តើច្រកឆ្លងចក្រវាល «Wormhole» ដូចក្នុងខ្សែភាពយន្ត «Interstellar» មានពិត ឬអាចកកើតឡើងទេ? (វីដេអូ)
(អវកាស)៖ ច្រកសម្ងាត់នៃចក្រវាឡដែលត្រូវបានគេហៅថា «Wormhole» គឺជាច្រកផ្លូវកាត់នៃ Space-Time មួយ ដែលអនុញ្ញាតឲ្យអ្នកធ្វើដំណើរផ្សងព្រេងឆ្លងកាន់ពីប្រព័ន្ធអាទិត្យមួយ ទៅកាន់ប្រព័ន្ធព្រះអាទិត្យមួយទៀតនៅក្នុងរយៈពេលដ៏ខ្លី ហើយជាទូទៅវាគឺជាមូលដ្ឋានគ្រឹះសំខាន់របស់ខែ្សភាពយន្តក៏ដូចជាសៀវភៅទាំងឡាយណា ដែលពាក់ព័ន្ធនឹងការស្រមើស្រមៃនៅទីអវកាស ដូចជារឿងហូលីវូដដ៏ល្បីល្បាញមួយនោះគឺ «Interstellar» កាលពីឆ្នាំ២០១៤ ក៏ប៉ុន្តែសំណួរចោទជាសំខាន់គឺថា តើវាអាចទៅរួចបានដែរឬយ៉ាងណា? តើយើងពិតជាអាចបត់និងពត់ពេលវេលា និងលំហអវកាស (Space-Time) ដើម្បីបង្កើតចេញជាច្រកផ្លូវឆ្លងកាត់សម្រាប់ដំណើរដ៏ងាយស្រួលមួយ ហើយធ្វើឲ្យក្តីសុបិនដ៏ធំមហិមាក្លាយជាការពិតមែនឬ។ នេះបើតាមការដកស្រង់ការផ្សាយចេញពីគេហទំព័រ SPACE នៅរសៀលថ្ងៃសៅរ៍ ទី០៤ ខែកុម្ភៈ ឆ្នាំ២០១៧។
ចម្លើយដ៏ល្បីបំផុតនោះគឺ៖ «ទំនងជាមិនអាចទៅរួចឡើយ»។ ពីព្រោះ? ដោយសារតែបញ្ហាទីមួយនោះគឺថា គំនិតនៃការអាចកើតមានច្រកចក្រវាឡ (Wormhole) បានចាប់ផ្តើមនៅពេលដែលអ្នកវិទ្យាសាស្រ្តដូចជាលោក Ludwig Flamm និងក្រោយមកលោក Albert Einstein ព្រមទាំងលោក Nathan Rosen បានជ្រាបថាប្រហោងខ្មៅ «Blackhole» អាចលាតសន្ធឹងខ្លួនបាន។ នៅពេលអ្នកមនុស្សម្នាក់សម្រេចចាប់ផ្តើមធ្វើការដោះស្រាយសមីការពាក់ព័ន្ធទូទៅ យន្តការដែលព្យាករលើប្រហោងខ្មៅមួយ ស្របពេលជាមួយគ្នាក៏ធ្វើការព្យាករណ៍អំពីបាតុភូតមួយឲ្យឈ្មោះថាប្រហោងស (Whitehole) ផងដែរ អ្វីដែលសំខាន់នោះគឺថា ខណៈពេលដែលមាត់ច្រកនៃពេលវេលា (Event Horizon) របស់ប្រហោងខ្មៅ ធ្វើការកំណត់នូវលំហរអាកាសដែលនៅពេលអ្នកចូលទៅកាន់វា ហើយមិនអាចមានឱកាសចេញមកវិញនោះឡើយ វាមិនអាចទៅរួចក្នុងការចូលទៅកាន់ Event Horizon របស់ប្រហោងស ទោះបីជាអ្វីក៏ដោយដែលស្ថិតនៅក្នុងនោះរួចជាស្រេចអាចចាកចេញបានយ៉ាងណាក្តី។
