(ភ្នំពេញ)៖ បើតាមតួលេខជាផ្លូវការចំនួនប្រទេសនៅលើសកលលោកយើងនេះ មានចំនួនរហូតដល់ទៅ ១៩៥ប្រទេស ក្នុងនោះមានទាំងប្រទេសដែលមានប្រជាជនតិចបំផុតរហូតដល់ទៅរាប់ពាន់លាននាក់ និងពីប្រទេសដែលមានផ្ទៃដីស្ទើរតែប៉ុនកោះតូច មួយរហូតដល់ទំហំរាប់លានគីឡូម៉ែត្រក្រឡា។ ខាងក្រោមនេះជាចំនួនខេត្ត ឬរដ្ឋ ព្រមទាំងប្រជាជន នៃបណ្តាប្រទេសយក្សទាំង ១០ ដែលមានផ្ទៃដីធំជាងគេជាងឯងនៅលើសាកលលោក។
១០៖ ប្រទេសអាល់ហ្សេរី៖ ប្រទេសអាហ្វ្រិកខាងជើងមួយនេះមានផ្ទៃដីសរុប 2,381,741 គីឡូម៉ែត្រក្រឡា និងប្រជាជនជាង ៤០លាននាក់។ ប្រជាជាតិដ៏ធំមួយនេះមានខេត្ត ឬភាសាអាល់ហ្សេរីហៅថា វីឡាយ៉ាស ចំនួន ៤៨ ជាមួយនឹងរដ្ឋធានីឈ្មោះ អាល់ជីស។
០៩៖ ប្រទេសកាហ្សាក់ស្ថាន៖ ប្រជាជាតិអតីតស្ថិតនៅក្រោមសហភាពសូវៀតមួយនេះ ស្ថិតនៅតំបន់អាស៊ីផងដែរ ដែលមានផ្ទៃដីធំធេងខ្លាំងណាស់រហូតដល់ទៅ 2,724,900 គីឡូម៉ែត្រក្រឡា ជាប់លេខ ៩ លើលោក ជាមួយនឹងប្រជាជនសរុប ១៨លាននាក់ រស់នៅក្នុងខេត្តចំនួន ១៤ និងរដ្ឋធានីឈ្មោះអាស្តាណា។
០៨៖ ប្រទេសអាហ្សង់ទីន៖ ប្រទេសអាមេរិកខាងត្បូងមួយនេះមានផ្ទៃដីទំហំ 2,780,400 គីឡូម៉ែត្រក្រឡា ជាមួយនឹងប្រជាជនសរុបជាង ៤៤លាននាក់។ ប្រទេសដ៏ធំធេងមួយនេះមានខេត្តចំនួន ២៣ និងរដ្ឋធានីឈ្មោះប៊ុយណូសអ៊ែរែស។
០៧៖ ប្រទេសឥណ្ឌា៖ មហាយក្សលេខពីរប្រចាំតំបន់អាស៊ីមួយនេះ ក៏មានប្រជាជនច្រើនលំដាប់លេខ ២ នៅលើលោកផងដែរ គឺរហូតដល់ជិត ១,៣០០លាននាក់ហើយ។ ជាមួយផ្ទៃដីដ៏ធំធេង ឥណ្ឌាមានរដ្ឋចំនួន ២៩ និងរដ្ឋធានីឈ្មោះ ញូដេលី ខណៈម៉ុមបៃជាទីក្រុងសេដ្ឋកិច្ចធំ ដែលមានប្រជាជនរស់នៅច្រើនបំផុត។ប្រទេសឥណ្ឌាមានផ្ទៃក្រឡាជាង 3.287.000 គីឡូម៉ែត្រក្រឡា។
០៦៖ ប្រទេសអូស្ត្រាលី៖ ប្រទេសនេះមានផ្ទៃដីធំធេងណាស់ គឺយកមួយទ្វីបតែឯងតែម្តងដែលមានទំហំ 7,741,220 គីឡូម៉ែត្រក្រឡា។ ជាមួយផ្ទៃដីធំធេងខ្លាំងបែបនេះ អូស្ត្រាលីមានប្រជាជនរស់នៅក្នុងរដ្ឋចំនួន ៦ របស់ខ្លួនតែជាង ២៤លាននាក់ប៉ុណ្ណោះ ខណៈរដ្ឋធានីរបស់ប្រទេសនេះ គឺ កង់បេរ៉ា ប៉ុន្តែកន្លែងដែលមានប្រជាជនរស់នៅច្រើន គឺមែលប៊ន និងស៊ីដនី។
