(វ៉ាស៊ីនតោន)៖ កែវយឺតឆ្លុះភពថ្មីបំផុតរបស់ទីភ្នាក់ងារអវកាស NASA ទើបតែបានចាប់ផ្តើមបេសកកម្មរបស់វាប៉ុណ្ណោះ ប៉ុន្តែចូរទស្សន៍ទាយទៅមើលថា តើភពថ្មីៗចំនួនប៉ុន្មានថែមទៀត ដែលនឹងត្រូវកែវយឺតអវកាសនេះរុករកឃើញ។ នេះបើតាមការដកស្រង់ការផ្សាយចេញពីវែបសាយ Space.com នៅយប់ថ្ងៃសុក្រ ទី១០ ខែសីហា ឆ្នាំ២០១៨។
បើតាមការប៉ាន់ស្មានរបស់ក្រុមអ្នកវិទ្យាសាស្រ្ត នៅពីក្រោយបេសកកម្ម Transiting Exoplanet Survey Satellite ហៅកាត់ថា TESS យានអវកាសនេះ គួរឲ្យអាចស្វែងរកឃើញភពប្រមាណ ១០,០០០ភព នៅក្នុងបេសកកម្មរយៈពេល ០២ឆ្នាំ របស់វាហើយ ៣,៥០០ភព ក្នុងចំណោមនោះ គួរតែមានទំហំតូចជាងណិបទូន ដែលជាការផ្តោតសំខាន់របស់បេសកកម្មនេះ។
ម៉្យាងវិញទៀតប្រសិនបើកែវយឺតអវកាសនេះ អាចបន្តធ្វើការបានយូរជាងគម្រោងរំពឹងទុកបច្ចុប្បន្ននោះចំនួនភពអេលៀនដែលអាចត្រូវរកឃើញ ក៏នឹងកើនឡើងទៅតាមនោះដែរ ប៉ុន្តែសម្រាប់ការវិភាគថា ភពនោះអាចទ្រទ្រង់ជីវិតបាន ឬមួយក៏អត់នោះ គឺត្រូវរង់ចាំដល់ James Webb បាញ់បង្ហោះនៅឆ្នាំ២០២១ ដែលមានវាសមត្ថភាព វិភាគដឹងអំពីធាតុផ្សំ និងបរិយាកាសនៃភពដែលត្រូវបានរកឃើញ។
គួរជម្រាបថា TESS បានចាប់ផ្តើមធ្វើប្រតិបត្តិការឆ្លុះរកភព នៅក្រៅប្រព័ន្ធព្រះអាទិត្យ កាលពីប្រមាណ ០២សប្តាហ៍មុន ក្រោយពីវាត្រូវបានគេបាញ់បង្ហោះឡើងទៅទីអវកាស កាលពីខែមេសាកន្លងទៅ ប៉ុន្តែសម្រាប់ដំណើរការផ្លូវការ និងលទ្ធផលបឋមរបស់វា នឹងចេញនៅអំឡុងឆ្នាំ២០២០៕