ជាមួយគ្នានេះយន្តការដូចគ្នាដដែលនោះក៏ផ្តល់នូវកត្តាបន្ថែមមួយផងដែរគឺ៖ គ្រប់ប្រហោងខ្មៅទាំងអស់ជាធម្មជាតិ នឹងធ្វើការតភ្ជាប់ជាមួយប្រហោងសតាមរយៈ Singularities របស់ពួកវាទាំងពីរ ដែលប្រការនេះនឹងបង្កើតចេញជាចក្រផ្លូវចក្រវាឡ (Wormhole)… ឬមួយអត់ទៅវិញក៏ថាបាន ពីព្រោះខណៈយើងមានភស្តុតាងយ៉ាងច្រើនសន្ធឹកសន្ធាប់អំពីវត្តមានរបស់ប្រហោងខ្មៅ ប្រហោងសហាក់ដូចជារឿងប្រឌិតមួយនៅឡើយ ដោយបច្ចុប្បន្នពុំទាន់មាននីតិវិធីណាមួយ ដែលយើងដឹងនៅក្នុងចក្រវាឡរបស់យើង ដែលនឹងពិតជាអាចធ្វើឲ្យកកើតពួកវានោះឡើយ ហើយប្រសិនបើប្រហោងសទាំងនោះ ពិតជាលេចរូបរាងមែននោះ កម្រិតអស្ថិរភាពធម្មជាតិដ៏ខ្លាំងសម្បើមរបស់ពួកវា នឹងបណ្តាលឲ្យពួកវារលាយបាត់ទៅវិញមួយរំពិចជាក់ជាមិនខាន។
ម៉្យាងវិញទៀតដំណើរការនៃការបង្កើតប្រហោងខ្មៅ (ការរលាយនៃផ្កាយដ៏ធំៗមហិមា) ក៏នឹងធ្វើការរារាំងដោយស្វ័យប្រវត្តិចំពោះការកកើតរបស់ប្រហាងស ដែលមានសម្ព័ន្ធរួមគ្នាផងដែរ។ ដោយឡែកបើសិនជាពួកវាទាំងពីរ (ប្រហោងខ្មៅនិងប្រហោងស) អាចកកើតជាមួយគ្នាបានមែននោះ (ធាតុពិតមិនអាចជាដាច់ខាត) ទំនាញដ៏ខ្លាំងក្លានៃ Singularities របស់ពួកវានឹងបង្កឲ្យចក្រផ្លូវ Wormhole ពន្លាតខ្លួនភ្លាមៗ ហើយរលាយបាត់យ៉ាងឆាប់រហ័សជាទីបំផុត លឿនជាងអ្វីមួយអាចឆ្លងកាន់វាបានទៅទៀត។
ទោះបីជាបែបនេះក្តីក៏មិនអាចហាមឃាត់មនុស្សចំនួនប្រើប្រាស់ពាក្យ «បើសិនជា» នោះដែរ។ បើសិនជាប្រហោងស (Whiteholes) អាចកកើតឡើងបានដោយធម្មជាតិ ឬមួយក៏បង្កើតឡើងតើយ៉ាងម៉េចវិញ? បើសិនជាយើងអាចធ្វើឲ្យពួកវាមានលំនឹងតើយ៉ាងម៉េចវិញ? បើសិនជាយើងអាចតភ្ជាប់ Singularity របស់ប្រហោងសជាមួយប្រហោងខ្មៅ ហើយបង្កើតចេញជាច្រកចក្រវាឡតើយ៉ាងម៉េចវិញ?
បញ្ហានោះគឺថាចក្រទ្វារចូលរបស់ Wormhole (ប្រៀបដូចជាបំពង់ក) ស្ថិតនៅផ្នែកខាងក្នុងនៃ Event Horizon របស់ប្រហោងខ្មៅតែម្តង ដែលនេះហើយគឺជាបញ្ហាចម្បងទីពីរ។ អត្ថន័យចម្បងរបស់ Event Horizon គឺថានៅពេលដែលអ្នកធ្វើដំណើរឈានចូលក្នុងតំបន់វាហើយ អ្នកពុំអាចចាកចេញពីទីនោះបានឡើយ ដោយគ្មានផ្លូវឬមួយក៏មធ្យោបាយអ្វីទាំងអស់ ហេតុនេះហើយវាមិនជារឿងសំខាន់ទៀតនោះឡើយ ដែលរូងផ្លូវ Wormhole ស្ថិតនៅក្នុងនោះ ព្រោះថាអ្នកគ្មានឱកាសចាកចេញឡើយ។