០៥៖ ប្រទេសប្រេស៊ីល៖ ប្រទេសដ៏ធំធេងបំផុតប្រចាំតំបន់អាមេរិកឡាទីនមួយនេះ ក៏ជាប្រទេសមានផ្ទៃដីធំបំផុតលំដាប់លេខ ៥ នៅលើសកលលោកផងដែរ ជាមួយនឹងផ្ទៃដីសរុប 8,514,877 គីឡូម៉ែត្រក្រឡា។ ប្រេស៊ីលមានប្រជាជនសរុបជិត ២១០លាននាក់ រស់នៅតាមបណ្តារដ្ឋចំនួន ២៦ និងទីក្រុងធំៗដូចជា រីយ៉ូ, សៅប៉ូឡូ ព្រមទាំងរដ្ឋធានីឈ្មោះប្រេស៊ីឡា។
០៤៖ ប្រទេសចិន៖ មហាយក្សលេខ ១ ទាំងសេដ្ឋកិច្ច និងចំនួនជាប្រជាជននៅទ្វីបអាស៊ីមួយនេះ មានផ្ទៃដីធំធេងណាស់រហូតដល់ 9,596,961 គីឡូម៉ែត្រក្រឡាឯណោះ ដែលជាប់លេខ ៤ នៅលើពិភពលោក។ ប្រទេសចិនមានខេត្តសរុបចំនួន ៣៤ និងទីក្រុងធំៗជាច្រើនទៀតដូចជា ប៉េកាំង (រដ្ឋធានី), ធានជិន, សៀងហៃ, ចុងគីង, ហុងកុង និងម៉ាកាវជាដើម ខណៈប្រជាជនសរុបគឺក្បែរ ១,៤០០លាននាក់ទៅហើយ។
០៣៖ សហរដ្ឋអាមេរិក៖ មហាអំណាចយោធា និងសេដ្ឋកិច្ចលំដាប់លេខ ១ នៅលើពិភពលោកនេះមានផ្ទៃដីសរុប 9,826,675 គីឡូម៉ែត្រក្រឡា ជាប់លេខបីលើភពផែនដី។ អាមេរិកមានរដ្ឋសរុបចំនួន ៥០ និងរដ្ឋធានីឈ្មោះវ៉ាស៊ីនតោនឌីស៊ី ជាមួយប្រជាជនរស់នៅសរុបជិត ៣២៦លាននាក់។
០២៖ ប្រទេសកាណាដា៖ ប្រជាជាតិដ៏ត្រជាក់សន្ធឹងដល់ជិតប៉ូលខាងជើងភពផែនដីនេះ មានផ្ទៃដីធំធេងខ្លាំងណាស់រហូតដល់ទៅ 9,984,670 គីឡូម៉ែត្រក្រឡា ប៉ុន្តែប្រជាជនវិញមានតែចំនួនជាង ៣៧លាននាក់ប៉ុណ្ណោះ។ កាណាដាមានខេត្តចំនួនតែ ១០ និងទីក្រុងធំៗដូចជា អូតាវ៉ា (រដ្ឋធានី) និងកេប៊ិចជាដើម។
០១៖ ប្រទេសរុស្ស៊ី៖ មហាអំណាចយោធាលេខ ២ ប្រចាំពិភពលោកនេះ គឺមានផ្ទៃដីធំធេងខ្លាំងជាងគេបំផុតរហូតដល់ទៅ 17,098,242 គីឡូម៉ែត្រក្រឡា ស្មើនឹងប្រទេសប្រេស៊ីលគុណនឹងពីរទៅហើយ។ ប្រជាជនរុស្ស៊ីក៏មិនតិចនោះដែរ គឺមានចំនួនរហូតដល់ខ្ទង់ ១៤៥លាននាក់។ ជាការពិតខេត្ត ឬតំបន់ ព្រមទាំងសាធារណរដ្ឋ គឺត្រូវបានចាត់ចូលក្នុងទឹកដីរុស្ស៊ីទាំងអស់ ដែលមានសរុបចំនួនជាង ៨០ (តំបន់រដ្ឋបាលគ្រប់គ្រង) និងមានរដ្ឋធានីឈ្មោះម៉ូស្គូ៕
ចងក្រងដោយ៖ Cambo Space
ប្រភព៖ Wikipedia និង infoplease.com
