(អាមេរិក)៖ ការសិក្សាថ្មីមួយបានរៀបរាប់ឲ្យដឹងពី ការផុតរលត់អាយុកាលរបស់ផ្កាយដ៏ធ្ងន់មួយ ដែលបានផ្ទុះក្នុងបាតុភូតបន្ទុះសូភើណូវ៉ាដ៏ចម្លែក ដែលឲ្យតំរុយថាផ្កាយមួយដួងនោះ ប្រហែលជាមានដៃគូរបស់វាមួយដែលគេមើលពុំឃើញ។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៉ីនហួរ នៅរសៀលថ្ងៃសុក្រ ទី១២ ខែតុលា ឆ្នាំ២០១៨។
យោងតាមការសិក្សាខាងលើ ផ្កាយមួយដួងទៀត (ភ្លោះ) ដែលគេមើលពុំឃើញ ទំនងជាបានស្រូបយកម៉ាសរបស់ផ្កាយខាងលើ ដែលជាហេតុធ្វើឲ្យវាផ្ទុះចេញជាបន្ទុះសូភើណូវ៉ា (Supernova) ដ៏រហ័សមួយ ហើយជាលទ្ធផលវាបានក្លាយទៅជាផ្កាយណឺត្រុងងាប់មួយដួង ដែលនៅធ្វើគោចរជុំវិញដៃគូអាថ៌កំបាំងរបស់វា។ ដោយសារផ្កាយណឺត្រុងថ្មីខាងលើ និងដៃគូរបស់វាស្ថិតនៅក្បែរគ្នាខ្លាំង ទីបំផុតពួកវាទាំងពីរនឹងប៉ះទង្គិចគ្នា ដូចក្នុងព្រឹត្តិការណ៍ឆ្នាំ២០១៧ ដែលបានបង្កើតចេញពីរលកទំនាញ និងរលកអេឡិចត្រូម៉ាញេទិចក្នុងទីអវកាស។
នៅពេលផ្កាយធ្ងន់មួយ ដែលមានម៉ាសច្រើនជាងព្រះអាទិត្យយ៉ាងតិច ០៨ដង លែងមានសារធាតុទ្រទ្រង់ចំហេះវា ស្នូលរបស់វានឹងរលំរលាយដោយសារកម្លាំងទំនាញ ហើយឈានទៅរកហេតុការណ៍ផ្ទុះដ៏កក្រើកមួយ ដែលនឹងធ្វើឲ្យរាល់ស្រទាប់ផ្នែកខាងក្រៅរបស់ផ្កាយនោះខ្ទាតចេញពីខ្លួនវា ដោយបន្សល់ទុកនូវផ្កាយណឺត្រុងដ៏ក្រាស់មួយវិញ។ ផ្កាយណឺត្រុងតែមួយចំណិតតូចប៉ុណ្ណោះ អាចមានទម្ងន់ធ្ងន់ស្មើនឹងភពនៅលើផែនដី។
ក្នុងអំឡុងបាតុភូត Supernova រាល់រូបធាតុនានានៅស្រទាប់ផ្នែកខាងក្រៅរបស់ផ្កាយ ដែលជាធម្មតាធ្ងន់ជាងព្រះអាទិត្យពីរទៅបីដងឯណោះនោះ នឹងត្រូវខ្ទាតចេញពីខ្លួនវា។ ប៉ុន្តែសម្រាប់ព្រឹត្តិការណ៍ខាងលើនេះ អ្នកវិទ្យាសាស្រ្តបានសង្កេតឃើញថា រូបធាតុដែលខ្ទាតចេញ គឺមានទម្ងន់ត្រឹមតែ ០១ភាគ០៥ នៃម៉ាសរបស់ព្រះអាទិត្យប៉ុណ្ណោះ។
គួរជម្រាបថា ហេតុដូចនេះហើយ ទើបអ្នកវិទ្យាសាស្រ្តបានសន្និដ្ឋានថា ម៉ាសរបស់វាប្រហែលជាត្រូវបានលួចស្រូបយក ដោយវត្ថុជាដៃគូម៉្យាងដែលក្រាស់ ហើយនៅកៀកគ្នា ដោយវាអាចជាផ្កាយស White Dwarf ផ្កាយណឺត្រុង ឬក៏ប្រហោងខ្មៅ៕
