HOT NEWS: ភ្នំភ្លើងលើកោះហាវ៉ៃ «ផ្ទុះឡើងយ៉ាងខ្លាំងក្លា និងជះកម្អែរផេះទៅមេឃ ក្នុងកម្ពស់ជិត១០គីឡូម៉ែត្រ»
(អាមេរិក)៖ ភ្នំភ្លើងគីឡូអៀ (Kilauea) នៅរដ្ឋហាវ៉ៃរបស់សហរដ្ឋអាមេរិក បានផ្ទុះសាជាថ្មីម្តងទៀត ដោយជះកម្អែលផេះយ៉ាងក្រាសឃ្មឹកឡើងទៅលើផ្ទៃអាកាសកម្ពស់ជិត ១០គីឡូម៉ែត្រ ដែលជាហេតុធ្វើឲ្យអាជ្ញាធរក្នុងតំបន់ធ្វើការណែនាំក៏ដូចជាទទូចឲ្យប្រជាពលរដ្ឋកុំឲ្យចាកចេញទៅក្រៅលំនៅឋានឲ្យសោះ។ នេះបើតាមការដកស្រង់ការផ្សាយចេញពី ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃសុក្រ ទី១៨ ខែឧសភា ឆ្នាំ២០១៨។
បើតាមទីភ្នាក់ងារឃ្លាំមើលសកម្មភាពភ្នំភ្លើងកោះហាវ៉ៃ HVO បានឲ្យដឹងថា បន្ទុះភ្នំភ្លើងនេះបានបង្កឲ្យមានដុំពពកដ៏ធំសម្បើមមួយ ដែលមានកម្ពស់ដល់ទៅ ៩,១០០ម៉ែត្រ ហើយកំពុងរសាត់ទៅភាគអាគ្នេយ៍។ ភ្លាមៗក្រោយពីវាបានផ្ទុះ ទីភ្នាក់ងារការពារជនស៊ីវិល នៃកោះហាវ៉ៃបានទទូចឲ្យប្រជាពលរដ្ឋស្វែងរកកន្លែងសុវត្ថិភាពដើម្បីជ្រកកោន និងកុំចេញទៅខាងក្រៅ ដោយសារតែកម្អែលផេះ នឹងគ្របដណ្តប់ពីលើតំបន់នៅជុំវិញនោះ។
ប្រជុំកោះហាវ៉ៃ ត្រូវបានក្រុមស្ទាបស្ទង់ភូមិសាស្ត្រអះអាងថា ស្ថិតនៅពីលើសណ្ឋានដីស្តើង ដែលក្រាលពីលើមាត់រណ្តៅភ្នំភ្លើងដ៏ធំ ហើយភស្តុតាងត្រូវបានស្តែងចេញយ៉ាងច្បាស់ នៅពេលមានគ្រោះរញ្ជួយដីជិត ៧រ៉ិចទ័រ កាលពីប៉ុន្មានសប្តាហ៍មុន ដែលទីតាំងមួយចំនួនបានរហែក និងហៀរកម្អែលភ្លើងចេញមកលើទីវាលដីទំនាបយ៉ាងស្រស់ៗតែម្តង។ ប្រជាជនក្នុងតំបន់ត្រូវបានជម្លៀសចេញ ប្រកបដោយការភ័យខ្លាចបំផុត។
គួរជម្រាបថា ការផ្ទុះលើកនេះបានកើតមានឡើង នៅពីរសប្តាហ៍បន្ទាប់ពីគ្រោះរញ្ជួយដីមួយកម្រិត ៦.៩រ៉ិចទ័រ បានវាយប្រហារកោះហាវ៉ៃ បានបណ្តាលឲ្យភ្នំភ្លើង Kilauea ផ្ទុះឡើងម្តងរួចទៅហើយ និងបង្កឲ្យមានសកម្មភាពភ្នំភ្លើង ដែលបានបង្ហូរកម្អែលភ្លើង ទៅកាន់សហគមន៍នានាដែលនៅក្បែរនោះ ដោយបំផ្លាញលំនៅឋានចន្លោះពី ២០ ទៅ ៣០ខ្នង ព្រមទាំងបង្ខំឲ្យមានការជម្លៀសខ្លួនមនុស្សជាច្រើននាក់។
បញ្ជាក់បន្ថែម៖ គ្រោះរញ្ជួយដីមួយ បានវាយប្រហារត្រង់ចំណុចស្ថិតនៅចម្ងាយ ១៦គីឡូម៉ែត្រ ពីភាគនិរតីនៃកោះ ឡៃឡានី អ៊ីស្តេតស៍ (Leilani Estates) ដែលជាកោះធំមួយក្នុងប្រជុំកោះនៃរដ្ឋហាវ៉ៃ។ សម្រាប់ជម្រៅនៃការញ័ររញ្ជួយគឺតែ ០៥គីឡូម៉ែត្រ ប៉ុណ្ណោះពីក្នុងដី។ ទីភ្នាក់ងារ USGS បានបញ្ជាក់នៅក្នុង Twitter របស់ខ្លួនថា «ការរញ្ជួយដីលើកនេះ វាមិនខុសពីការរញ្ជួយដីដ៏មហាប្រល័យកម្រិត ៧.១រ៉ិចទ័រ ដែលបានកើតមានឡើងកាលពីឆ្នាំ១៩៧៥ នោះឡើយ»៕