នៅក្នុង Event Horizon របស់ប្រហោងខ្មៅ អ្នកមានគោលដៅតែមួយគត់គឺ «Singularity Town» ដែលជាកន្លែងកម្លាំងទំនាញដ៏មានឥទ្ធិពលខ្លាំងក្លាជាទីបំផុត និងមានសម្ពាធឥតឈប់ឈរនោះឡើយ។ ដូច្នេះនិយាយថា អ្នកបានចូលទៅដល់ចក្រផ្លូវចក្រវាឡ (Wormhole) ទៅចុះ នៅពេលនោះអ្នកអាចមើលឃើញពន្លឺនៃផ្នែកមួយរបស់ចក្រវាឡពីចក្រវាឡម្ខាងទៀត ប៉ុន្តែបានត្រឹមរង់ចាំសេចក្តីស្លាប់ដោយរងទុក្ខវេទនាតែប៉ុណ្ណោះ ស្របពេលដែលកំពុងឆ្ពោះយ៉ាងសន្សឹមៗទៅកាន់ Singularity របស់ប្រហោងខ្មៅ។
ដូច្នេះតើមានមធ្យោបាយដើម្បីបង្កើតច្រកចក្រវាឡ (Wormhole) ដែលអាប្រើប្រាស់បានមួយដែរឬយ៉ាងណា ជាជាងចក្រផ្លូវដ៏គួរឲ្យភ័យខ្លាច ដែលឆ្ពោះទៅរកសេចក្តីវិនាសមិនអាចគេចផុតវិញនោះ? ចម្លើយពិតជាគួរឲ្យភ្ញាក់ផ្អើលគឺ «មាន» ក៏ដូចជាមិនមានដែរ ពីព្រោះដើម្បីបង្កើតច្រកចក្រវាឡមួយដែលអាចធ្វើដំណើរបាន អ្នកត្រូវយកឈ្នះលើបញ្ហាពីរយ៉ាងគឺ ទីមួយ៖ មាត់ទ្វាចូលរបស់ Wormhole ចាំបាច់ត្រូវតែស្ថិតនៅផ្នែកខាងក្រៅនៃច្រកពេលវេលា (Event Horizon) របស់ប្រហោងខ្មៅ ដែលប្រការនេះនឹងអនុញ្ញាតឲ្យអ្នកចូលទៅកាន់ច្រកចក្រវាឡ ហើយឆ្លងកាត់ដើម្បីចាកចេញឆ្ពោះទៅកាន់គោលដៅដ៏សែនឆ្ងាយរបស់អ្នក ដោយមិនខ្លាចជួបប្រទះនូវ Singularity ណាមួយឡើយ។ ទីពីរ៖ ផ្លូវរបស់ Wormhole ផ្ទាល់ត្រូវតែមានលំនឹងហើយរឹងមាំ ដោយចាំបាច់ត្រូវតែអាចទប់ទល់នឹងទំនាញដ៏ខ្លាំងរបស់ Singularities របស់ប្រហោងខ្មៅ និងប្រហោងស ហើយអត់ធន់នឹងការដាច់ចេញពីគ្នា នៅពេលដែលមានវត្ថុហោះធ្វើដំណើរឆ្លងវា។
អ្វីដែលពិសេសនោះគឺជារូបធាតុម៉្យាងដែលអាចដោះស្រាយបញ្ហារាំងស្ទះទាំងពីរនេះបាន ប៉ុន្តែរូបធាតុនេះមានបញ្ហារបស់ខ្លួនវាផ្ទាល់គឺ៖ វាមានម៉ាសអវិជ្ជមាន (Negative Mass)។ យ៉ាងណាមិញ បណ្តុំនៃរូបធាតុដែលមានម៉ាសអវិជ្ជមាននេះ អាចយកទៅប្រើប្រាស់ក្នុងការបង្កើតច្រកចក្រវាឡដែលមានប្រយោជន៍ និងប្រើប្រាស់យ៉ាងពេញលេញមួយបាន។ រូបធាតុនេះមានសមត្ថភាពធ្វើឲ្យមាត់ទ្វាររបស់ Wormhole ស្ថិតនៅក្រៅតំបន់នៃចក្រពេលវេលា (Event Horizon) និងផ្តល់ស្ថិរភាពដល់រូងផ្លូវរបស់ Wormhole ប្រឆាំងនឹងអស្ថិរភាពបាន ក៏ប៉ុន្តែតើរូបធាតុបែបនេះអាចមានវត្តមានដែរឬទេ? ក្រុមអ្នកវិទ្យាសាស្រ្តបានតាមដាន និងពិនិត្យមើលផ្នែកជាច្រើននៃចក្រវាឡ ហើយពួកគេមិនដែលបានប្រទះឃើញរូបធាតុ Negative Mass នោះឡើយ តែបើសិនជារូបធាតុនេះមានពិតមែននោះ វាគឺជារឿងដ៏អស្ចារ្យបំផុត៕
ប្រែសម្រួល៖ Cambo Space (ឥន្ទ វត្ថា)
ប្រភព៖ SPACE (អត្ថបទចេញក្នុងឆ្នាំ២០១៧)
