែស ដើម្បីសិក្សាពីការប្រយុទ្ធក្រោមអាកាសធាតុត្រជាក់។
សម្រាប់ការផ្លាស់ប្តូរយុទ្ធសាស្ត្រនេះ គឺមិនមែនដោយសារតែមូលហេតុនៃការរលាយទឹកកកអ្វីនោះឡើយ ដោយអ្នកតាមនានាបានដឹងថា ប្រទេសរុស្ស៊ីដែលមានព្រំដែនស្ទើរមួយចំហៀងតែម្តង នៃមហាសមុទ្រទឹកកកអាក់ទិចនោះ បានបង្កើតប្រតិបត្តិការទាញយកធនធាន និងដាក់មូលដ្ឋានយោធា-ស្រាវជ្រាវជាច្រើនរួចទៅហើយ។ ដោយឡែកខាងអាមេរិកឯណេះវិញក៏មិនបាននៅស្ងៀមនោះដែរ បើនិយាយពីដៃគូអាមេរិកនៅជុំវិញដែនសមុទ្រទឹកកកនេះ គឺមានដូចជា កោះហ្គ្រីនលែន (កម្មសិទ្ធិរបស់ប្រទេសដាណឺម៉ាក), ប្រទេសន័រវែស, អាយឡេន, និងកាណាដា ជាដើម។
តំបន់ដែនសមុទ្រទឹកកកអាក់ទិច នៅប៉ូលខាងជើងផែនដី ត្រូវបានអ្នកវិទ្យាសាស្ត្រអះអាងថា ជាកន្លែងដែលពោពេញទៅដោយធនធានធម្មជាតិ ជាពិសេសប្រេង និងឧស្ម័ន ដែលបណ្តាប្រទេសនៅជុំវិញតំបន់នោះ ពិតជាមានសិទ្ធិ និងធ្វើការរុករក ព្រមទាំងស្នើសុំស្រាវជ្រាវបន្ថែមទៅតាមច្បាប់សមុទ្រ របស់អន្តរជាតិ។ ប៉ុន្តែសង្គ្រាមដណ្តើមទីតាំងយុទ្ធសាស្ត្រនៅតំបន់ទាំងនោះ ត្រូវបានអ្នកវិភាគអះអាងថា ពិបាកនឹងគេចរួចណាស់៕
