ភ្នំភ្លើង Merapi នៅលើកោះជ្វាផ្ទុះសាជាថ្មី និងជះកម្អែលផេះឡើងកប់អាកាសតែម្តង!
(ហ្សាការតា)៖ ភ្នំភ្លើងម៉ឺរ៉ាពី (Merapi) ស្ថិតនៅទីក្រុង យុកយ៉ាការតា (Yogyakarta) ភាគកណ្តាលកោះជ្វា (Java) នៃប្រទេសឥណ្ឌូណេស៊ីនោះ បានផ្ទុះឡើងជាថ្មីទៀតហើយនៅព្រឹកថ្ងៃសុក្រនេះ ដោយបានបង្ខំឲ្យប្រជាជនជាច្រើននាក់ ត្រូវជម្លៀសខ្លួនទៅរកកន្លែងមានសុវត្ថិភាព។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នារសៀលថ្ងៃសុក្រ ទី១១ ខែឧសភា ឆ្នាំ២០១៨។
ភ្នំភ្លើងដែលកំពុងពុះកញ្ជ្រោលខាងលើនេះ ស្ថិតនៅតំបន់ព្រំដែនបីស្រុកគឺ ក្លាទែន (Klaten), ម៉ាឡេឡេង (Magelang) និង បូយ៉ូឡាលី (Boyolali) ដោយវាបានផ្ទុះឡើងកាលពីវេលាម៉ោង ៧៖៣០នាទីព្រឹកថ្ងៃសុក្រនេះ (ម៉ោងនៅហ្សាការតា) និងបានជះកម្អែលផេះឡើងលើផ្ទៃអាកាស ក្នុងរយៈកម្ពស់ប្រមាណ ៥,៥០០ម៉ែត្រ តែមិនបានបង្កគ្រោះថ្នាក់ដល់ជីវិតមនុស្សនោះឡើយ គិតមកទល់នឹងរសៀលថ្ងៃដដែលនេះ។
កម្ទេចកម្ទីនៃធូលីផេះផង់ បានចាប់ផ្តើមធ្លាក់លើទីក្រុង Yogyakarta ភាគកណ្តាលកោះជ្វា ហើយនៅតំបន់ភាគខាងត្បូងភ្នំភ្លើងនេះ ត្រូវបានអាជ្ញាធរប្រកាសឲ្យប្រជាជនជម្លៀសចេញ ព្រោះវាជាកន្លែងដែលនឹងមានផេះធ្លាក់គ្របដណ្តប់ច្រើនជាងគេ ដោយសារស្ថិតនៅក្រោមខ្យល់។ បន្ថែមពីនេះក្រុមមន្ត្រីសង្គ្រោះបន្ទាន់ថ្នាក់ជាតិ បានស្នើឲ្យប្រជាជននៅទីនោះពាក់ម៉ាស់បិទមុខ ដើម្បីការពារធូលីឲ្យបានត្រឹមត្រូវ និងត្រូវស្ថិតនៅចម្ងាយយ៉ាងតិច ០៥គីឡូម៉ែត្រ ពីមាត់ភ្នំភ្លើង។
គួរបញ្ជាក់ថា ប្រទេសឥណ្ឌូណេស៊ី គឺជាដែនដីនៃប្រជុំកោះតូចធំសរុបចំនួនជាង ១៧ពាន់កោះ ហើយក្នុងនោះគ្រោះរញ្ជួយដី និងបន្ទុះភ្នំភ្លើងតែងតែកើតមានជារៀងរាល់ឆ្នាំ ដោយសារតែឥណ្ឌូណេស៊ី ស្ថិតនៅក្នុងតំបន់ខ្សែក្រវាត់ភ្លើង នៃមហាសមុទ្រប៉ាស៊ីហ្វិក (Pacific Ring of Fire) ដែលងាយរងគ្រោះធម្មជាតិអាក្រក់ៗ។
បន្ថែមពីនេះភ្នំភ្លើង Merapi ត្រូវបានក្រុមជំនាញអះអាងថា បានផ្ទុះជាទៀងទាត់ ចាប់តាំងពីឆ្នាំ១៩៤៨ ទល់នឹងបច្ចុប្បន្ន ហើយនៅជុំវិញនោះមានប្រជាជនរស់នៅ ២.៤លាននាក់ ដោយកាលពីខែវិច្ឆិកា ឆ្នាំ១៩៩៤ កម្អែលភ្នំភ្លើងក្រោយការផ្ទុះដ៏ខ្លាំងក្លា ដែលបានហូរចុះពីកំពូលភ្នំនេះ បានសម្លាប់មនុស្សរហូតដល់ទៅ ២៧នាក់៕
